حوار مع المواطن العشوائي

حوار مع المواطن العشوائي

■ هل اخترت مرشحك لرئاسة الجمهورية ولمن ستعطي صوتك في الانتخابات؟!
- واحدة.. واحدة.. وكلمني بالبلدي.. بلاش الكلام الافرنجي بتاع المسلسلات التركي اللي مش بفهم منه حاجة.
■ بلاش الكلام الافرنجي.. ح تروح تنتخب رئيس الجمهورية؟
- جمهورية إيه؟!
■ جمهورية مصر.
- وهي مصر مافيهاش رئيس لغاية دلوقتي ؟
■ آه.. مصر مافيهاش رئيس.. وكلنا ح نروح ننتخب رئيس جديد..
- أللاه .. أمال الثورة دي قامت ليه. مش عشان نشيل حسني مبارك.. ونجيب رئيس غيره يكون كويس..
■ آه.. احنا فعلاً شلنا حسني مبارك لكن مفيش حد غيره يمسك الحكم.. إلا بالانتخاب.
- خلاص.. غور من وشي الساعادي.. وأنا جاي وراك أنتخب اللي يجي علي مزاجي!!
■ يا عم تيجي ورايا فين.. هو أحنا رايحين نقعد علي القهوة.. بقولك الانتخابات مش دلوقتي دي لسه بدري عليها..
- خلاص ما دام لسه بدري.. أنت فالق دماغي من الصبح ليه؟!!
■ أنا بس عايز أعرف أنت ح تنتخب مين؟
- هو انتخاب.. ولا استفتاء. أصل أنا عمري ما شفت انتخابات علي رئاسة الجمهورية.. ومن يوم ما وعيت علي الدنيا وهم ممشينها استفتاء..
■ لأ بقي.. هي المرة دي انتخاب.. ح تنتخب مين؟!
- ح انتخب أي حد يأكلنا احنا والعيال عيش حاف..
■ بس!!.. هو ده اللي أنت عايزه من رئيس الجمهورية؟!!
- يا عم وهي دي سهلة.. عايزين لقمة عيش حلال.. وهدمة نضيفة نلبسها ومدرسة نعلم فيها العيال.. ومستشفي نتعالج فيها.. وشغلانة شريفة ناكل منها عيش.. وأي حد يقدر يعمل كده ح انتخبه علي طول إن شاء الله يكون جاي من المريخ.
■ ومين من المرشحين شايف أنه يقدر يعمل كده؟
- ما هم كلهم بيتكلموا.. ويقولوا.. لكن مين اللي ح ينفذ الكلام الحلو اللي بيقوله دي بقي بختك يا أبو بخيت.
■ يعني إيه.. بختك يا أبو بخيت؟!
- يعني الرئيس اللي جاي .. لا مؤاخذة يعني ما قصدش ومحدش يزعل مني من المرشحين.. آه.. الرئيس اللي جاي زي البطيخة المقفولة.. يا تطلع قرعة .. يا تطلع حمرة..
■ هي إيه بالظبط اللي ح تطلع حمرة؟!
- الأيام اللي جاية.. واللي حي نعيشها مع الرئيس اللي ح ينجح يعني.
■ باختصار.. أنت ح تنتخب مرشح إخواني.. ولا ليبرالي.. ولا واحد من الفلول..
- بقولك إيه.. من الآخر.. ما هو أي واحد ح يقعد علي الكرسي.. وح تبقي في إيده كل حاجة.. تاني يوم ح يبقي فلول.. بس المهم ابعدني عن الإخوان..
■ ليه. منا احنا كنا ماشيين كويس وعال العال.. ودول أغلبية..
- أغلبية علي روحهم يا أبويا.. دول دخلونا في حسبة برما.. مش فاهم منها أي حاجة.
■ إزاي يعني؟!
- يا عم.. دول قالوا في الأول مش نازلين علي الرياسة.. وبعدين قالوا أبو الفتوح مش تبعنا وخرج عن طوع المرشد العام.. ومش ح ننتخبه.. وبعدين طلعلنا العوا.. وأبو اسماعين.. راحت أم إسماعين طلعت أمريكية.. راحوا منزلين لنا الشاطر راح الشاطر نزل قدامه عمر سليمان.. عمر سليمان شاط في الجون. طلعت أوت. راح الشاطر ضربه في رجله الشمال وتحت الحزام ومن غير كورة.. راح الحكم حسب عليه فاول متعمد راح مطلع كارت أحمر وطرد الاتنين الشاطر وسليمان.. راح الكابتن بديع منزل محمد مرسي من علي دكة البدلاء بدل الشاطر.. راح أبو إسماعيل شاط الكورة في الحكم عدل.. راح الحكم مطلع كارت أحمر وطرد أبو إسماعيل أبو إسماعيل عمل شغب جامد قوي في الملعب.. راح الحكم علشان يراضيه رح طارد شفيق.. شفيق زعل وعيط.. وراح للمراقبين بتوع الماتش واتظلم راح الحكم رجعه تاني.. ما فضلش غير أبو الفتوح.. راح الكابتن بديع قال علي بركة الله خلوا أبو الفتوح يبقي هو كابتن فريق الإخوان.. ومرسي يبقي احتياطي أو نائب.. كده وكده.. لكن الأصوات كلها تروح لأبو الفتوح.. ومرسي كده يبقي واقف أوفسايد من قبل الكورة ما تتلعب له في التمنيات.. وجون وجون وجون وجون..
■ يا عم إيه الحلاوة دي.. دا أنت قلبتها ماتش كورة.. وبقولك قال إيه المواطن العشوائي مش فاهم.. علي النعمة طلع إنه هو الوحيد اللي فاهم!!
- طبعًا يا ابني.. دا أنا طول عمري بافهمها وهي طايرة .. بس أنا باعمل عبيط بمزاجي!!



