عندما انتقلت المحاضرات من القاعات إلى اللاب توب: وحدى في السيكشن!

فتح قرار الرئيس عبد الفتاح السيسى بتعليق الدراسة فى الجامعات والمدارس لمدة أسبوعين فرصة كبيرة نحو «التعليم عن بعد»، بعد دخول فيروس كورونا المستجد إلى مصر، رحّب بعض الطلاب بفكرة «الدراسة أونلاين»، ووجدوا فيها توفيرًا للوقت والجهد، والاستماع للمحاضرات فى هدوء بعيدًا عن ضوضاء المدرجات، ما يساعدهم على التركيز وسرعة الاستيعاب، وفى المقابل وجد البعض صعوبات كثيرة فى الدراسة عن بُعد، منها عدم توفر الإنترنت فى منازلهم إضافة لقلة خبراتهم فى التعامل مع وسائل التواصل الاجتماعى، فضلًا عن بعض الكليات العملية تحتاج إلى تطبيق ما تدرسه على أرض الواقع مثل كليات الطب والهندسة.



التخلف عن فتح اللايف «غياب»


الوضع لا يزال مشوشا لدى طلاب شعبة التاريخ بكلية التربية، جامعة الإسكندرية، فبعضهم يجد صعوبة فى التعامل مع الإنترنت، والبعض الآخر لا يمكله فى المنزل.. «هناء محمد» إحدى طالبات الفرقة الثانية بالكلية، تقول: «النت ضعيف جدًا فى مصر ومش مساعدنا ندرس أونلاين، وفى طلبة آخرهم فى النت الفيسبوك والواتساب ومعندهمش القدرة على التعامل مع أى أبلكيشنز تانى زى زوم اللى الدكاترة بتطلع منه لايف، وده كله بالإنجلش».

وأكدت أن هناك كتبا لم يستلمها الطلاب من الكلية حتى الآن، والمحاضرات وحدها لا تكفى للمذاكرة: «مش عارفين نستلم الكتب عشان مانعين الطلبة يدخلوا، وفى دكاترة رافضين يتواصلوا معانا واتساب عشان محدش ياخد رقمهم، وفى دكاترة عملت قناة على يوتيوب بيقروا البور بوينت وبس مش فاهمين حاجة، ومحدش عارف يساعدنا ولا يفهمنا الوضع هيستمر قد إيه، وفى دكتور نزلنا على أبلكيشن كلاس روم تلخيص فصل فى 7 سطور والكتاب الفصل فيها 20 ورقة».

الطالب «محمد سيد» أكد أن هاتفه المحمول ذو إصدار قديم كما أن مساحته لا تستوعب بعض تطبيقات الإنترنت: «بشترى كارت فكة ب3 جنيه عشان أتابع الأخبار على جروب الدفعة وبيخلص ومش بقدر أشوف محاضرات، ومفيش فرصة إنى أدخل واى فاى لإن الظروف المادية متسمحش بكده»، مشيرًا إلى أن الأساتذة يأخذون الغياب والحضور أثناء البث المباشر للمحاضرة: «اللى مش بيحضر اللايف بيتكتب غياب، ولما قولت للدكتور إن مش معايا نت أفتح بكرة قالى عاوزين تغيبوا وأنتوا فى البيت كمان، وفى دكاترة منعرفش هما فين لحد دلوقت».

بدت الأمور مخيفة لدى الطالبة «إسراء فتحى» التى تشعر بضغوط منذ صدور قرار تعليق الدراسة: «مش عارفين هنمتحن إزاى وخايفين نسقط، دافعين فلوس الكتب ومش عارفين نستلمها، كمان مش كلنا ظروفنا الاقتصادية واحدة ولا مستوى تعلمنا، فى ناس بتعرف تستخدم الإنترنت وناس لأ، وكل الدكاترة بيدونا تكليفات وحضور وغياب وضغوط كبيرة علينا، نفسى يخففوا المناهج علينا شوية»، مؤكدة أنها تدرس 7 مواد ولم يلتزم سوى 3 دكاترة فقط بشرح المحاضرات أونلاين.


