لا تنسوا الفضل بينكم

قبل شهور، افتتح الرئيس عبدالفتاح السيسى المرحلة الأولى لمصنع «سايلو فوودز» للصناعات الغذائية بمدينة السادات فى محافظة المنوفية. والخميس الماضى وبحضور عدد من وزراء الحكومة والمسئولين عن المصنع.. افتتح الرئيس المرحلة الثانية من المدينة الصناعية العملاقة حيث بدأت الفعاليات بتلاوة آيات من الذكر الحكيم للقارئ الشيخ شريف السيد خليل.

وشهد الرئيس عرض فيلم تسجيلى عن المرحلة الثانية من المدينة الصناعية، استعرض المكونات الجديدة للمدينة مثل مصنع الألبان ومشتقاته المختلفة ومصنع البسكويت وغيرهما، وجهود المدينة فى توفير الاحتياجات من الأغذية المختلفة.
وشدد الرئيس، على الاستعداد الكامل لجهاز الخدمة الوطنية للشراكة مع القطاع الخاص، مؤكدًا أن الدولة لديها استعداد تام للشراكة مع القطاع الخاص بكل مؤسسات وشركات القطاع العام، معلقًا: «الأمر ده متاح وأنا بقوله مرة واتنين وبأكده علشان يصل لكل الناس.. واللى بيسمعونا من القطاع الخاص وعنده استعداد إنه يخش فى شراكة مع الدولة»..
وأضاف الرئيس موجهًا حديثه للدكتور مصطفى مدبولى رئيس الوزراء قائلًا: احنا منزلين شركتين للأطروحات فى البورصة ومستعدين ننزل كل الشركات.. وقلت الكلام ده يمكن من سنة ونصف أو سنتين.. ومش بس كده، احنا مستعدين للشراكة.. الجهاز هنا مستعد للشراكة.. طب ليه؟.. لأن الهدف من الموضوع إنه يتحقق يادكتور مصطفى.. لما اتكلمنا عن الوجبات المدرسية كان العدد المستهدف معين ولما اشتغلنا زدنا 2 مليون.
الرئيس يطلع على إنتاج مصانع المدينة الصناعية بالسادات


وقال الرئيس، لما قلنا عايزين نعمل تغذية مدرسية مستقرة ومؤمنة.. ومفيش مشكلة فى الكلام اللى كان قبل كده.. .. بنحاول تكون عناصر التغذية مناسبة لسن الطلبة وعاوزين نحسن مش البسكويت بس.. ولكن كل حاجة.
إذا كنا عاوزين نحقق توازن فى أسعار المنتجات الغذائية لكل المواطنين محتاجين يكون عندنا عدد أكبر من الكمية المطروحة.. والمنتجات تبقى طبقا لمواصفات ومعايير الصحة العالمية وهيئة سلامة الغذاء.. ولا يمكن إقرار أى شركة والتعاقد معها إلا إذا تم إقرارها من هيئة سلامة الغذاء.
ووجه الرئيس، رسالة طمأنة للمصريين، حول استقرار المخزون الاستراتيجى للسلع مدة 6 أشهر، رغم الأعباء المالية الكبيرة..قائلا: مش عاوزين نتكلم فى موضوع الأكل كتير فى التليفزيون.. ميصحش.. الحاجة موجودة واحنا شفافين جدا معاكم وصادقين جدا وبنقولكم كل حاجة.. موسم القمح والرز والبنجر والقصب ده معناه حتى لو إنت شايف 4.5 شهور للقمح ده معناه أن الإنتاج القادم ده بيسلم ده ومحافظين على 6 شهور.. رغم ان ده بيكلفنا أعباء مالية.. ومعناه حجز فلوس لمدة 6 شهور.. يعنى بشترى وأحطهم فى المخازن.. ده اللى احنا بنعمله وتكلفة كبيرة جدا فى ظل اللى بيحصل فى العالم كله.. لكن لا بأس مستمرين على موقفنا رغم الظروف الاقتصادية الصعبة اللى بتقابلنا..
مناطق لوجستية
وأشار الرئيس إلى أن مصر تستورد 2.5 مليون طن زيت طعام، وهذا الرقم يمثل نسبة 90 % من حجم احتياجات الدولة، موضحًا: «بنستورد 2.5 مليون طن زيت وده أكتر من 90 % من احتياجاتنا وشغالين فى خطة لزراعة 52 ألف فدان فول صويا.. والعام القادم 500 ألف فدان فول صويا لزيادة حجم إنتاج الزيت من فول الصويا.. وعلشان الفلاح المصرى يستفيد بدل ما بنشتريه من بره.
وأضاف الرئيس خلال افتتاح مصنع «سايلو فوودز» للصناعات الغذائية بمدينة السادات: «متنسوش أن البلد خلال 40 سنة زادت بنسبة كبيرة جدا.. وكمان الدولة مقدرتش تعمل خطط وتنفذها تجابه بها هذا النمو الكبير»..
كما طمأن الرئيس، جمع المصريين، بتوافر السلع قائلًا: أطمئن الجميع بأن السلع موجودة ومفيش فيها مشكلة، والأزمة اللى مرت علينا خلال 4 شهور إن شاء الله متجيش تانى ، ونكمل طريقنا بشكل أفضل مما كنا عليه.
وأضاف الرئيس خلال افتتاح مصنع «سايلو فوودز» للصناعات الغذائية بمدينة السادات، قائلًا: بس الدكتور على مصيلحى مش قادر يسيطر على الأسواق وده كلام مهم يا دكتور على، والبرلمان كلموك فى الموضوع ده، وده كلام مهم صحيح بس عاوز أقولكم النهاردة بيتكلم عنده هو ، تبعه هو 30 ألف منفذ غير منافذ القوات المسلحة ووزارة الداخلية يخش فى 40 ألف منفذ ده علشان يحاول يخفف من حجم الأزمة الكبيرة اللى بنتكلم فيها على مستوى العالم.

