إحنا قد التحدى

اسمعوا مننا مش علشان إحنا أصدق من غيرنا.. لكن إحنا مدركين لحجم التحدى أكثر من غيرنا

تنفيذا لتوجيهات الرئيس عبدالفتاح السيسى، لعب التحالف الوطنى للعمل الأهلى التنموى دورا مهما فى مساندة جهود الحكومة فى دعم الفئات المستهدفة من المواطنين والأكثر احتياجا بتقديم جميع أشكال المساعدات الاجتماعية المختلفة للأيتام والأرامل والمقبلات على الزواج فضلا على مشروعات التمكين الاقتصادى، لتخفيف العبء عليهم ومواجهة حدة الآثار السلبية للأزمة الاقتصادية العالمية، والمساهمة فى تحقيق أهداف التنمية المستدامة فى جميع المجالات وتوطينها بأجهزة الدولة المصرية المختلفة بما يتماشى مع رؤية مصر 2030.
وحضر الرئيس عبدالفتاح السيسى المؤتمر الأول للتحالف الوطنى للعمل الأهلى التنموى، الذى بدأت فعالياته بعرض فيلم تسجيلى عن أعمال التحالف وجهوده التنموية.
وخلال كلمته وجه الرئيس الشكر إلى النماذج المستفيدة من مبادرة «التمكين الاقتصادى» للتحالف الوطنى للعمل الأهلى التنموى، قائلا: لازم أشكركم وأحييكم.. ربنا يوفقكم.. وأنا سعيد.. انتوا نماذج ضمن عدد كبير من مصريات ومصريين شغالين فى إطار الاستفادة من مبادرة التمكين الاقتصادى، بشكركم علشان النجاح.. وبقيتوا مثال ونموذج للناس اللى زيكم بيشتغلوا وبيشوفوا الأمل ويبقى حاجة تفرحنا كلنا وتسعدنا.. أنا بوجه لكم الشكر كلكم، وأتمنى لكم التفوق وأتمنى للجميع التوفيق».


كما شكر الرئيس جمعيات المجتمع الأهلى العاملة داخل مصر، قائلا: أوجه التحية والتقدير للجمعيات الأهلية.. ومش اللى جوه التحالف بس.. كل الكيانات التى تعمل فى العمل الخيرى .. أوجه لها الشكر والتقدير باسمى واسم المصريين.. وده دور إحنا محتاجينه.
وتابع الرئيس: النهارده لما بيكون فى مؤسسة مجتمع مدنى بتشتغل، بتقوم بدور، الحكومة مش هتقدر تقوم به بنفس الكفاءة والاحتراف.. وأنا بتكلم بمنتهى الصراحة يا دكتور مصطفى.. «رئيس الوزراء» وإحنا بنعترف بكده ومحتاجينه.. إحنا بنتكلم فى أكتر من 50 ألف جمعية موجودة عندنا فى مصر.. لكن أنا بتكلم تحديدا النهارده على كيانات التحالف، وبقول نحتاج المزيد من الكيانات الأخرى تنضم.. لأن الدور المجمع، المحشود والمنسق بشكل جيد نتائجه زى ما إحنا شوفناها فى العروض السابقة التى تم عرضها، سواء على المستوى الاقتصادى أو الصحى أو المستويات الأخرى الاجتماعيه التى تتم .. الجهد المنسق ده واضح جدا خلال السنة دى.
ودعا الرئيس، المساهمين فى التحالف الوطنى إلى مضاعفة الجهود خلال العام الجارى 2023، قائلا: «كنا بنقول عام 2022 إنه عام المجتمع المدنى، بس بصراحة ظروف 2023 يمكن تكون محتاجة مننا.. إن إحنا نبذل جهد أكتر من 2022، لأن الأزمة اللى بنتكلم عليها أزمة كبيرة قوى ولها تداعيات على العالم كله، ولها تأثير كبير، وبالتالى إذا كانت منظمات المجتمع المدنى أشتغلت أو كيان التحالف أشتغل بهمة وضغط كبير خلال 2022.. أنا أتصور أن هذا الجهد يحتاج أن يتضاعف خلال 2023.
تمكين اقتصادى
وأضاف الرئيس أن التحالف الوطنى للعمل الأهلى: سيقدم 14 مليار جنيه، وأدعو الجميع للمساهمة أكتر، وإحنا من جانبنا كحكومة أو صندوق تحيا مصر وباقى الصناديق نكمل الرقم أكتر من كده.. مش عاوز أقول رقم محدد علشان المساهمين يزودوا والحكومة تبذل جهد معانا.


