«محمد الشناوى» سيظل حارس مصر حتى مونديال 2030

تواصلت جريدة «روزاليوسف» مع الكابتن فكرى صالح مدرب حراس مرمى منتخب مصر فى مونديال 1990 والملقب بشيخ مدربى حراس المرمى وفتح صدره للرد على جميع الأسئلة التى تخص الساحة الكروية فى الوقت الراهن من خلال الحوار التالى:
■ بداية ماتقييمك لمحمد الشناوى حارس منتخب مصر الأساسى فى المونديال؟
- الشناوى كان ممتاز جدا -ما شاء الله- وشايف إنه عرف يثبت وجوده أتوقع أنه سيكون حارس منتخب مصر فى كأس العالم 2022و2026 و2030 أيضا.
الشناوى شارك فى مبارايتن الأولى كانت مباراة العمر له ومش هيقدر ينساها أبدا أمام الثانية فهو يتحمل غلطة الجون الاول وليس فتحى لأنه كان يقدر يطلع يمسكها.
■ هل الإصابة حرمت أحمد الشناوى من كأس العالم أم أنه بعيد عن الصورة؟
- هو كان فى الصورة ولكن تأتى الريح بما لا تشتهى السفن.. أحمد الشناوى الوحيد فى مصر اللى يمتلك العلامة الكاملة وهى المهارة والموهبة ولكنه يفتقد التحدى والإصرار عكس عصام الحضرى مثلا.
■ تحليلك لمستوى محمد عواد وهل أتظلم بعدم الانضمام للمنتخب؟
- محمد عواد يقدم أحسن موسمين له فى مسيرته وهو حارس مميز جدا ولو كان انضم مكنتش مفأجاة لينا.. ولكنه اتظلم مش من أحمد ناجى لا أتظلم من الظروف بمعنى أنه لو كان لعب مع مجموعة اللاعبين بتاع ماتش البرتغال الودى كان هيتألق، وهيكون متواجد معاهم بس نصيبه إنه أخد الماتش التانى مع لاعبيه أيضا تحت التجربة فمكنش موفق فيها.
■ هل عصام الحضرى أنضم لكأس العالم علشان أسمه دون مستواها؟
- لا أستحالة نقدر نقول كدا هو اللى كان واقف فى ماتش الصعود، وشارك بالبطولة الأفريقية كمان وكان مميز وعصام اشتغل على نفسه وفرض نفسه على الجهاز الفنى لما كان فى وادى دجلة خرج كلين شيت 18 مباراة زيه زى النادى الأهلى بالظبط.
■ هل تحدث أحمد ناجى معاك قبل اختيار حراس المرمى؟
- اها أحمد ناجى كلمنى قبل كدا بعد الفجر وقالى ياكابتن انا منمتش طول الليل انا قولته عارف وعارف السبب قالى اية هو قولته انت ظالم عصام الحضرى وحاسى بذنب قالى بالظبط كدا قالى طيب أعمل اية قولته كلمه وقوله أهلا بيك فى منتخب مصر.
■ هل حراسة مرمى الأهلى ماشية بالتوريث؟
- لا أنا أرفض الكلمة دى تماما لو نفتكر الأهلى ضم شريف إكرامى من الجونة لما خد أحسن حارس قى مصر وقتها وعمل كلين شيت بجانب انه حارس مميز، ويستحق التواجد فى الأهلي.. كذلك مصطفى شوبير حارس ممتاز انا دربته هنا فى وادى دجلة وبعدها راح الأهلي.
عايز أقول أن إكرامى حارس عظيم وابن شوبير حارس عظيم ويستحقون التواجد واللعب أساسي.
■ ما هو الفرق بين منتخب 1990 ومنتخب 2018؟
- لا الفرق كبير جدا بينهم 90 مكنش فيه لاعب محترف فكونا بنجهز منتخب كامل علشان يكون قادر على المنافسة عكس 2018 اللاعبين المحترفين كتير والمفروض انهم متعودين وجاهزين تماما.
■ لماذا لا يوجد دعم للكابتن فكرى صالح ليخرج حراس مميزة؟
- «لا كرامة لنبى فى وطنه» ودى قاعدة انا أسير عليها دائما..عندما عدت من الأردن وكنت عايز أعمل مشروع يخدم مصر كلها كلمت الكابتن فتحى نصير وفاروق جعفر ومحمود سعد وكلمت وزير الشباب والرياضة السابق طاهر أبوزيد وأخيرا كلمت مستر هانى أبوريدة ومحدش أستجاب لكلامى الوحيد الى بيحب مصر وأستجاب لكلامى مستر ماجد سامى رئيس نادى وادى دجلة من غير مجاملة لأنه الوحيد الى بيدعم جميع الورش والسفريات علشان ننشر «علم حراسة المرمي».
■ رسالتك إلى مدربين حراس مرمى النادى الأهلى والزمالك والإسماعيلي؟
- مدربون ممتازون جدا ولكن عايز أقولهم أن حراس المنتخب طالعين من تحت أيديهم وعلم حراسة المرمى اتطور ولابد أن يكون عندهم دراية بذلك.
■ رأيك فى تعاقد الحضرى مع الإسماعيلي؟
عصام كلمنى وقالى ياكابتن انا أخرى كأس العالم بس بعدها رجع فى كلامه وقرر الاستمرار وقالى طول ما أنا قادر ألعب مش هبطل وطول ما الثلج موجود أنا مستمر لأنه السر الى علمتهوله.
■ رأيك فى اعتزاله دوليا؟
- كل حاجة لها وقت وهو شاف إن دا وقت مناسب له.