أعمال السنة أونلاين وأوفلاين


يواجه طلاب الكليات العملية صعوبة فى الدراسة من خلال الإنترنت، حيث يحتاجون إلى الذهاب للمستشفيات والدخول إلى المعامل لتطبيق ما يدرسونه، «سهام أحمد» طالبة بالفرقة السادسة بكلية الطب، جامعة عين شمس، تقول: «بلغونا أننا مهم نلتزم البيت، والمحاضرات بدأت تنزل على يوتيوب أول بأول، سواء المقرر النظرى أو المقرر العملى، كله بينزل على القناة الخاصة بالجامعة».

وأشارت إلى أنهم يتعلمون الفحص فى الجزء العملى وهذا غير متاح: «مبقيناش ننزل مستشفيات لكن المحاضرات منتظمة وموضوع المذاكرة بالنسبة لى مش متوقف على نزول المحاضرات، لأنى بعتمد على تسجيلات الكورسات، فمش بيفرق معايا نزول المحاضرات من عدمها»، موضحة أن الصعوبة تكمن فى فقد الجزء العملى، أما الجزء النظرى فالأمور تبدو فيه جيدة: «عندنا المنهج نصفه نظرى والنصف التانى عملى اللى هو تطبيق النظرى، فكده هما غطوا نصف المطلوب فقط، وكل العملى مؤجل لحد ما هنشوف الوضع هيمشى إزاى».

أما طلاب كلية التمريضة بجامعة عين شمس، فأوضحوا أن الإيميل الذى جاءهم من الجامعة لم يتم تفعيله فى انتظار بدء المحاضرات أونلاين: «الدكاترة حاليًا بيسجلوا المحاضرات ومستنيين، العملى كله متوقف لحد ما ننزل الكلية، لأننا بننزل المستشفى وحاليا فى حالات المستشفى، لسه هيحددوا هننزل ولا لأ، والدراسة أونلاين حاجة كويسة جدًا بالنسبة لينا والدكاترة معانا لو احتجنا أى حاجة على الواتس والفيس وده هيوفر لينا وقت مجهود وهيقلل العدوى خصوصًا إننا بنتعامل مع مرضى كتير».

أما عن كيفية تلقى المحاضرات فأكد بعض الأساتذة أنه سيتم توفير تحميلها للطلبة بدون إنترنت: «الوضع غريب وفى حاجات كتيرة مش فاهمينها بس بنحاول نتعامل فى المتاح عشان الدراسة متقعش مننا».

وبدأ الطلاب فى التسجيل من خلال الأيميل الرسمى الذى أرسلته الجامعة، لكنهم واجهوا صعوبات شديدة فى التعامل: «بعد ما بنسجل بالإيميل فى خطوات كتيرة بنعملها ومعظم الطلبة مش عارفين يشتغلوا على ده لإنهم مش مظبطينه صح والمشكلة من عندهم، كمان الموضوع جديد على الدكاترة، اللينكات بايظة وفى محاضرات نزلت من غير صوت ومشاكل كتيرة جدًا»، وفيما يخص أعمال السنة أعلن بعض الأساتذة بالكلية أنها ستكون من خلال «الأونلاين والأوفلاين».

السكاشن من خلال «زوم»

فى كلية الاقتصاد المنزلى بجامعة حلون، بدت طرق تقديم المحاضرات متباينة، حيث اعتمد بعض الدكاترة على الواتساب، وآخرون على الفيسبوك، أما السكاشن فيتم شرحها من خلال بث مباشر على تطبيق زوم: «فى دكاترة بعتوا لينا واتس ودكاترة فضلوا جروب على فيس بوك لأن عددنا كبير جدًا، وكل المواد العملية الدكاترة هتطلع لينا لايف من خلال ابلكيشن زوم، وفى مواد التصميم الدكتور بتابع معانا الشغل وهنبعته ليها وهى هتقيم»، يرى بعض الطلاب أن الفرق بين التعليم المباشر والتعليم عن بُعد أنهم لن يكونوا فى حاجة إلى الاستماع إلى الفيديوهات والتسجيلات الصوتيه فى وقت محدد، لكن الذهاب إلى الجامعة كان يجبرهم على الاستماع للمحاضرة وتسجيل الملاحظات التى يشير إليها الدكتور: «نتمنى إن ده يكون حاجة يتعلموا منها مستقبلاً ويخلوا دايماً فى بديل إلكترونى للمحاضرات وطرق واضحة وصريحة للطالب والمُحاضر تنفع لوقت زى ده أو لأى أزمة مستقبلًا».