ووجه الرئيس حديثه للحاجة رضا، إحدى المستفيدات من مبادرة «التمكين الاقتصادى» قائلا: لما نلاقى حد زى الحاجه رضا كده، نخليها تمسك مزرعة لوحدها مش فدان ولا اتنين.. ربنا يوفقك.. والستات فى مصر.. ستات جدعات.
وتابع: نحتاج فى 2023 مزيد من الجهد الأهلى لأن الظروف صعبة .. وبتكلم بمنتتهى الصراحة.. وده ومش معناه أن الحكومة والدولة مش هتقوم بدورها فى هذا الموضوع، لكن عاوز أقول إن الظرف صعب جدا.. وأنا شايف حتى الناس لما بتتكلم مش بيخوفوا بعض. لكن يعنى كلام مش متنظم وكلام مش مترتب.. وكلام ناس متعرفش حاجة.
وطمأن الرئيس، المواطنين على أوضاع الدولة المصرية وطالبهم عدم الالتفات للشائعات، قائلًا: يا جماعة اسمعوا مننا مش علشان إحنا أصدق من غيرنا.. ولكن إحنا مدركين لحجم التحدى أكثر من غيرنا، والبيانات والأرقام وحتى الحلول بتبقى مطروحة من الدولة، وبالتالى أى اجتهاد من الآخرين مش مكروه ومش مرفوض ولكن بيعمل بلبلة ويزعج الناس.
أكمل إن الظروف الموجودة فى العالم تضغط على الأوضاع داخل الدول، وبالتالى هذا يضغط على الناس، متابعا: «لو أنا النهارده خوفتكم النتيجة إيه؟ هل لمصلحتكم.. لأ، هل إحنا مانقدرش كدولة وكشعب نصمد قدام أى تحدى ولا إيه؟!.. الكلام ده انا قلته فى الكاتدرائية. ووجه الرئيس حديثه للمصريين، قائلا: لو مصر ظروفها صعبة هنتخلى عنها؟ أنا بكلمكم كلكم.. ولو ظروف مصر صعبة أهل مصر هيتخلوا عنها؟ هو إحنا دخلنا حروب وضيعنا فيها أموال مصر.. هو إحنا دخلنا مغامرات ضيعنا فيها أموال مصر؟ .. ياجماعة دى الظروف صعبه جدا على الدنيا كلها.. الحرب دى مش بتاعتنا والأزمة مش بتاعتنا.. ولكن مصر بتدفع ثمن زى كل دول العالم.. مختتما حديثه مداعبا المواطنين ضاحكا بالقول: «بطلوا هرى بقى».