فيلم صراع الجبابرة

المشهد الأول «نهار داخلي»
الجنزوري يلقي بيان الحكومة.. والكتاتني يصر علي أن تقدم الحكومة استقالتها بأغلبية أصوات الإخوان والإسلاميين.. القاعة تضج بالتصفيق الحاد.. والأوضاع تتطور للأسوأ.
الكتاتني: نحن نرفض تهديدات الحكومة بحل المجلس.. ونطالب باستقالة الحكومة وتشكيل حكومة جديدة من حزب الأغلبية.
الجنزوري: يا ابني يا حبيبي ده كلام ليس له أساس من الصحة.. وغير دستوري.
الكتاتني: أنا أولاً مش ابنك.. ثانيًا مش حبيبك.
الجنزوري: أحسن.. بس برضو هذا الكلام غير دستوري.
الكتاتني: يعني إيه غير دستوري.. أنت أكيد ما نمتش كويس.
«تصفيق حاد من النواب الإخوان والسلفيين».
الجنزوري: وأنت أكيد ما قريتش الإعلان الدستوري.
الكتاتني: لأ.. قريته واستقريته..
الجنزوري: يبقي أكيد قريته بس نسيته.. أو مفهمتوش.
«تصفيق حاد من النواب التانيين»
الكتاتني: النواب المحترمين اللي صقفوا دلوقتي أنا عارفهم واحد واحد واسم اسم.. وكلهم يحولوا للجنة القيم لمخالفتهم لوائح المجلس.. لأنهم صفقوا للحكومة.. بينما هم من الشعب.. والحكومة طول عمرها ضد الشعب.
الجنزوري: أنا لا أقبل هذا التشهير بالحكومة وأرجو التحفظ علي التسجيل الحرفي لكلام رئيس المجلس لمحاسبته علي التشهير بالحكومة وتحريض الشعب عليها.
الكتاتني: وأنا لا أقبل.. تهديدات الحكومة وتلويحها بحل مجلس الشعب.. في الرايحة والجاية.
الجنزوري: وأنا أرفض أن تضع علي لساني تصريحات لم تصدر مني.
الكتاتني: وأنا عندي شهود إثبات.. وعلي رأسهم الفريق سامي عنان.
الجنزوري: وأنا عندي شهود نفي.. وعلي رأسهم الفريق سامي عنان أيضًا.
الكتاتني: ما دام حصلت إنك تكدبني خلاص فركش.. ورفعت الجلسة.. وتعلق جلسات المجلس للأحد المقبل.. وإضراب واعتصام. وخلصت الشغلانة فركش.. فركش!!
«النواب جميعًا يطلقوا صيحات الفرح هييه.. هييه.. ح نروح.. ح نروح هييه».
المشهد الثاني «ليل داخلي»
«الكتاتني يجلس في منزله.. وقد التف حوله كل النواب من الإخوان والسلفيين.. وهم يعاتبونه علي أنه علق الجلسات».
أحد النواب: يا ريس.. ليه علقت الجلسات.. مش احنا أولي بالقرشين اللي بيطلعولنا بدل جلسات.. وبعدين إحنا نسيب لهم الملعب فاضي ليه.. وننسحب من قدامهم.
الكتاتني: يا ابني أفهم.. أولاً بالنسبة للقرشين ما تقلقوش المرشد العام محضر لنا أضعافهم.. «يخفض صوته ويقول هامسًا».. إحنا عندنا مهام مكلفين بها من المرشد أهم بكتير من الجلسات.