الرئيس فى جولة تفقدية لمصانع سايلو فوودز

وواصل الرئيس: «لو تصورتوا كدولة سواء التموين أو الداخلية تقدر تقوم بدور وتسيطر على ده، ده صعب.. لكن احنا كمواطنين لو لقيت المحل ده غالى متشتريش منه ونبقى ادناهم الدرس طالما بتغلى فى أسعارك أكتر من غيرك بلاش منها خالص مع جهد الرقابة فى التموين ووزارة الداخلية»..
ومازح الرئيس الداخلية قائلا: «مش مستريح كل يوم وزارة الداخلية تطلع مسكنا ومسكنا، بطلع شكلنا وحش قوى، كل يوم فى النشرة يقولك مسكنا ما عرفش كام واحد، ما تمسكهم وخلاص».
كما تحدث الرئيس، عن المناطق اللوجيستية بالموانئ المصرية، قائلا: بنشجع المستثمرين لو عاوزين يعملوا مناطق لوجيستية فى الموانئ الرئيسية والهيئة الاقتصادية لقناة السويس، مستعدين علشان تبقى مصر فى موقعها تقدر تستفيد إنها تكون منطقة لوجيستية فى المنطقة والعالم كله.. ماشيين فى ده وبنحاول نقلل الفجوات التى نجمت عن نمو السكان خلال السنين الماضية، وما حصلش نمو مماثل ليه فى الدولة..
وأضاف: «هقول نقطة مهمة.. كتير من النقاش اللى بيدور كانت أولويات الدولة، وكان المفروض تتغير للصناعة بس، وده كلام صحيح، بس أنا كانت الأمور محتاجة جهد فى كل المحاور، يعنى ما كنتش أعمل وأسيب البلد كخطة تجمد كل شىء تانى أكتر ما هو متأخر، وأقول طيب خلونا نطور فى الصناعة لأن العائد بتاعها أكتر، ده كلام صحيح ومظبوط، بس أنا ما اقدرش أعمل ده وأسيب باقى القطاعات اللى فيها مشكلة.. مثلا قطاع الرى، ده قطاع مهم قوى، طيب لما أعمله هو فيه عائد مباشر كتشغيل صناعة أو كلام من هذا القبيل أبدا ما فيش .. كلها عبارة عن خدمات ومافيش عوائد مباشرة أو أنتج حاجة بشتريها من بره أو أصدرها، وكان لا بد أن نتحرك فى كل المجالات فى وقت واحد، حتى لو كان عوائدها مش هتبان دلوقتى.. عقبال المصنع لما يتعمل هنفتتح خلال الشهر اللى جاى مجمع الأسمدة الآزوتية، بتكلم واحنا فى منتهى الضغط علشان يخلص فى سنتين ونصف أو 3 سنوات، طيب بيشغل كام واحد؟».
وقال الرئيس: لما يكون عندك فجوة 30 مليار دولار علشان توفره بصناعات، عاوز تعمل شغل مش أقل من 100 مليار دولار، وده عايز مدة زمنية من 5 إلى 7 سنوات.. طيب هل الدولة هى اللى تقدر تعمل ده؟ والقطاع الخاص؟. طيب فيه تشجيع آه طبعا.. أومال احنا قولنا الرخصة الذهبية ليه.. واحنا مستعدين أكتر بيجى أى مستثمرين محليين من مصر أو من الخارج واحنا نيسر لهم بالاتصال المباشر مع دولة رئيس الوزراء ومعايا.. وده جزء من الواقع اللى احنا عايزين نغيره و نحسنه أكتر من كده.
الاعتدال والتوازن
وأكد الرئيس، أن سياسة مصر تتسم بالاعتدال والتوازن والانظباط الشديد تجاه الجميع فى الداخل والخارج ، مضيفًا: «عاوز أقول بتابع مواقع التواصل وبشوف إنه ساعات حماس زيادة أو حتى أقول تجاوزات فى الكلام مش بتكلم عن موضوعات محلية بتكلم عن موضوعات خاصة بعلاقتنا مع أشقائنا وده أمر ننتبه إليه كويس.
وتابع، أرجو إننا نخلى بالنا بتعكس مدى فهمنا ومدى تقديرنا للعلاقات مع الأشقاء وبالتالى لما يبقى فيه موضوع يتم تداوله بدون أساس وملوش خلفية بنقعد ونتكلم.. أمور قد لا يكون لها أساس من الصحة طيب ليه؟.. هنمشى وراء بعض المواقع المغرضة اللى عاوزة تعمل فتنة بينا وبين الأشقاء أقل حاجة نعملها نسكت إن مكناش نقول كلام طيب نسكت.. حتى وسائل إعلامنا اللى احنا مش بنتدخل فيها..احنا مش بنكتب إلا دايما لصالح تحسين ودعم العلاقات مش العكس.. علاقتنا طيبة بالجميع وده منهج ماشيين بيه مش النهاردة ومنذ توليت المسئولية ده مسار بننتهجه كدولة حتى فى الأزمات والخلافات الكبيرة.
وتابع الرئيس، ميصحش نسىء لأشقائنا ومننساش وقفة أشقائنا معانا.. يعنى لو فيه أزمة أنا أطول لسانى وأقول كلام مش مظبوط ده كلام لا يليق أبدا ..فين لا تنسوا الفضل بينكم.. لما نعمل كده كمواقع تواصل أو حتى بعض المقالات اللى بشوفها مع أشقائنا فى المملكة العربية السعودية أو أى دولة أخرى.. لا لا إحنا حريصين وده توجه دولة وأرجو كمواطنين ننتبه إن احنا لا ننساق وراء مواقع تريد الفتنة بيننا .. إحنا علاقتنا طيبة بالجميع وحتى فى أصعب الظروف.. ومش عاوز أقول أسماء دول لأن الأمور كلها تجاوزناها وكنت عارف كده ولو كان فيه خلاف مع دولة شقيقة خلال السنين اللى فاتت، كنت عارف إننا هنتجاوزها، حتى الأزمة مع إثيوبيا فى سد النهضة بتلاحظوا إننا مابنقولش كلمة واحدة أو تصرف واحد يسىء.

