من ديوان «استشهاد جمال عبد الناصر»

فؤاد حداد
يا حضن مصري يا طلعة فجر يا ريّس
مع السلامه ياوالد يا أحنّ شهيد
آدي الرقابي ودي الأعلام بتتنكّس
فين طلّتك في الدقايق تسبق المواعيد
والابتسامه اللي أحلي من السلام بالإيد
يامعانا في كل فرحه ومعركه وجديد
أؤمر لي بحقوقي وهدوم الولاد في العيد
والمجانيّه ومرايل بيضا والأناشيد
والصبر ما يغلبهش الذلّ والتنهيد
فرّقت ورقك وقلت الكلّ يكتب لي
من البحيره من الشرقيّه من قبلي
أنا خفت لو أم تنده وتلاقيني بعيد
ياما السفر والبريد ياما الأمل بدري
ياما الغلابه تريد منشيّة البكري
وياما قلبك خفق من رحمته وضناه
كل الآهات شعب واحد يا حبيب الله
يا صادق العقل واكتاف الفواعليّه
صدر الشهامه اللي أكبر منها حنيّه
نسّيتنا أيّام ما كانت راسنا محنيّه
آدي المدارس ودي الشوارع ودي العمال
والفلاحين الأحبّه أمّتك ياجمال
داوم علي الحق ياكبير العرب داوم
عشر ليالي بضحاها وانت مش نايم
خلّينا نعلي بحناجر تطلبك ودموع
يا قوة الشعب يا قلب الوطن مسموع
يا رؤية الذاكره يا واحد الجماهير
صوتك نبع من نبات نادي وشرف وضمير
من ملحمه ومن دموع زي النهاردا كتير
خليني أسأل دموعي قبل مااكتبها
وليل ماكانش انتهي وأيّام نعتّبها
واسمك يدور في المناره خالد الإحساس
مين اللي أكبر مقامك في قلوب الناس
والا مقامهم في قلب