فوازيييييير زير زير زير

فوازير بدون جوايز.. ما فيش فيها خاسر.. ولا فيها فايز.. بس شارك لو كنت عايز.. أنا عايز.. عايزك تشارك.. المشاركة فى حد ذاتها شىء جميل.. والهدف من المشاركة بإذن الله نبيل.. والفوازير عشان أنا اللى كاتبها.. طبعاً عارف حلها.. بس ممكن تكون إجابتك أجمل وأفضل من حلى لها.. يا ريت تشارك.. بس قبل ذلك.. عندى كلمة للوطن.. دا بعد إذنك يا غالى.. خيال فجأة جالى.. بس ما دام وصل لدماغ صلاح.. صلاح يقوله عشان يرتاح.. كل حرف وكل كلمة وكل جملة هنا من بنات أفكارى.. يعنى ملكى يعنى حقى يعنى أعمل فيها أو بيها ما بدالى.. أنشرها فى كتاب.. أسجلها فى سى دى.. أو حتى أغسل بيها الصحون.. المهم تكون زى ما أنا عايزها تكون.. وإنت عارف يا وطن إن التحرش بالبنات جريمة يعاقب عليها القانون.. هههههههههه.. بهزر معاك يا وطن.. ولا انت ما بقيتشى تحب الهزار.. دا انت طول عمرك يا وطن.. حتى فى عز المحن.. ابن نكتة وضحكتك.. ملعلعة ومسمعة ليل نهار.. إحنا فى عرضك يا وطن.. إوعى تستسلم للنكد أو لليأس أو للانكسار.. ولو كنت تجاوزت وأتحت غير المتاح.. أرجو منك السماح.. بس برضه إياك والتحرش ببنات أفكار صلاح.. ويالا بينا عالفوازير.. وكل جمعة وأنتم بخير.
(1)
أصلها من ساعة ما قامت/لا إحنا نمنا ولا هيا نامت
إحنا فى بحر الشك غُصنا/ومصر فى بحر العك عامت/«تفتكروا بتكلم على مين؟!»
(2)
يا كدابين باسم الدين/إنتوا أخطر كدابييين/إنتوا فتنة هدفها نار/تحرق كل المياديييين/«تفتكروا بتكلم على مين»
(3)
ياللى كلامك.. ضَرر/وإنت فاكره «دُرر»
وما فيش مكلمة تفوتك/وحياة أبوك/لا فضَّ فوك
لو مصر.. غالية عليك/نقطها بسكوتك/«تفتكروا بتكلم على مين»
(4)
نعم نعم للنزول/يمكن الغُمة تزول/يمكن الأمة تفوق
م التوهان والذهول/«تفتكروا كنت بتكلم على مين»
(5)
يا عاصرى الليمون/جاتلى حموضة منكم/يا ريت يكون اللامون/انحشر.. فى.. بقكم/«تفتكروا كنت بتكلم على مين»
(6)
«يا أنا.. يا الفوضى»/هى جت معاه.. أونطه
ولا كان فعلاً.. قاصدها/ولا أنا اللى مخى فوِّت
عشان جى الآن أعيدها/طب ليه بعيدها؟!/ولمين.. بعيدها؟!/يمكن ببحث.. عن إجابة/لسؤال.. غاية الغرااااابة/عشان كدا يمكن.. بعيدها/هى مصر حبيبتى عيدها/جِه وعدَّى ولا لسه/ولا عدى.. بس مش ناوى.. «يعيدها»/«تفتكروا كنت بتكلم على مين وكتبتها إمتى.. يعنى الفزوره دى 2x1»
(7)
دمعتك على خدى/وصرختك مكتومة/وبسمتك الوردى/مقهورة ومهزومة/مين اللى خان؟!/مين اللى باع؟!/مين اللى زيف الحقيقة؟!/لو تقدرى.. ردى
قولى مييييين يا مظلومة/«تفتكروا كنت بتكلم على مين وخلوا بالكوا الفزورة دى 3x1»
نحن شعب يعشق الفوازير والنكات.. والمسلسلات والحكايات.. واللت والعجن فى اللى فات.. والفذلكة والفلسفة فى التوقع بما هو آت.. وأحياناً نعشق السكات.. وأحياناً أخرى نعشق التفاهات والهيافات والسخافات.. وفى أغلب الأحيان نعشق النكد والدموع والآهات.. نحن شعب بنعمل كل الحاجات.. لحظة عزيزى القارئ.. كنت أتكلم عن نفسى.. لذا وجب الاعتذار الشديد للشعب.. آسف يا شعب.. فلم يكن من المنطقى ولا من اللائق أن أقول «نحن شعب»، والصحيح أن أقول «أنا شخص».. يعنى مثلاً.. مثلاً يعنى.. أنا شخص بعشق الفوازير والنكات.. والمسلسلات والحكايات.. وكذا كذا وكيت وكات.. إلى آخر ما فات من الكلمات.. وسوف أقدم لحضراتكم بنفسى.. الدليل على أننى كنت أتكلم عن نفسى.
(8)
يا حبيبتى نحن نحيا خدعة كبرى اسمها آل الحياة/جمله قالها ليا صاحب بس يااااااه.. اسمه تااااااه/اسمه تاه من ذهنى خالص.. فجأه تاه/بس شكله مش ناسيه.. هوه إيه؟!/هوه كان دايماً بيضحك وف عينيه/حزن غامض.. حزن جامد.. /وتلاقيه.. فجأه تايه.. فجأه شارد/تسأليه.. إنت بتفكر فى إيه؟!/ما يجاوبش.. ما يجاوبش وهات يا ضحك/كان بيضحك بالساعات.. وأما يسكت/كان يغووووووووووص فى السكاااات/كان ما بيبطلش ضحك ولا بيبطل عياط/أنسى اسمه إزاااااااى؟! وليه؟!/أما مقلب.. أما نكتة.. أما إيه/أصله كان صاحبى جداً/«تفتكروا بتكلم على مين؟! ههههههههههههههههههه»
(9)
ياللى فاتتكوا الطبعة الأولى.. نزلت منه طبعة جديدة
يمكن تلقوا حاجات معقولة.. وجديدة فعلاً ومفيدة
هوه صحيح بالعامية.. بس مفتحة مش معمية
وسعره بسيط جداً وحنين.. مايعديش ربع المية
«تفتكروا بتكلم على مين؟! ههههههههههههههههههههه»
(10)
وإلى أن نلتقى مرة أخرى.. دا لو كان فيه مرة أخرى.. تحياتى وأطيب أمانى قلبى ودعواته والسلام عليكم ورحمة الله وبركاته
«تفتكروا بسلم على مين؟! ههههههههههههههههههههه».