النواب: إيه هي يا ريس؟
الكتاتني: سوف تعودون إلي دوائركم جميعًا لتساندوا مرشح الإخوان بكل قوة وتقفوا بجواره وتقوموا بالدعاية له بقوة وشراسة حتي ينجح.
نائب: إحنا كلنا فداء للدكتور محمد مرسي.. ووراءه حتي ينجح.
الكتاتني: د.مرسي مين يا ابني ما تفهم بقي.
نائب: الدكتور مرسي مرشح الإخوان.
الكتاتني: إخوان مين..؟! أنت عايز تضيعنا!
نائب: اللاه.. مش أنتم أعلنتم أن د.مرسي هو استبن الشاطر.. لو الشاطر استبعد.. فيبقي هو مرشحنا الوحيد.
الكتاتني: يا خسارة تعبي وشقايا معاكم.. يا ابني أفهم.. الدكتور محمد مرسي.. مش مرشح الإخوان!
النواب: أمال مين يا ريس.. احنا كده اتلخبطنا.. ومش فاهمين حاجة!
الكتاتني: يا ابني أنت وهو.. احنا من الأول قلنا إن عبدالمنعم أبوالفتوح هو مرشح الإخوان.. بس ح نعمل أنه خرج من الجماعة وخرج عن طوع المرشد وهو مش مرشحنا.. لكن هو في الحقيقة مرشح الإخوان الحقيقي من أول يوم.. واحنا خرجناه من الجماعة قاصدين.
النواب: يعني هو خرج كده وكده.. يعني.
الكتاتني: أيوه.. ولذلك أنا علقت الجلسات علشان تتفرغوا للدعاية لأبوالفتوح ولم شمل الناس حبايبنا علشان ينتخبوه.. يعني أنتم من النهادره في منحة تفرغ مدفوعة الأجر لحين العودة للمجلس.. مفهوم.
النواب: مفهوم يا ريس.
الكتاتني: فركش كل واحد علي دايرته.
«النهاية الملعوبة»

حكمة D3
■ لو هانت عليك نفسك.. لكانت علي الناس أهون
■ ولو الدولة المصرية بتحترم أولادها داخل البيت..
ما كان لأحد أن يجرؤ علي إهانتهم خارج البيت..
■ من خرج من داره.. اتقل مقداره، فما بالك إذا كان المواطن المصري بيتقل مقداره ليل نهار.. في البيت والشارع.. والمواصلات.. وفي الشغل وفي طابور العيش.. وطابور الأنابيب.. وطابور البنزين.. وطوابير العمل بالخارج.. ياعالم احترمونا بقي!

مساااااااء الفل

■ قد يستطيع الديكتاتور أن يقتل شعباً.. ولكنه لا يستطيع أن يقتل فكرة.. أو يطفئ نوراً.. أو يمنع هذا الشعب من الغناء.
■ ■ ■
■ وقد ينجح الإرهاب الفكري في أن يحبس فناناً.. أو يكتم صوتاً يغني.. أو يحجب فناً.. ولكنه بالتأكيد سيفشل في أن يمنع تدفق الماء في النهر.. وجريان الدماء في الشرايين.. وسريان الفن والإبداع في الوجدان.
■ ■ ■
■ هل أنت حزين لأننا نعيش في وطن عربي.. الديمقراطية فيه كالعفاريت كل الناس تتحدث عنها.. ولكن لا أحد منا رآها حتي الآن!