كوربيت مواطن إنجليزى عادى كان ماشى فى جنينة عامة ب يدور على كابينة تليفون زى ميناتل كدا اتصل ب أخوه علشان يعرف إذا كانت مراته ولدت ولا لسه «مرات الأخ مش مرات كوربيت» نسيت أقول لك إن كوربيت دا كان عنده كلب اسمه بيكلز علاقة كوربيت ب بيكلز كانت حاجة كدا شبه علاقة سى أحمد ب روى فى فيلم «الشموع السوداء» وزى الفيلم ب الظبط بيكلز جرى وقعد يشد ف حاجة مدفونة تحت أرض الجنينة كوربيت نده: «روى .. روى» أو «بيكلز .. بيكلز» وراح لقاه مطلع ورقة جرنان ملفوف جواها حاجة كنا فى مارس 1966 إنجلترا كانت ب تعانى من عمليات الجيش الأيرلندى كوربيت مكنش عنده شك إن دى قنبلة زرعها «الإرهابيين» الأيرلنديين لكن الفضول، اللى قتل القطة، غلاب كوربيت فتح اللفة لقى تمثال كدا، وصفه ب إنه «مش جميل» قعد يقلب فى التمثال لقى مكتوب عليه: أوروجواى، إيطاليا، ألمانيا، البرازيل إيه اللى ممكن يجمع البلاد دى؟ كوربيت روح البيت ادى التمثال ل مراته قالت له: ياما جاب الغراب ل أمه إيه دا؟ قال لها: متهيألى لقيت كاس العالم ضحكت ضحكة زوجات، وقالت له: اتلهى كاس عالم إيه اللى ه تلاقيه مدفون؟ إنما هو ك مواطن شريف مواطن صالح راح سلم التمثال فى قسم الشرطة إحنا عارفين إن الشرطة فى أوروبا والدول المتقدمة غير الشرطة عندنا خالص ل ذلك البوليس الإنجليزى اعتقل كوربيت ووجه له الاتهام ب سرقة كاس العالم اللى أنقذ كوربيت إنهم ما أعلنوش إنهم لقوا الكاس فورا ف تانى يوم وصلت رسالة ل رئيس الاتحاد الإنجليزى (جو كنو) مكتوب فيها: «عزيزى جو كنو مش عارف إذا كنت مهتم ب سرقة الكاس ولا لأ لكنه إذا كان ب النسبة لك كاس العالم ف هو ب النسبة حتة دهب طالب فيها 30 ألف استرلينى لو ما جاليش رد الخميس الجمعة أسيحها وأبيعها» وافق جو على إنه يدفع الفدية طبعا ما بلغ البوليس الندل! يوم التسليم المحدد فى المكان المحدد اتقابل الحرامى مع رئيس الاتحاد ل تخليص الصفقة بس رئيس الاتحاد مكنش رئيس الاتحاد كان المفتش لين بيجى الحرامى كمان مكنش الحرامى ما هو مش عبيط برضه دى عصابة عاملة زى أويشنز تويلف كدا سرقوا الكاس من المعرض المحطوط فيه الساعة 12 الضهر سرقوه وهم ب يصلوا ما هم برضه عندهم قداس ب يتعمل فى الوقت دا الحرامى بعت واحد غلبان اسمه بيتشلى قبضوا على بيتشلى طبعا ف قال: أنا راضى ب الحكم اللى ه تحكموا على بيه إنما أنا الكاس ب النسبة لى مش مجرد حتة دهب وإن شاء الله إنجلترا ه تكسب الكاس اللى كان محدد له 10 يوليو ب مباراة إنجلترا مع أوروجواى يرجع مرجوعنا ل موضوعنا كوربيت، اللى كلبه لقى الكاس، اتحول من حرامى ل بطل أو على الأدق صاحب البطل بيكلز، الكلب، بقى نجم النجوم وبرنس الليالى وجات له عروض يمثل فى السيما ومثل فعلاً أفلام بوليسية ل عشرات السنين كوربيت كانت ب تيجى له اتصالات من صحافة وإعلام يسألوه عن بيكلز دى حاجة كانت مريرة ب النسبة له ل درجة إنه قال: الكل ب ينسونى ويفتكروا الكلب أنا بقى اللى يهمنى فى الحكاية الطويلة العريضة دى هو أخو كوربيت كانت مراته ساعتها ولدت ولا لسه؟ ويا ترى جابت إيه؟ ولد ولا بنت؟ ل الأسف محدش اهتم يسأل ف محدش اهتم يجاوب.• الثنائى عضو فى مجلس الشيوخ البرازيلى أعلن فى نوفمبر 2017 إن فيه عضو مجلس نواب هناك قرر الانضمام ل حزبه وإن «الثنائى» اللى اتشكل حديثا يقدر يعمل إصلاحات جوهرية فى ريو دى جانيرو الولاية اللى ه يخوض انتخابات الرئاسة عليها عضو الشيوخ نشر مع الخبر صورتين صورة تجمع الثنائى دا حاليا وصورة تجمعهم سوا سنة 1994 الصورة بتاعة 94 دى كانت من مونديال أمريكا لما كانوا الاتنين ب يقودوا منتخب البرازيل ل الفوز ب كاس العالم بعد 24 سنة غياب عضو الشيوخ هو روماريو وعضو النواب هو بيبيتو روماريو وبيبيتو المتعة والجدية والفاعلية جايز معندهمش كاريزما بيليه ولا إمكانيات رونالدو ولا إبداع رونالدينيو ولا مزاج زيكو وسقراط وفالكاو إنما كان عندهم نوع خاص من السحر يمكن سحر المسئولية حد يقول الكلمتين دول ل نيمار أعتقد إن جمهور الكورة، ومحبى الجمال من غير جمهور الكورة ه يفضلوا فاكرين ل الأبد اللقطة الأبدع فى تاريخ المونديال اللى جمعت روماريو وبيبتو ومعاهم مازينيو اللقطة دى كانت من ماتش هولندا فى دور ال 8 9 يوليو 1994 دايما ماتشات السامبا والطاحونة ب تبقى ممتعة الشوط الأول خلص صفر/ صفر ثم كانت الحلاوة كلها فى الشوط التانى روماريو اتقدم ب هدف عليه بصمته اللى هو ما تعرفش شاط الكورة ب أنهى جزء من رجله خلاها تطلع ب القوة دى والدقة دى ثم بيبتو سجل التانى هدف فيه تفاهم نادر تشوفه كورة عادية طويلة من إد دى جوى حارس هولندا يردها الدفاع البرازيلى توصل عند روماريو المتسلل كل الملعب وقف ب اعتبار الأوفسايد واضح ما عدا بيبيتو ما تعرفش ازاى بيبيتو عرف إن روماريو مش ه يتحرك سنتى فى اتجاه الكورة ب التالى مش ه يتحس بالأوفسايد ف جرى هو ب سرعة خد الكورة وبقى منفرد ولم الحارس المسكين وسجلها قبل الماتش دا ب أيام كانت مرات بيبيتو خلفت له ولد ومكنش لسه شافه ف لما سجل الجون جرى وب يشاور ب إيده ك إنه شايل طفل ب نفس التفاهم جرى روماريو وقف جنبه يحمل نفس الحركة علشان يديها شكل أجمل ثم انضم لهم فى الآخر مازينيو هولندا ما سكتتش سجلت هدفين واتعادلت ثم كان فاول ل البرازيل خد الكورة برانكو وقال بعدين إنه بص على ساعة الاستاد وقال ل نفسه لازم نسجل فى اللحظة دى ورغم إن الفاول كان من مسافة بعيدة إلا إنه شاط وسجل هدف الفوز فازت البرازيل واستمرت ل النهائى وكسبت كاس العالم كمان لكن حتى لو مكنتش كسبت تفضل لقطة «طفل بيبيتو» اللقطة دى تقدر تسميها «البهجة» اللقطة دى قصيدة •
