هانام بدرى

سكوتى ويَّا صمت الليل
بيتفقوا على الأحلام
وأحلامى تلاقيها منين؟
مابين غربة وقلب جريح
وبجرى والحياة مشاوير
وبتسابق مع الأيام
سنين تجرى وراها سنين
ورافض أنحنى للريح
وحيلى اتهد م الأحمال
ومليت الحنين والعد
وبتمرد على الأحوال
سواء بالهزل أو بالجد
وف عيونى كلام يتقال
وحالف مش هقوله لحد
لحد ما تيجى شمس الغد
تنور لى.. تدفِّينى
وتنده لى.. تلاقينى
بصون جوه العيون العهد
وقافل قلبى ع الأخبار
وع اللى ما بينا من أسرار
أوافى الوعد وتوافى
تغطينى بشال أنوار
تاخدنى فى حضنها الدافى
وأهديها ديوان أشعار
يدوب حملى على كتافى
وادوِّب همى والأسوار
ولما منبهى يكسر سكون الليل لسابع جار
ألاقى الفجر يوعدنى بأحلى نهار
أقوم من نومى واتوضى
واقضى العمر لو قَضّى
بلمّع حلم كان صدّى
ولو حتى النهار عدّى.. وودعنى
وإيه يعنى؟
مسير الصبر هينوّل
ولو جانى سواد الليل يضيعنى
هنام بدرى.. عشان ألحق
أشوف الحلم م الأول