لي ليه بعنيك يا ملاك ؟! حاسس إنك عايز تحفظ كل ملامحي ! احفظها كويس واحفظني لو كنت عايزني أعيش ويّاك .. أنا بترجّاك .. تسهر ويّايا لحد الصبح نلعب مع بعض ونتسلّي .. ماكدبشي عليك ! أنا نازل بكرة ومش عارف راجع .. ولاّ.. لكن متأكد إني لا يمكن عن أحلامك هتخلّي هحميها بآخر نقطة دم ف قلب باباك بتبص لي ليه بعنيك يا ملاك ؟! مستغربني ؟! الحق معاك طبعاً يا ابني .. والحق علي اللي سجنّي سنين .. من يوم ما عرفت الدنيا وقلبي يا قلبي حزين أنا نازل بكرة بدمي ألوّن أحزاني مش عارف لو كان مكتوب لي ف الدنيا هنتقابل تاني .. ولاِّ هتشوفني علي الشاشة وعلي «اليو تيوب» إوعاك تسمع مرّة كلامهم لو قالوا علي كلام مكذوب أنا نازل أطالب بحقوقنا .. مش نازل أولّع ف الدنيا ولا أحدّف طوب واللهِ أنا أطيب م الطيبة .. وإنت عارفني ومجرّبني مش إنت اللي كسرت الفازا وأنا عدّيتها ؟! وحميتك من علقة ماما .. وضحكت عليها وهدّيتها .. أقنعتها إن الفازا تراب .. وإن اللي أهم من الفازا إنك ماتباتشي ف يوم مرعوب .. وإن الإقناع ف التربية .. أول شبابيك الحريّة ويوميها جابت لك عسليّة وكمان دبدوب أنا راضي ضميرك .. مش بابا راجل حبّوب ؟! أنا نازل بكرة ومش عايزك تستناني .. بتمني تشوف النور بعنيك أكتر بكتير ما أنا بتمني أرجع لك وأشوفك تاني وإن كان الموت ع الناس مكتوب أتمني الموت يا حبيبي فداك .. أكتر بكتير ما أنا بتمني أقدر أعرف .. بتبص لي ليه بعنيك يا ملاك ؟!