صدّقت بكرة .. وبكرة لسه مكدّبك ؟ عايز تصاحبه وهو عايز يتعبك ؟ لسّاك مراهن ع الأمانى تنوره ؟ لسّاه مراهن ع الليالى تشيّبك ؟ بينك وبينه الخوف جدار عينك ف عينه وباختصار إنت اللى ف إديك القرار ويا تغلبه .. يا هيغلبك بيخوفوك من قسوته ومن الطبيعى يخوفوك ولو يطولوا يكتّفوك هيكتّفوك عاشوا السنين بيفهموك إنك مجرد ريشة طايرة ف الهوا من غير هدف وإن إنت قطر الحلم فاتك للأسف وإن إنت قدرك ف الحياة إنك تموت وتعيش سلف وإن إنت دورك تبقى ضيف وإن يوم حلمت تكون طرف بيحضروا لك كل أشباح السنين ويغرقوك ف الذكريات يا هل ترى هتوطى سقف الأمنيات ؟ وهترهن اللى جاى من عمرك لأوهام اللى فات ؟ ولا أنت قادر من جديد تثبت لهم جهل اللى كان بيقول لهم ماحناش ف عصر المعجزات ؟