وشهدت فعاليات المؤتمر الأول للتحالف الوطنى للعمل الأهلى التنموى، عرض فيلم تسجيلى عن دعم الزراعة وأهميتها ضمن جهود التحالف الوطنى، مثل مبادرة «إزرع» حيث وجه الرئيس، التحالف بزيادة الاهتمام بكل المزارعين فى مصر، قائلا: «الفدان كان بيجيب 12 و14 أردب قمح ودلوقتى 20 و22 مع 150 ألف فدان دى حاجة محترمة جدا وقيمة كبيرة جدا.. فى المجموع الكبير ممكن يكون أكتر من كده.. والنهاردة وإحنا بنتكلم قلنا هنبقى مع بعض دايما .. ومستعدين نتعاون مع الزراعة أكتر.
وأضاف: أنا هكلمكم على تجربة أخرى ..أنتم قلتم بنوفر فى نتيجه اللى بنعمله، أن إحنا بنوفر فى المياه والإنتاج يبقى كويس والهدر يقل وحتى السلاسل تقل.. النهارده لما تاخدى حاجتك تديها للجمعية على طول بثمن ما فيش وسطاء كتير.. ده للمزارع اللى بيزرع فدان وفدان ونصف محتاج أكتر هو محتاج لكل قرش.. مشيدا بمبادرات التحالف بقوله: «كل المبادرات اللى بتتكلموا فيها كله زى الفل ومحل تقدير ودعم مننا لكن الزراعة مهمة جدًا».
وتابع: «إحنا بنزرع فى أسوان وسوهاج والصعيد جزء من 300 ، 350 ألف فدان من القصب، التحالف يستهدف صغار المزارعين، لكن أنا استهدف قدراتكم فى الوصول إلى المزارعين كلهم.. وزارة الزراعة فيها موظفين ما يقدروش يعملوا اللى انتوا بتعملوه.. طيب لو اتعمل فدان قصب بزراعة حديثة يقلل كمية المياه 10 % من كمية المياه المستخدمة فى 350 ألف فدان ده رقم كبير قوى .. طب لو قلت لى بيزود الانتاجية 40 % وبتكلم على كتلة محددة فى الصعيد لو استهدفتوا وقدرتوا توصلوا بالتعاون مع وزارة الزراعة.. لأن بالمناسبة المزارع اللى بيزرع.. بيسيب الحاجة فى الأرض 5 سنين.. فطبعا صعب عليه.. وانا اتكلمت فى الموضوع ده قبل كده».
مبادرة ازرع
وواصل الرئيس: «كل موضوع بنتكلم فيه، بيبقى المستهدف منه إننا نشاور عليه، نعمل إضاءة ونقول للناس بصوا وما متستقلش بفدان القصب بتاعك متستقلش بفدان فول الصويا اللى بتعمله متستقلش بشوية التقاوى اللى حولك الفدان بتاعك من 10 أردب إلى 22 أردب ما تستقلش بده، وخاصة لو الكلام هايتعمل بشكل عام جمعى.. وهيستفيد منه كتلة مزارعين فى مجال واحد مش مزارع ولا اتنين.. وبتكلم على القصب تحديدا لاننا لو نجحنا فى ده بالتعاون مع وزارة الزراعة والرى.. وإحنا محتاجين نتعاون معاكم فى المجال ده وفى كل المجالات.
وأكمل: «لما اتكلمت على رؤوس الماشية قبل كده، فى اخت قالت أنا بنتج 25 كيلو لبن غيرها بيطلع 7 كيلو.. لما اتكلمت كنت بتكلم على أن إحنا نستهدف بحلم.. يعنى حد يقول انك انت عايز مليون رأس ماشية.. حد يقول ده برنامج ياخد 10 أو 15 سنة.. بيكم ومع بعضنا المدة تقل.
وأضاف: استمروا واستهدفوا أكبر حجم وإحنا معاكم.. لو عندى فدان قصب كان بيجيب 40 طنا وجاب 50 أو 60.. محتاجين نشتغل مع بعض علشان خاطر بلدنا وسعداء باللى انتوا حققتوه وبشكر كل مزارعين مصر..
ورحب الرئيس، بالمذيعة مريم حسن الفائزة فى برنامج اكتشاف المواهب «الدوم»، والتى قدمت مؤتمر التحالف الوطنى للعمل الأهلى التنموى، قائلا: «مش هنسى ارحب بيكى وبسنك الصغير والموهبة دى».
وأضاف أنا عايز أقول من خلالك.. اتكلمنا أنه فى مصر كل اللى إحنا بنتمناه.. إحنا محتاجين نوصل له، وفيه مبادرات وآليات لو عاوزين نجيب حد بيلعب كرة قدم هنلاقى.. أو موهوب وبيقول شعر عظيم هنلاقى.. أو بيكتب روايات عظيمة هنلاقى.. وكل حاجة موجودة فى ال 104 ملايين.. ومريم مثال لده.
وكرم الرئيس، على هامش مؤتمر التحالف الوطنى للعمل الأهلى، عددا من الشخصيات المؤثرة فى العمل الأهلى والتنموى، وعلى رأسهم اسم الراحلة أنيسة حسونة، إحدى أيقونات العمل التطوعى والخيرى فى مصر، وتسلم التكريم نيابة عنها زوجها شريف ناجى.