جوزك على ما تعوديه.. يا أطبطب وأدلع يا يقول لى أنا اتغيرت عليه

دايمًا بيكون مطلوب من الستات إنهم يهتموا ويدلعوا فى العلاقة، ده شىء مفهوم جدًا ومطلوب جدًا بالنسبة للرجل.
لكن ساعات كتيرة بتكون الست معندهاش القدرة لا على الدلع ولا على الاهتمام، أنا هنا مش قصدى فى العموم أنا بتكلم فى وقت قصير يعنى مش العادى ولا الطبيعى إنها متكونش قادرة. بس ساعات بتحصل.
ده نتيجة لحاجات كتيرة ممكن الضغوطات اليومية أو حتى التعب أو إنها مش قادرة على ده.
وساعتها بيزعل جدًا وبيشوف إنه مش متقدر فى بيته وإن زوجته مش بتهتم بيه وبيكون يوم كئيب على البيت.
ودى فعلا مش الحقيقة، ودايمًا بيبتدى يقارن حياته فى أول الزواج وبيحس بالتغيير الشديد. آه طبعًا هو الوقت اتغير وكله اتغير بس هيا فى الآخر بنى آدمة وعندها مشاعر وقدرات وخصوصًا لو ده حصل لوقت صغير تعبت فيه أو أهملت شويه بدون قصد، فا عادى حصل خير، مش لازم كل شويه نطبطب وندلع أو نبقى اتغيرنا على رأى الفنانة نانسى عجرم.
لو انت بتدلع وتطبطب كل وقت حتلاقى إنها بتعمل كده لكن طبعًا مش ده اللى بيحصل لأنك بنى آدم وبتتأثر بالظروف، فا عادى ممكن شوية فوق وشوية تحت ورفقًا بينا أيها الرجال.