التجريبي 2009 دعوة مجرب

وجه ميعاد مقالة روز اليوسف .. و المرة دي ماحترتش ولا احتجت اروح اقابل يوسف بيه علشان الاقي فكرة المقالة .. باعتبار إن اي مسرحي في مصر لو اتطلب منه يكتب مقالة اليومين دول لازم يكتبها عن اهم حدث مسرحي بيحصل في مصر والوطن العربي كل سنة و هو مهرجان القاهرة الدولي للمسرح التجريبي طبعا ... و باعتباري واحد من ابناء المهرجان اللي شاركوا في كل دوراته من اول دورة وحتي الان.... قررت اكتب مقالة ولا مونولوج روميو لجولييت لما كان واقف بيتشحتف تحت بلكونتها .. و ابتديت اكتب و طبعا كراجل طيب حسن النية مش فاهم ان الشماتة بقت موضة.. والشتيمة قانون.. و نصف الكوب الفارغ اهم من المليان..و منعدمي الموهبة طوال اللسان اصبحوا اهم من الموهوبين .. ابتديت امدح طبعا في المهرجان اللي اتربيت فيه .. و عينكوا ما تشوف الا النور .. الدنيا ضلمت وهب اتنين تلاتة من شعراء المهجر العظماء اصحاب الاكتشاف الفذ اللي اطلقوا علي المهرجان اسم التخريبي بدلا من التجريبي ثم نظروا حولهم متفاخرين بالتسمية و كأنهم جابوا الديب من ديله و قعدوا يتنططوا فرحين كالاطفال و يقولوا ...هييه... التخريبي اهو اهو .. ثم استلقوا علي اقفيتهم من الضحك زيادة كيد في المهرجان ... وهولاء ذكروني بشعراء الماضي العظماء و منهم الشاعر الفحل صاحب قصيدة اديك بوكس ادخلك الكوبس باعتبار البوكس و الكوبس علي نفس الوزن .. ولا الشاعر الفحل التاني اللي قال اديك شلوت اوديك اسيوطلنفس الاسباب الادبية بتاعة الفحل الاولاني .... المهم قلت لا يا واد ... الباب اللي يجيلك منه الريح سده و استريح .. لو كتبت بالخير عن المهرجان .. انت مش حمل قلم من الاقلام الحرة النزيهة الشريفة العفيفة اللي هاتديك بالبوكس تدخلك الكوبس بمقالة واحدة لو بس شموا انك من بتوع التجريبي و العياذ بالله ...
فقلت اشتم انا كمان في المهرجان واهو كله بقي يشتم كله اليومين دول ومحدش بيحاسب حد ... هتيجي علي انا ؟ تلبست شخصية واحد من السادة اعضاء فرقة الشتامين المتحدين ..وقلت يلا يا جماعة.. توكلنا علي الله ...نبتدي الشتيمة و الردح ......مهرجان ؟ مهرجان ايه يا ابو مهرجان ؟ كسبنا ايه من المهرجان ؟ مخرجين ؟ مخرجين مين اللي بتتكلم عليهم يا استاذ اللي طلعهم المهرجان ؟ ناصر عبد المنعم مين و انتصار عبد الفتاح ايه و خالد جلال منين و عاصم نجاتي عشان ايه ...امابقي لو قلتلي هاني عفيفي و ريم حجاب و محمد ابو السعود و هاني المتناوي و اسلام امام و محمد مرسي ... فهاقولك لااااا دول عيال و التجريب لا يجوز الا بعد سن الستين علشان تبقي خبرة ... مستوي.. يعني زي البلح الامهات ...و طالما احنا متفقين ان هما يا دوبك عشرين مخرج مهم اللي طلعهم المهرجان ... اديني انت بس ميزانية المهرجان ده وانا اشتريلك تلاتين اربعين مخرج و بسعر الجملة حكم المخرجين المبدعين دول علي قفا من يشيل المهم تنقي السوبر ماركت اللي تشتري منه .... ثم كتب ايه يا ابو كتب اللي طلعها المهرجان هما حياله 400 كتاب في اهم مدارس المسرح المعاصر في العالم ونظرياته ...بالك انت لو في ايدي انا ميزانية المهرجان ده ؟ كنت روقتكوا كتب من عند عم شحاتة بتاع سور الازبكية ... كتب تحفة.. بالاضافة بقي لمجلات تان تان و سمير و ميكي فوق البيعة ده غير مجلات الكواكب النادرة انما هاتقولي كتب.. بلاش كلام فارغ .... ثم جوايز ايه يا ابو جوايز اللي احنا كسبناها دول محصلوش مرتين احسن عرض علي مرتين احسن مخرج علي مرتين احسن عمل جماعي علي مرة يتيمة احسن ممثل علي احسن سينوغرافيا ... لا احنا عاوزين جايزتين تلاتة اربعة كل دورة .. مش احنا اللي دافعين ؟ يعني الكورة بتاعتنا ؟ يعني طباخ السم بيدوقوا ؟ و سمعني احلي الناجح يرفع ايده ... او اديني فلوس المهرجان وانا انزل الرويعي عند بتوع السبوع اشتريلك الف تمثال من بتوع السبوع و ادهنهملك كمان دهبي علي برونزي علي فضي و نغرق جوايز بقي ... ثم بلاد ايه و مسرحيات ايه اللي نشوفهم مش هما يا دوبك خمسة واربعين خمسين دولة اللي بيجوا كل سنة يقدموا فنهم في مصر؟.. بلاهم ..وعننا ما شوفنا حاجة هو احنا يعني اما نشوفهم هانبقي كسبنا ايه ؟ احسن .. مش مهم نتفرج ...مش مهم نشوف .. مش مهم نتحاور .. نتفاعل .. نتعاون ... نجرب مش مهم نتعلم من ايجابيات الاخرين و نتجنب سلبياتهم .. بلاش كلام فارغ يا راجل ... ثم ارجع و اقولك اديني انت فلوس المهرجان ده وانا ابعتك الخمسين دولة دول تشوف هناك براحتك .. نعم ؟ انت وزمايلك ايه ؟ انت هاتستهبل يلا والا ايه ؟ هابعتك انت لوحدك و السنة الجاية نبعت واحد تاني و هكذا واهو علي ماتيجي سنة 2050 نكون بعتنا 41 بني ادم شافوا وعملوا شوبنج كمان .. و بكده طالما هنلغي المهرجان و نشتري بفلوسه كتب من سور الازبكية و مخرجين م السوبر ماركت و نبعت فرد واحد سنويا لبلاد برة .. اذن فأنا و من هذا المنبر ..اطالب بتعميم التجربة علي جميع مناحي الحياة الثقافية ..و الاستفادة من نظريتي ... يعني مثلا في الاثار و المتاحف .. علشان نعمل المتحف الجديد الكبير .. نقوم نقفل الهرم و بقية المتاحف لان كل دي مصروفات .. يعني مرتبات و تأمين و كلام فارغ ... و في مجال الموسيقي و الفنون الرفيعة انا باقول نقفل دار الاوبرا و نشتري بميزانيتها كام طبلة علي هارب علي فلوت علي بيانوهات علي تشيللوهات بس ياريت نقلل من الكونترباصات علشان تقيلة و محتاجة مخازن ضخمة .. و بكده الفنانين العظام يلاقوا الات يسرحوا بيها في الميادين .. و في مجال المسرح .. باعتبار فلوس المهرجان التجريبي هترجع غزارة الانتاج علشان الميتين مسرحية اللي بتنتجهم كل سنة كل جهات الانتاج المسرحية اكيد هيتحسن مستواهم لما نصرف عليهم اكتر و اكيد الفلوس دي هي اللي هتجيب افكار للمخرجين و شقق لاولادنا ده غير بقي اللب و التسالي و الفيديو جيم اللي هنغرق فيه .. و باعتبار ان الفلوس المتلتلة للمؤسسات دي .. فلوس مش مبروكة.. و مابتجيبش ابداع ..و الابداع مش هيجي الا بفلوس المهرجان ده.. يبقي يلا نديهم فلوس المهرجان ..و في النهاية نظرا لاني سمعت طراطيش كلام ان التجريبي سبب انهيار المسرح و سبب فيضان تسونامي و مشكلة الشرق الاوسط و ازمة رغيف العيش و عدم جواز مهند من نور .. فانا قررت اغلس عالمهرجان و اضايقه و اشارك بعروض فاشلة كل سنة انا و زملائي المسرحيين الفاشلين اللي بيقولوا علينا ابناء التجريبي و مش هاقري ولا كتاب من كتبه و مش هاستفيد من ولا عرض من عروضه وولا هاجرب لاني مازلت تحت الستين و التجريب ما قبل الستين حراااااام وفسق و فجور..وهاروح اقدم علي سحب التذكرة المفردة السنوية لمسارح العالم يمكن ربنا يجعلني من الاربعين المبشرين بالسفر خلال الخمسة وستين سنة الجاية .. بس علشان كل ده يحصل يارب طول عمر المهرجان التجريبي كمان و كمان