حرصت جريدة «روز اليوسف» على إجراء حوار مع أحمد هانى أحد نجوم الدورى الممتاز خلال الموسم الحالى ومنتخب مصر الأوليمبى للحديث عن سبب استبعاده من المعسكرات وطموحه خلال الفترة القادمة وحقيقة مفاوضات القطبين معه كل ذلك وأكثر خلال الحوار التالى:- ■ فى البداية ما هو تقييمك لمستوى فريق حرس الحدود هذا الموسم؟ - الحرس الموسم ده عمل موسم استثنائى لأن كان فى ناس كتير بتراهن انه مش هيكمل فى ظل قوة الدورى وفعلاً قبل اخر 5 جولات كنا التالت من تحت والفرق كان بينا وبين بتروچيت 5 بنط وكمان صعوبة ماتشاتنا الأخيره فالأكيد انك تفنش كده دى حاجه عظيمه. ■ وهل ترى إن الدورى هذا الموسم كان مختلفا من حيث قوة المنافسة؟ - البطوله الموسم ده قويه جداً فوق وتحت ومفيش حد كان يقدر يتوقع اى حاجة. ■ بما أنك أحد أبناء نادى الإسماعيلى..لماذا يعانى الفريق من التذبذب؟ - الإسماعيلى الموسم ده بالنسباله هيكون موسما للنسيان ده اللى اقدر اقوله. ■ أحمد هانى لاعب طلائع الجيش ومعار للحرس ما خطواتك القادمة؟ - دلوقتى اعارتى خلصت والمفروض انا على ذمة الطلائع وطبعاً مش هتحرك غير عن طريقهم وبالفعل فى انديه محترمة بعتت فاكسات وبيتواصلوا معايا والفتره اللى جايه ان شاء الله هنكون حسمنا الملف ده. ■ ما حقيقة مفاوضات القطبين معك وما هى أبرز العروض التى تلقيتها خلال الفترة الحالية؟ - مفيش مفاوضات رسمى من القطبين لسه هم اتكلموا معايا بعد ماتش الزمالك طبعاً الحمدلله ربنا كان موفقنى فى الماتش فرق معايا بنسبة كبيرة وناس من نادى الزمالك كلمونى فى وقتها. ■ أحمد هانى يعد من اللاعبين أصحاب المستوى المميز طوال الموسم ما السر فى ذلك؟ - السر انى بشتغل على نفسى ومبتكلمش غير فى الملعب وغير كل ده توفيق ربنا وإن أهلى راضيين عنى وبيدعولى طبعاً. ■ ما رأيك فى تجربة بيراميدز وهل لها تأثير سلبى أم الايجابى على الكرة المصرية؟ - لا طبعاً تجربه محترمة واحترافية وكلها إيجابيات. ■ ما بدايتك فى كرة القدم حتى وصلك للحرس؟ - انا بدأت فى مدرسة كوره فى بلدى التل الكبير مع الكابتن مهدى الشحات ومحمد شطة وبعدها الاسماعيلى وانا عندى 7 سنين فضلت فى النادى اتصعدت درجه اولى ولعبت وانا 16 سنة مشيت وانا 19 سنه للطلائع قعدت سنة كانت صعبة عليَّ عديت بظروف غريبة واصابات كتير فقررت اطلع اعارة والحمدلله ربنا عوضنى يعنى. ■ المدرب صاحب البصمة عليك خلال مشوارك الكروي؟ - مدربين كتير والله لو قولت حد بإسمه هبقى بظلم ناس كتير بس بالأخص كابتن احمد العجوز وعطيه صابر وميدو. ■ ننتقل بالحديث الى منتخب مصر الأوليمبى الذى تعد أحد نجومه ما سبب استبعادك خلال المعسكرات الاخيرة؟ - معرفش معنديش كلام فى الموضوع ده لأن اكيد الجهاز الفنى مختار احسن مجموعة وفى لاعيبه على أعلى مستوى موجودين وممكن تكون وجهة نظر فنية انى مش مناسب للفترة دى سواء موجودا او لأ بتمنالهم طبعاً التوفيق. ■ ماذا عن حلم التواجد مع منتخب مصر الأوليمبى خلال بطولة كأس الأمم القادمة؟ - أكيد هبقى موجود ان شاء الله. ■ ماذا عن حلم الاحتراف الخارجى لديك؟ - الاحتراف هيفضل خرم فى دماغى مش هسكت غير لما احققه. ■ كيف أثر محمد صلاح على تفكيرك وهل تسعى لتحقيق ما فعله؟ - محمد صلاح أيقونة اللى مش هيستفاد منها هو اللى خسران أكيد اى حد يحلم باللى وصل ليه ابو مكة بس الاهم انه اثبت لكل الناس ان اى حد بيتعب وبيجتهد ربنا هيعوضه ومفيش مستحيل. ■ اخيرا ما هو طموحك خلال الفترة القادمة؟ - طموحى مالوش سقف معين.