الرئيس يستمع إلى شرح حول طبيعة العمل فى سايلو فوودز

وأكمل الرئيس: إن مكناش نقول حاجة جيدة منقولش.. ان مكناش نقول حاجة تبنى منهدش أرجو ناخد بالنا قوى وأرجو من مواقع التواصل.. وساعات بلاقى بعض الزملاء فى الإعلام لو فيه خط وتصريح هنقوله كدولة بشكل رسمى ولو مقولناش ده يبقى الأمور ماشية طيبة..طيب يبقى نبنى ونسىء ولا نحسن ونخلى بالنا يعنى.
وقدم اللواء تيمور موسى أبو المجد رئيس مجلس إدارة شركة سايلو فوودز، نسخة من المصحف الشريف هدية إلى الرئيس عبد الفتاح السيسى، كما أجرى الرئيس جولة تفقدية داخل مصانع «سايلو فوودز».
وتقع «سايلوفوودز» فى مدينة السادات بإجمالى مساحة تبلغ 346 ألف متر مربع، تشمل عددًا من المصانع على أحدث طراز يستخدم فيها أحدث التقنيات والمنشآت الصناعية عالية التقنية، كما تضم مساحة واسعة للتخزين والتى يتم إدارتها بمنظومات عالمية هى الأكثر تطورًا من كبار الموردين الدوليين، وتشمل أيضا 14 صومعة للحبوب، ومجمع طباعة شاملًا لتغليف المنتجات الصديقة للبيئة لضمان تلبية متطلبات كل مستهلك لمنتجات صحية وعالية الجودة وآمنة.