محيى جابر الشرقاوى

قدم العديد من النجوم دور الطباخ أو هاوى الطبخ فى الدراما المصرية سواء أفلام أو مسلسلات أو مسرحيات - المهنة كانت أحيانًا لها دور مباشر فى القصة وأحيانًا لها علاقة بالسياق الدرامى فى العمل.
من أكتر الأدوار الليّ ظهر فيها حد غاوى طبيخ هو «صغيرة على الحب» لما نور الدمرداش قام بدور «صلاح» محب الطبخ من الطراز الأول.
أما مسلسل بالحجم العائلى الليّ قام ببطولته يحيى الفخرانى فى دور «نادر التركى» وهو الدپلوماسى الليّ ساب وظيفته علشان يحقق حلمه فى مجال الطبخ، ومن شدة حبه للمأكولات الشعبية بمختلف أنواعها قرر أنه يبنى فندق كبير فى مدينة مرسى علم ويقدم فيه أشهى وأحسن الأطعمة بس لما بيسيب وظيفته فى السلك الدپلوماسى بيحصل خلافات بينه وبين زوجته تؤدى إلى الانفصال بينهم وبيحصل تفكك كبير فى عيلته.
أما فيلم طباخ الريس فده بتدور أحداثه من خلال «متولى» الليّ قام بدوره طلعت زكريا وهو طباخ شعبى فى حى السيدة عائشة بيعيش حياة صعبة فى بيت عيلة مراته وفى يوم وليلة حياته بتتغير لما رئيس الجمهورية بيكون أحد ضيوفه وبعدها بيعجب الرئيس بأكله ويتم ترشيح متولى أنه يكون الطباخ الخاص بالرئيس وبيكون قريب منه فبيعرف نبض الشارع ومن خلاله بيتعرف على الجانب الآخر مما يدور خارج محيطه اليومى.
مشهد آخر لا يمكن نسيانه لعادل إمام أو «إبراهيم الطاير» لما كان بيعمل طباخ فى إحدى حلقات مسلسل أحلام الفتى الطائر - عمل ما أسماه يخنى عجب وهو بالفعل عجب العجب وعك غير عادى فى مشهد كوميدى من ألطف ما قدم أى حد فى دور طباخ.
أما موضوع عائلى فده قدم فيه ماجد الكدوانى دور «الشيف إبراهيم المحمدى» وهو راجل فى منتصف العمر بيشتغل شيف ومش بتاع قرارات ولا مسئوليات بعد ما حماه أجبر أن بنته تسيبه وترجع تعيش معاه فى لندن - من ساعتها وهو مبيدخلش فى أى علاقات ولا ناوى يدخل فى أى مسئوليات ولا أعباء اجتماعية.
وبعد 20 سنة يتلقى مكالمة من حماه يقوله أن عنده بنت - سارة.
المسلسل اجتماعى من الطراز الأول وفيه بنشوف الشيف إبراهيم بيتصرف ازاى.
أما واحد من ألطف من قدم دور الطباخ أو الشيف فهو محمد هنيدى فى فيلم فول الصين العظيم فى دور «محيى الشرقاوى» الليّ من عيلة عتيدة فى الإجرام وبتدور الأحداث وينتهى الأمر بمحيى هربان على الصين ومشارك فى مسابقة عالمية للطبخ وبيكسب المسابقة بتقديمه لطبق فول معمول من فول معلب.
قدم محيى الشرقاوى شخصية لطيفة وكوميدية هو وباقى الأبطال وهو فى رأى أكتر واحد عمل دور طباخ ولزق فى دماغنا.. ونظل نتذكر جملته المشهورة: ممكن بس حضرتك تتشائم بعيد عنى عشان عندى ظروف خاصة.