استغاثة سكان رابعة: «فضوا الاعتصام يرحمكم الله»

الحصار لم تعد الكلمة الأدق لوصف حال سكان ميدان رابعة العدوية ومحيطه منذ يوم الجمعة 28 يونيو الماضى.. فالإنتهاك هى المرادف الصحيح لما يمارسه المعتصمون من مؤيدى الرئيس مرسى تجاه سكانها.
مما دعاهم لتدشين صفحة على موقع التواصل الإجتماعى فيس بوك للأستغاثة بأى جهة يمكنها التدخل لفض الحصار عن عقاراتهم وشوارعهم الجانبية والمدارس الموجوده بمربعاتهم السكنية والمحلات التجارية

وتعددت روايات السكان حول مايتعرضون له بشكل يومى إخترنا لكم بعض الأمثلة:
تقول واحدة من سكان المنطقة فى روايتها «انا نزلت انا ورئيس اتحاد ملاك العمارة ورحنا المنصة فى اول اسبوع للاعتصام .. علشان اللى بيحصل تحت عمارتنا روحنا قابلنا المسئول عن المنصة الاستاذ عمرو واللى كان فى منتهى البرود وقولنالوا ميصحش اللى بيحصل فى مداخل وتحت العمارات وان احنا فى الطلعة والنازلة بنتفتش ومتضررين وكمان كان حصل حريق فى العمارة عندنا علشان ضربوا العاب نارية دخلت البلكونة قالنا بكل برود واحنا مالنا دى تصرفات فردية قولتلة وبالنسبة للخيم اللى فى مداخل العمارات رد عليا ببرود «هنحاول» نقول للناس تعملكم ممر تعدوا منه او حضرتك ابقى قللهم بذوق يعدوكى قولتلة هو حضرتك مش بتشوف انهم طول النهار نايمين المفروض اصحيهم عشان يعدونى قالى «لا ابقى عدى من فوقهم» عادى قولتلوا وبالنسبة للارهاب اللى انتم عاملينه لاهل المنطقة طول النهار ناس شايله شوم فى الشوارع وفى عز نوم الناس بيعملوا تدريبات بصوت عالى وبيرددوا قوة عزيمة ايمان ، قالى يعنى انتوا بتخافوا من الحاجات دى قولتلة اه واهلينا كبار فى السن ، قالى هو ده المطلوب قولتلة انا اللى جابنى هنا بس علشان كنت فاكرة انكم ناس متحضرين وانى مقتنعة ان الكلام بيجيب نتيجة لكن واضح انى كنت غلطانة قالى مش قلتى اللى انت عاوزاه احنا بقى معندناش كنترول على الناس دى ، دى اعداد كبيرة زى ما انتى شايفة وهنحاول نكلمهم علشان الموضوع لسه هيطول فحاولى تتعودى...
وانا خارجة انا ورئيس اتحاد الملاك من عند المنصة وفى طريقنا للبيت لقينا طابور ماشى ورانا وبيصرخوا فى ودانا وبيقولوا قوة عزيمة ايمان جارى قالى أرجوكى امسكى نفسك هم بعتينهم ورانا علشان اللى احنا قولناه لعمرو فهو بعتلك انذار والله العظيم ده اللى حصل بالنص.
وفى شكوى أخرى يقول أحد السكان : مراتى مصابة بالفشل الكلوى وبتحتاج تنزل المستشفى لعمل غسيل وانا معنديش عربية ومبعرفش ادخل أى تاكسى ينقلها وبنضطر نمشى مسافة طويلة الى ان نجد اى مواصلة تنقلنا خارج مدينة نصر وفى الرجوع نفس الازمة يرضى مين ده؟.
وتقول مروة الحكيم إحنا بنعانى من قفل شارع الطيران وشارع امتداد خضر التونى المؤدى الى عمارات المروة... وزى ما الصور مبينة فوق أن الاخوان استخدموا طوب الأرصفة لعمل متاريس مش عارفة ليه اصلا... لأنهم اصلا مش بيقفو عندها خالص الا نادرا ... بس لما شباب المنطقة بيشيلو الطوب ده الاخوان بيرجعوه مكانه تانى.
أما مها مجدى فتقول «انا مكنتش بتكلم عشان بحترم ان دى ناس ليها حق تعتصم زيها زى اى حد بس دلوقتى لا المنطقه باظت و مبقاش فيه امان وتعطيل مصالح دا غير البهدله كل يوم واحنا نازلين شغل و مروحين دا لو عرفنا ننزل والزباله والروائح الى لا تطاق كل دا ميرضيش ربنا».
فضلاُ عن التدريبات فى الشارع الخلفى الموازى لشارع النصر. ومشهد المعتصمين بكامل زيهم: الخوذة والدرع والشومة وذلك أثناء تغيير وردية اللجنة الشعبية وقد أصدرت الصفحة عدة بيانات تتوجه بشكواهم للمسئولين لإيجاد حلول لمعاناتهم المستمرة حتى اليوم السادس عشر من إعتصام «رابعة».