حمدالله على السلامة يا أبو أجمل ابتسامة

أول ما بنسمع اسم «نجاة الصغيرة» بييجى فى بالنا على طول صوتها الهادى الليّ بيدخل القلب من غير استئذان. صوتها فيه حنان وشجن ودفء بيخليك تحس بكل كلمة بتقولها.
نجاة مش بس كانت مطربة دى كانت إحساس ماشى على الأرض، كل أغنية ليها بتحكى حكاية وكل كلمة بتغنيها بتسيب علامة.
ومن أكتر الأغانى الليّ بتفرح القلب وتخلى الواحد يبتسم، أغنيتها حمدالله على السلامة يا أبو أجمل ابتسامة الليّ اتحفرت فى قلوب الناس وبقت من الأغانى اللى دايماً بنحب نسمعها وقت الفرح و رجوع الأحبة من السفر.. من وهى طفلة نجاة كان باين عليها موهبة مش عادية لدرجة إن أهلها نفسهم شجعوها تغنى وهى لسة صغيرة جداً.
محمد عبد الوهاب كان أول واحد يلاحظ موهبتها وشاف فيها مشروع نجمة كبيرة، وسماها «الصغيرة» عشان يفرقها عن مطربة تانية كانت اسمها نجاة برضه ومن هنا بدأت رحلتها الطويلة مع الغنا.
طول مشوارها غنت نجاة أغانى بقت علامات فى تاريخ الغناء العربى.
اللى بيميز نجاة عن غيرها إنها مكانتش بتغنى بس، هى كانت بتعيش كل كلمة وده اللى خلى الناس تحس إنها بتغنى ليهم هما شخصياً.
أما أغنية «حمدالله على السلامة» فهى من أكثر ما أحب لها لأنها فرحة طالعة من القلب.
الأغنية دى مختلفة تماماً عن باقى أغانيها علشان فيها بهجة وسعادة وكلمات بسيطة بس مليانة دفء.
أول ما تسمعها بتحس إنك واقف فى استقبال حبيب أو قريب غايب عنك بقاله كتير ورجع لك أخيراً.
كلامها سهل وبيدخل القلب وجملة حمدالله على السلامة هى جملة تقليدية بنقولها كل يوم بس نجاة خلتها أغنية كاملة.
وعند إضافة «يا أبو أجمل ابتسامة» بتخليها تعبر عن الحب الكبير والفرحة اللى متشالة فى القلب.
اللحن كله طاقة وخفيف وسريع وفيه روح الفرح ونجاة غنّته بخفة دم حلوة جداً مكناش متعودين عليها منها فى باقى أغانيها.
الأغنية بتمثل عادة مصرية وعربية أصيلة وهى أننا نستقبل حبايبنا بالحب والترحاب ونفرح برجوعهم كأنها مناسبة خاصة ونجاة قدرت توصل الإحساس ده بصوتها فبقت الأغنية دى من تراثنا الجميل.
ومع أداء نجاة الناعم والهادى والدافئ بالإضافة إن صوتها الليّ مش شبه حد، وغناءها المتدلع الخجول فى هذه الأغنية جعلتنا نحفظها بلحنها وكلاماتها بالشكل الليّ بتقوله نجاة الصغيرة بالضبط.
ونردد وراء نجاة لكل حبايبنا الليّ رجعوا:
حمدالله عالسلامة يابو أجمل ابتسامة
ياما دقيت فى بعدك على باب الصبر ياما
ياما استنيت وحيدة وأنت فى بلاد بعيد
ما توصلهاش ملامة
قرب قرب قرب يا قلبى يا متغرب
وطير عليك وحوم وطير الهموم
عطش السنين بحالو ترويه أنت فى يوم
جانا القمر الليلة وسهرنا عشانه ياما
حمدالله عالسلامة