يارايح المزرعة

بقلم : د. ياسر مصطفى زكى
نشرت روزاليوسف فى عددها الصادر يوم السبت 22 من إبريل 2011م قصيدة زفة المزرعة بدأها الشاعر أسامة عبد الصبور ثم توالت مقاطعها لمجموعة من الشعراء منهم: أشرف الشافعى، دعاء عبد الوهاب، أحمد قدرى، محمد عبدالله، الشاعر الدكتور ياسر مصطفى أكمل بدوره سبعة مقاطع وكان المقطع الأول الذى كتبه أسامة عبد الصبور يقول:
يارايح المزرعة
سلم لى ع الحلوين
صحبة ومتجمعة
بتنور الزنازين
الله على شكلهم والشعب بيزفهم
من قلبه يفرح لهم
ويفرقع البلالين
أما المقاطع السبعة التى أكمل بها أستاذ الفلسفة الإسلامية فتقول:
1 يارايح المزرعة دى نهاية الظالمين
اللى فسدوا فى الوطن
آخرتهم الزنازين
نسوا طوال حكمهم
نهاية الباغين
وشباب قوى العزيمة
على الظلم مش ساكتين.
2 يارايح المزرعة
سلم لى على سرور
سموه حكيم الوطن
وفى الجلسات مغرور
يمسك عصا القوانين
والكل بيه مسحور
والشعب فى أزمته
جوه القبور مهجور.
3 يارايح المزرعة
سلم لى على علاء
طول عمره منطوى
ما عرفنا يوم بلواه
وفى النهاية انكشف
وظهر عليه الثراء
ياشعب يا مظلوم
ربك كريم فى علاه
4 يارايح المزرعة
سلم لى على جمال
شاف أيام الهنا
والشهرة والدلال
وفى لجنة السياسات
ماعرف يوم الأحمال
كان نفسه يبقى الرئيس
فى أيام بلا أهوال.
5 يارايح المزرعة
سلم لى على الشريف
صفوة رجال المجتمع
ورئيسهم هناك نظيف
وعز والمغربى وجرانة
والفقى وشاعرنا الخفيف
ومجاور وعبدالرحمن
ألطف بينا يا لطيف.
6 يارايح المزرعة
خد عيش وحلاوة
السجن ده نهاية
للمغربى وعز وجرانة
سلبوا أراضى البلد
وباعوها فى خيانة
لو عرفوا ده اليوم
ماخانوا لحظة الأمانة.
7 يارايح روزاليوسف
بلغ أسامة عبد الصبور
أشعاره حلوة وجميلة
ومرصصة فى طبق بنور
وبلدنا بعد النهاردة
ما تشوف غير النور
اكتب وسجل كلامك
مليان نغم وشعور