هتشتروا لحمة السنة دى؟! نفسى أقاطعها.. بس الفتة سُنة!

«السنة دى مفيش لحمة».. هكذا تبدأ السيدات حديثهن عند طرح السؤال عليهن.. هتشتروا لحمة العيد السنة دى؟!.. ارتفاع ثمن اللحم ووصولها فى بعض المناطق الراقية لأكثر من 100 جنيه مصرى وفى المناطق الشعبية ل 90 جنيها.. جعل الحصول على لحمة العيد أمرا يستحق التفكير والتدبير.. خاصة أن العيد الآن يتزامن مع دخول المدارس ودفع المصاريف..بخلاف بند المصايف طبعاً الأمر الذى سيجعل كثيرا من المضحين ينتقلون تدريجياً إلى جدول الهدية والصدقة فى الذبيحة.
لكن رغم ذلك فالبعض كان يتراجع عن قراره بعدم شراء لحمة العيد والأسباب مختلفة.. فمنهم من كان يبرر ذلك بأبنائه.. وأخرى بأحفادها.. وأكثر الأسباب التى أقنعتنى هى أن الفتة باللحمة فى العيد عادة لا يمكن التغاضى عنها.
ذهبنا فى رحلة سريعة فى شوارع السيدة زينب والسوق، وتحدثنا مع سيدات مصر المدبرات لنعرف هل سيشترين لحمة هذه السنة، هل سيقاطعن وكيف ستدبرن مصروف البيت بين اللحمة ومصاريف الدراسة.
إيه اللحمة دى يا ماما؟!
فتقول الأستاذة ماجدة زوجة وأم لطفلين إنها لولا الأولاد لما اشترت لحمة هذا العيد.. لكنها يجب أن تطبخ فى العيد لحمة لأطفالها فليس من اللائق أن يكبر أولادها وهم لا يعرفون اللحمة.. واستنكرت قائلة: يعنى لو اتعزمنا عند حد وشافوا اللحمة.. يسألونى ويقولوا لى إيه دى يا ماما؟! لذلك قررت أن تشترى 2 كيلو لحمة لتأكل الأسرة فى أول أيام العيد ويعرف أولادها ما هى اللحمة!
أنا من الثلث الهدية طبعا
أما الأستاذة سامية فقد رفضت رفضا باتا أن تشترى لحمة هذه السنة.. قائلة: لا.. لا.. لحمة إيه.. أنا عندى مدارس.. أنا السنة دى مستنية الهدية أو حتى الصدقة أكيد مش هتفرق معايا!
وابتسمت ضاحكة: كفاية أنا هاشترى العيش والأرز والطماطم والثوم لعمل الفتة.. ودى مصاريف برضه.. كيلو الطماطم بس ب 7 جنيه.
وظلت الأستاذة سامية مصرة على رأيها بأنها لن تشترى هذه السنة ويكفيها ما لديها من التزامات فى مصاريف المدارس.
هجيب 3 كيلو بدل 5
الحاجة أم أحمد أكدت أنها ستشترى طبعا لحمة وقالت إنه لابد منها وإنها كانت تتمنى لو قاطعت اللحمة لكن الفتة لابد منها.. لذا سأشترى لحمة لكن بكمية أقل من السنة الماضية.
لذا سأشترى اثنين أو ثلاثة كيلو لحمة بالكثير بدلا من خمسة كيلو.. و هذا لأطبخ عليها فتة حتى ألتزم بالسنة وفرحة العيد تكتمل.
كل ما أنوى أضحى الأسعار تزيد
السيدة نوال.. كل سنة تحلم بأن تشترى خروفا وتضحى به فى العيد.. فتزيد الأسعار.. فتؤجلها للسنة القادمة على أمل أن تتحسن الظروف.. لكن تأتى الأسعار بما لا يشتهيه المواطن!
لذا قررت نوال شراء 2 كيلو لحمة فقط، وعندما سألتها عن فكرة المقاطعة قالت: المشكلة أن هناك كما كبيرا من الناس لا تتأثر حالتهم مع الغلاء فيذهبون للشراء حتى لو قاطعنا.. فلا يتأثر تجار المواشى ولا الجزارون.. يقولون: بناقص الشوية دول.. وتضحك!
كفاية عليا أسعار الخضار!
أما السيدة سهام التى كانت فى عجالة عندما استوقفتها للتحدث معها لأسألها عما إذا كانت ستشترى لحمة هذا العيد أم لا.. فردت علىّ بعصبية شديدة: لحمة إيه؟ لحمة ! أنا لسه جاية من سوق الخضار والأسعار نار.. لحمة ! لحمة إيه.. لا مش هجيب لحمة مش لما أعرف أشترى خضار الأول؟!
وتركتنى وذهبت.. وهى تجر شنطة الخضار معها.. تتحدث مع نفسها.. بصوت خفيض.. لم أستطع سماع ماذا كانت تقول بالضبط.. ولكنها كانت تتمتم.. لحمة.. أسعار.. خضار.. نار.. سيبونى بقى!
لازم أحفادى ياكلوا لحمة
الحاجة أم عادل.. كانت جالسة تلتقط أنفاسها فى السيدة زينب أمام محل للطورشى.. واقتربت منها وسألتها سؤالنا المعتاد، فابتسمت: طبعا هاجيب غالى ولا رخيص.. أنا ما أقدرش أول يوم العيد يدخل وما أعملش لأحفادى لحمة محمرة.. ولا فتة.. حتى لو اثنين كيلو.. لكن معقول يعدى العيد من غير ما يدوقوا فتة على لحمة بتاعة تيتة الحاجة!
أنا لا زم لما أموت يقعدوا يقولوا لبعض: فاكرين بيت تيتة.. وعز تيتة.. وطبيخ تيتة.. كفاية الهم اللى هيشوفوه لما يكبروا!
نيجى احنا على نفسنا شوية ونضغط على نفسنا فى المصاريف عشان نفرحهم.. ده أنا والله لو معايا أدبح.. عشان أوريهم الخروف ويشوفوا الدم.. ويفرحوا.. لكنت عملت كده ولو آخر مليم معايا!
لا مفيش عيد مع المدارس
أما الأستاذة جيهان فقد كانت واضحة وصريحة ومحددة «مفيش عيد مع المدارس».. يا إما عيد.. يا إما مدارس.. لكن الاثنين سويا لا يعقل.. هنجيب منين؟! ده كيلو الأرز بقى ب 10 جنيه.. ومصاريف المدرسة زادت.. والدنيا عمالة تغلى.. لازم نختار حاجة واحدة وأكيد لازم الأهم.. المدرسة أهم من اللحمة!
أنا هعمل فتة لحمة وفتة كوارع
أما السيدة منى فقالت: أنا عاملة حسابى أجيب كيلو واحد لحمة وكارع أعمل فتة لحمة وفتة وشربة كوارع.. ولعلم حضرتك الكوارع فى نفس سعر اللحمة.. بس عشان أبقى نوعت ورضيت كل الأذواق.. أنا جوزي يموت فى الكوارع.. وولادى يحبوا اللحمة.. لكن باقى السنة بقى.. ناقص يطلع لنا ريش من كتر الفراخ.. ضاحكة: آه والله.. فلازم أفرحهم فى العيد.•