لم يختلف الوضع كثيرًا لدى أطفال «كى جى» حيث تقوم المُدرسة الخاصة بكل فصل بإرسال الفيديوهات التى تشرح فيها على الواتساب، «نادية مبروك» إحدى أولياء الأمور، تقول: «الفيديوهات بتبقى تنشيط للذاكرة عشان الأطفال متنساش خلال الأجازة، لأن بنتى بتدرس إنجليزى وماث وساينس، والسيدلينج بس اللى بتنزل على جروب الدفعة كلها، وفيه دروس خاصة بالنظافة الشخصية».

أما طلاب كلية الإعلام، جامعة الأزهر فكان بهم نصيب من التعليم «أونلاين»، الطالبة «منة الله محمود» بالفرقة الثالثة، تقول: «بدأنا من كام يوم وأول دكتور بعت فيديو على الواتساب وكان معاه الكتاب، قرأ لينا الترجمة وقالنا على العملى وقال بعدها هيتابع معانا صوت مش فيديو، المشكلة إننا مستلمناش الكتب وكده الدراسة هتبقى شفهية وأنا بحتاج حاجة قدامى أذاكر منها عشان استوعب كويس».

وفيما يخص التكليفات العملية الخاصة بقسم إعلام بكلية الآداب، جامعة عين شمس، أعلن بعض الدكاترة أنه أى تكليفات تتطلب الاحتكاك بتجمعات خارج المنزل يتم الاستغناء عنها، أما تكليفات التصوير الفوتوغرافى سيتم تنفيذه بكادرات داخل المنزل، كما أن الامتحان الخاص بالمواد سيعتمد بشكل أساسى على المادة النظرية بالكتاب وما سبق من محاضرات.


هندسة: لا أخبار عن المشاريع والتكليفات

مازالت الأمور مبهمة لدى طلاب كلية الهندسة، جامعة حلوان، حيث أن طلاب الفرقة الثانية، قسم مدنى لم يتلقوا أى محاضرات، كما أنه تم تحديد موعيد محاضرة واحدة فقط: «باقى الدكاترة محدش فيهم بلغنا بحاجة، وممكن يكتفوا بإنهم ينزلوا المواد ونعتمد على الدراسة الذاتيه، لكن لحد دلوقتى مفيش أى أخبار من الدكاترة سواء على المشاريع العملى أو التكليفات أو الميد تيرم اللى معاده فات».

الدكتور خالد عبد الغفار، وزير التعليم العالى بعت برسالة إلى طلاب الجامعات عبر الصفحة الرسمية للمجلس الأعلى للجامعات قال فيها إن الظرف الذى تمر به الدولة يعد ظرفا استثنائيا، ويتم العمل بخطوات سريعة لصالح المواطن وصحته، موضحا أن المجلس، سيجتمع اليوم السبت، بحضور رؤساء الجامعات الحكومية، لدراسة العديد من الحلول الخاصة بالعملية التعليمية خلال الفترة المقبلة ومناقشة تطبيق خطة التعليم عن بعد، بعد قرار تعليق الدراسة.

وأكد عبد الغفار، أنه بالنسبة لامتحانات الميدتيرم بالجامعات، وقرارات الإلغاء والتأجيل بالجامعات، سيكون التعامل معها بأكثر من حل، قائلا: «لو كانت هناك مساحة مناسبة من الوقت قبل موعد امتحانات نهاية العام ستعقد امتحانات الميدتيرم، أما لو طالت فترة تعليق المحاضرات فسيتم اتخاذ قرارات لمصلحة الطالب مثل إلغاء الامتحان وضم درجته لامتحان آخر العام».