السيدة تريمين

شخصية خيالية من إنتاج والت ديزنى، وتعتبر أشهر مرات أب عرفتها أجيال كتير لأنها زوجة أبو سندريلا الليّ عذبتها وكانت بتعاملها معاملة وحشة أوى.
كانت بتعمل كده معاها ومركزة مع بناتها أناستازيا ودريزيلا.
الست دى هى النموذج الليّ بيجسد زوجة الأب الشريرة الليّ ممكن تعمل أى حاجة بلا تردد.
تاريخها فى القصة الأصلية هو أنها كانت متزوجة من أبو سندريلا الليّ بدوره كان أرمل (وهى كمان كانت أرملة وعندها بنتين) وكان بيدور على زوجة تكون بمثابة أم لبنته وبالفعل اتجوزوا وكانوا عايشين فى سعادة لحد ما أبو سندريلا مات وظهرت زوجته الجديدة على حقيقتها.
كانت السيدة تريمين بتعامل سندريلا وحش أوى بعد وفاة والدها ومن هنا جاء تعبير «معاملة مرات الأب» الليّ مع الوقت أصبح يشير لناس هم مش مرات أبو حد فعلًا وأصبح التعبير يشير إلى سلوك بشرى وهو أن حد يتغير فى معاملته من الكويس للوحش ويبقى بيعامل الآخرين معاملة مرات الأب أو حد من الأول بيتعامل وحش ومعاملته مثل السيدة تريمين مرات أبو سندريلا.
تجاوز التعبير عبر السنوات والعصور وصف علاقة قرابة وبقى وصف صريح لطريقة معاملة وسلوك بشرى. فى الحياة والدنيا بنشوف معاملة مرات الأب من ناس عديدة: أهل، أقارب، زملاء عمل، أصحاب، إخوات وساعات الأم أو الأب أنفسهم فى أحيان كتير.
التعبير لم يعد يقتصر على زوجة الأب الحيزبونة (وهو تعميم خاطئ جدًا لأن فى زوجات أب أحن وأحسن من الأمهات) - التعبير وسع أوى وبقى أعم وأشمل.
فمثلًا تلاقى الواحد من دول يبقى عايز منك حاجة ويعرف يطلبها وهو بيصوصو وينونو ويبقى كيوت وقمر وأول ما ياخد طلبه يبقى بيتعامل بتناحة وبعدها بشوية تظهر معاملة مرات الأب.
وفى الأسرة الواحدة نلاقى حد من الولاد مفضل عند الأب أو الأم وله مكانة مميزة فيعامل الباقين معاملة مرات الأب.
أو المدير أو المديرة فى أى شغل الليّ بيكون عندهم تيم كبير كان أو صغير بس دايمًا فى حد أو أكتر متميز والباقى ياخدوا وش مرات الأب.
المصالح لها نصيب الأسد فى ظهور وش مرات الأب - بعد ما بتخلص المصلحة تظهر الألوان الحقيقية للناس والنفسيات والقلوب فنصدم كثيرًا من معاملة مرات الأب.
أعتقد بشكل كبير أن صفة السيدة تريمين أنها مرات أبو سندريلا ظالم جدًا - معاملتها الوحشة لسندريلا مش علشان هى مرات أبوها، لأ فى المقام الأول والأخير هى سيدة مش كويسة ولا قلبها نظيف - كونها مرات أبوها ده شىء فرعى، فى الأصل هى إنسانة مش كويسة سواء كانت أمًا أو زوجة أو مرات أب.
ولكن يظل «معاملة مرات الأب» تعبير شائع يصف سلوكًا حتى وإن كان الكثير من مرتات الأب مظاليم.