ياسمين

الدنيا لما ابتدت
طرحت شجر ياسمين
والأرض لما فنت
ما بقاش غير الياسمين
والجنة لما اتبنت
رفعوها فوق ياسمين
وقلبى لما نضج
عشقت أنا الياسمين
•••
أنا بحبك زى توأم ملتصق
أنا بحبك زى عشقى للأفق
أنا بحبك زى ريقى
يا للى أصبحتى طريقى
أنا بحبك يا ضميرى
يا للى أصبحتى مصيرى
أنا بحبك زى روحى
يا للى ضيعتى جروحى
أنا بحبك باكتمال
أنا بحبك باقتتال
أنا بحب فيكى نفسى
بكرة، دلوقتى وأمسى
أنا بحب فيكى نورك
أحلى ما فيكى حضورك
أنا بحب أقول بحبك
زى ما أكون لسه طفل
زى أول مرة أحب
زى أول مرة أعيش
زى أول مرة نفسى الحياة متنتهيش
•••
أنا نفسى أوصل لأبعد ما فى روحك
أنا نفسى أحبك زى أم تعشق ابنها
زى ما الدنيا تعشق ربها
زى دم جوه عرق
زى غرب قصاده شرق
زيى زيك ما فى فرق
أبتدى ضربة بداية الحياة
بس بصى للسما
بس المسى الوجود
بس سيبى روحك للخلود
فورًا الأشياء هترجع
فورًا الياسمين هيطلع..
•••
الدنيا لما ابتدت
طرحت شجر ياسمين
والصبح لما اتولد
ما لقاش دموع فى العين
والقلب ما حيى
عرف الطريق الزين
•••
أنا كنت بور
وفرع أجرد صبور
قاعد ألف وأدور
فى دنيا فاضية من الحنان
أنا كنت مرسى للمراكب والطيور
أنا كنت حفار للقبور
وبقيت رزين.. لما عشقت الياسمين
•••
الكون ده مليان كائنات
والكل يحلم بالمئات
الكل صاحى لكن ممات
جواه خرابة بألف فار
فيها ألف جنة وألف نار
فيها المشاكل والآهات
فيها بيت جحا والمقرفات
•••
دلوقتى صبحت معجزات
والحب أصبح كالجنين
لما اتزرع الياسمين..