الطرف التالت

بحساب البعد ومسافاته والجسد الفانى ورغباته
وقياس الميل على طول الليل الطرف التالت كان ولابد
الطرف المطلوب اثباته
للعشق مقام إحنا اللى حسبنا العشق كلام
وعكسنا الود مابيننا ملام
والبسط مقام حالنا اتغير
وانكسر القلب ومين يجبُر
إحنا اللى فضلنا نبات ونقوم
بنعاند يوم و نهاود يوم
ورفضنا القسمة على المقسوم
بين المحتوم والمتقدر
مين الكسبان مين الخسران
مين كان مستنى التانى يخون
أو مين كان خان الناتج كان
لازم واحد فينا هايقدر
والطرف التالت فى الآخر
لازم يظهر والحاصل ضاع
فى معادلة مافيش فيها لا فايز
ومافيش مغلوب الشوق فى القلب فرق جدا
فى النسبة عن الشوق المكتوب
طول المسافات وغرام الذات
وسكات يتقال والرد سكات
والقرب ساعات بقى غير مرغوب
فالحاصل ضاع وعشان ما يعودش الحب صداع
مابقاش فى القلب غرام محسوب
فالطرف التالت كان لازم
وهو المطلوب وف كل معادلة مابين طرفين
هتلاقى حلول من بين الزائد والناقص
بيبان الكامل مِالناقص
والشرح يطول وتلاقى طرف دايما مشغول
يمكن باعك؟ بيخون معقول؟
أو يمكن مل والحد الأدنى لشوقه يقل
يتبقى سؤال مين المسئول
الطرف التالت كان الحل مِالأول كان هوا المجهول
والطرف التالت فى الموضوع
كان حاصل ضرب أيام مليانه عذاب ودموع
وجروح فى القلب لو حولنا الأحلام حسابات
لو حللنا الأرقام فى الحب
فى حنين فى القلب ماهوش مسموع
وعناد فى بعاد وعناد فى رجوع
يطلع آخر الحسبة المجموع
الطرف التالت مالهوش ذنب
الطرف التالت فى القصة
كان حاله وبس إحنا اللى حلولنا ملاها اليأس
وزوايا الرؤيه فى سكتنا غمّاها العجز
إحنا الطرفين اللى اتقابلوا
ولآخر سكتهم فضلوا ماشيين بالعكس
الطرف التالت كان أصلاً احساس بالنقص
محمد حسين