إسراء تطلب الخلع: «حمايا مريب وبيتحرش بيا وجوزي رافض ياخد موقف»

"تصرفات حمايا معايا مش طبيعية كلها مريبة أحيانا بحس أنه بيتحرش بيا لفظيا بكلام مش كويس، حتى أحيانا بيلمس جسمى على سبيل الهزار أو يمثل أنه مش قصده لكن أنا بحس أنه فعلا بيتعمد يعمل كدا معايا، واتكلمت مع جوزى كتير فى الموضوع دا ومش مصدق وبيقول أنى بكبر الدنيا وهو بيعاملنى زى بنته ولازم أحترم دا، لحد ما اتأكدت فعلا ان حمايا مش كويس معايا وجوزى مش واخد أى رد فعل وكأنه موافق على اللى بيحصل".. نطقت بهذه الكلمات إسراء وهى تقف على أعتاب محكمة الأسرة لرفع دعوى خلع من زوجها بعد عام وشهرين من الزواج مبررة استحالة العشرة معه بعد أن رفض أن يعيشا فى شقة منعزلة عن أهله.
وقالت الزوجة فى مستهل حديثه مع "أهل مصر": "اتجوزت من سنة وشهرين جواز صالونات وكان شرطه أنى أعيش مع أهله ووافقت لما لقيته والدته ست متوفية ومافيش فى البيت غير والده وقررت أعتبره زى والدى وعامله بما يرضي الله عشان ربنا يباركلى فى حياتى، واتجوزت بعد فترة خطوبة استمرت 7 شهور، وطول الفترة دى حمايا كان بيعاملنى معاملة كويسة جدا، وكل طلباتى أوامر حتى فى اتفاقات الجواز مكنش معترض على أى حاجة، وفسرت دا أنه بيعزنى عشان خاطر ابنه لكن للأسف اكتشفت بعد الجواز ان معاملته غريبة معايا بالكلام زى وحشتينى بموت فيكى وكلام كتير من النوع دا".
وتابعت إسراء حديثها: مكنتش مرتاحة من تصرفاته وخاصة لما اتجرأ وبقي يلمسنى، واشكى لجوزى على أساس اننا نعزل من البيت أو يخلى أبوه يلزم حدوده، واتفاجئت أنه بيكذبنى أنا، وبيقول لى نيتك سيئة أبويا ميقصدش حاجة، لكن أنا مقدرتش على اللى والده بيعمله وديما حاسة أنه بيتحرش بيا لفظيا وجسديا ويمثل أنه مش قصده، لحد ما طفح بيا الكيل وقررت أوقفه عند حده، وحصل خلاف بينا وجوزى وقف فى صف والده وشتمنى بأبشع الألفاظ، فرفعت عليه دعوى خلع عشان أكسر عينه ومنتظرة أولى الجلسات.
اقرأ أيضا ميادة فى دعوى الخلع: "مدافعش عني وأخوه بيضربنى.. ويدوب نزل وشه في الأرض"