أستاذ حمام

دور المدرس/ة كبير فى الحياة وفى الأفلام، أشهر مدرس كان الراحل نجيب الريحانى فى «غزل البنات» وفيه كان بيمثل أنه مدرس اللغة العربية الفقير فى مدرسة خاصة ومدير المدرسة بيطرده وبعدها بيشتغل المدرس الخصوصى لبنت باشا غنى وبيقع فى حبها، بس هى قلبها متعلق بشاب طمعان فى ثروتها فبيحاول أستاذ حمام طول الأحداث أن يكشف نواياه وينقذها منه.
مدرس تانى شهير فى أفلامنا هو الأستاذ فرجانى فى فيلم «آخر الرجال المحترمين» وفيه جسّد نور الشريف دور مدرس ريفى متمسك بالمبادئ والأخلاق الحميدة وبتحصل له مشكلات كتيرة لما بتّوه منه بنت فى رحلة مدرسية.
أمّا «البيضة والحجر» فقدم فيه أحمد زكى دور مدرس فلسفة بس بلا مبادئ تدفعه الظروف الصعبة أن يمتهن النصب والاحتيال على الناس عن طريق الدجل.
مدرس تانى بلا أخلاق عمله چورچ سيدهم فى «الشقة من حق الزوجة» متمثلاً فى الأستاذ عبدالرحمن المدرس المادى الليّ عايز يحسّن دخله فيدّى دروس خصوصية.
أمّا شخصية زكريا الدرديرى التى قدمها الفنان يوسف عيد فى فيلم «الناظر» صاحب الإفيه الشهير «مدرس رياضيات وفرنساوى لحد ما يجيبوا مدرس فرنساوى» فيها بنشوف الحاجة الليّ مدارس كتير بتعملها وهى عدم التخصص وهو نظام قريب من فكرة مدرس الفصل تقريبًا.
أمّا «رمضان مبروك أبوالعلمين حمودة» رئيس جماعة الخطابة ومدرس أول اللغة العربية فده كان محمد هنيدى فى فيلم بنفس اسمه وقصته أنه مدرس مخضرم بيتنقل من مدرسته الصغيرة إلى واحدة من كبرى مدارس القاهرة وبيتجوز مغنية مشهورة وتتشقلب حياته كلها.
أمّا علام الملوانى فى «مدرسة المشاغبين» فجسّده عبدالله فرغلى وقام بدور مدرس ضعيف الشخصية يتلاعب به الطلاب ومبيعملوش له اعتبار، ومن أشهر إفيهات المسرحية جملة «حبة حبة عليا يا ملوانى» نسبة إلى المدرس سريع الكلام ضعيف الشخصية الليّ كل طلاب المدرسة بيتندروا عليه.
السّتات مثلوا هم كمان دور المُدرسة فى أعمال عديدة نفتكر منها عفت الشربينى فى «مدرسة المشاغبين» وقامت فيه سهير البابلى بدور المُدرسة الليّ بتحاول السيطرة على طلاب المدرسة المستهترين والفاشلين وبتنجح فى تغيير شخصياتهم وكذا واحد من تلاميذها بيحبها وبيبقى عايز يتجوزها. السندريلا قدمت دور المُدرسة اللطيفة القريبة من طالباتها والليّ بيحبوها فى المسلسل الجميل «هو وهى» مع الراحل الأسمر أحمد زكى.
أمّا إيمى سمير غانم فدى قدمت المُدرسة الليّ بتعلم العيال إنجليزى كله غلط بكل ثقة فى نفسها فى دورها فى فيلم «عسل أسود» مع أحمد حلمى لمّا عملت مس ميرڤت وبوظت مخارج الألفاظ للغة بسبب عدم إتقانها للغة الليّ بتدرسها.
المدرس والمُدرسة ظهروا فى السينما وهم بالمثل مؤثرين فى الحياة.. كل واحد فينا مَر عليه مدرس غيّر حياته.. يا ترى مدرسك ده كان اسمه إيه؟.