هتسيبها لمين؟ ياللى زهقت وقلت كفاية! وتروح على فين؟ من نفسك يا أبوعين بكّاية! لو كنت هتغدر ببلادك وهتخلف مع بكرة ميعادك إزاى هتقابل أولادك؟ وتبص لنفسك ف مراية.. من غير ما تحل الفزّورة هتشخبط على أجمل صورة؟ وتسيبها حزينة ومكسورة لكلاب السكة المسعورة محتارة بتحلم ببداية طب كنت تسيبها لأوجاعها من غير ما بحلمك تخدعها وف أجمل شمس تطمّعها وتاخدها بعيد وتخدعها لضلام مالهوش أى نهاية لو من أولها تقول زهقان أو كنت هترجع زى زمان صدقنى يا صاحبى إنت الخسران هتعيش ندمان وتموت ندمان مشهد بهتان جوّه رواية ملعون اليأس اللى يخلّيك تقفل أبوابك والشبابيك ويخلّى الحلم اللى وثق فيك لحظة ما ينادى عليك يلاقيك مستسلم ورفعت الراية قبل ما تضيع وسط السكّة وتقرر ترجع للدِكّة مسكين تتفرج على مساكين اسأل نفسك آخر مرة هتسيبها لمين؟