الأرنب الكسبان

قول لى يا صاحبي
هو ف قصة الأرنب والسلحفاة
مين اللى كسب؟
- السلحفاة
• مظبوط، دا كان رأى الحمار
- ......
• استنى بس
ما تزعلش
مش قصدى أشتمك
هو إنت حمار؟
- لأ
• طيب
أنا بس عايز أقول لك
إنهم قالوا لنا حتة من الحكاية
وما قالوش بقيتها
لا قالوا أولها
ولا قالوا آخرها
قالوا الحتة اللى عايزين يقولوها
- وانت عارف الحكاية؟
• آه، بس قبل ما أقولهالك
عايز أسألك سؤال:
هو أصلا السلحفاة لما كسبت، كسبت إيه؟
- كسبت السبق
أيوه، اللى هو إيه يعني؟
إيه جايزة السبق دا؟
يعنى إيه اللى خدته السلحفاة
واتحرم منه الأرنب؟
- ما قالوش.
• شفت!
تعالى بقى أحكى لك الحكاية:
الأسد بص ف الغابة
لقى الحمار عفي
فكر يخليه يشيل ويحط ويتركب ويروح و ييجي
جاب مستشاره الديب
وقال له: عايزين نعمل كدا
تفتكر الحمار ممكن يطلب إيه؟
الديب رد: وليه يطلب يا مولاي؟
ما نشغله ب أكلته
الأسد قال: إنت عبيط يا ديب!
ما هو ب ياكل وب يشرب وزى الفل
الديب ضحك وقال:
يا مولاي
كل حاجة وليها حاجة
الحمار طيب، عاطفي، غلبان
لو قدرنا نقنعه
إن الشيل والحط ده
هو الشرف
هو الفخر
هو البطولة
ممكن كمان نقاسمه ف أكلته بعد كدا
فهم الأسد إن الديب عنده خطة
قال له: وازاى دا يتعمل يا ديب؟
يعنى كل ما نشيله شيلة
نقول له: شيل يا بطل؟
الديب رد ب سرعة:
اوعى يا مولاي
ما تآخذنيش على جرأتي
بس لو عملنا كدا
ك إننا ب نقول إنه له فضل علينا
لازم هو اللى يقول كدا ل نفسه
زمجر الأسد
وقال: بدأت أزهق يا ديب
انفض اللى عندك مرة واحدة
رمى الديب ب الخطة اللى كلنا عارفينها
جاب السلحفاة والأرنب
وعمل المسابقة الدولية ل الغابة
الأرنب فكر
هو أنا أكسب إيه يعنى لما أروح الحتة اللى عايزينها؟
فكك يا عم
الخلق دى هبلة
وراح
لعب وكل وشرب وعمل سيكو سيكو
وراح حفلة وتعب ف ريح شوية
ولما نشط قعد يدور على الجزر
ب اختصار
عاش «حياته»
حياته هو
والسلحفاة اتبسطت لما كسبت
والحمار اقتنع إن السلحفاة هى اللى كسبت
ومن ساعتها ما بطلش شيل وحط
- ........
• إيه؟ الحكاية ما عجبتكش؟
- الحكاية دى ممكن تعجب الأرنب
ممكن تعجب السلحفاة
لكن الحمار
أكيد لأ
قوم من قدامى