اكتب اللي يعجبك.. وحعمل اللي يعجبني

قول اللي يعجبك واللي انت عاوزه.. وانا حعمل اللي انا عاوزه حتي لو كان غلط.. هذا هو مفهوم بعض الناس اللي لسه عايشة في زمن الشمولية .. والناس اللي اتلونت وانتقلت من الشمولية الي الرأسمالية الي الديمقراطية.. الاسم ديمقراطية .. والفعل دكاتوتورية.. مفيش في الرياضة مثال أقبح ولا أوضح من اللي موجود في اتحاد العاب القوي .. الجمعية العمومية في وادي .. ورئيس الاتحاد ومديره وربما أعضاء مجلس الادارة في واد تاني خالص.
الجمعية العمومية مش راضية علي المدير.. عاوزه تمشيه.. عيط.. وبكي.. ورئيس الاتحاد اتحايل وطبطب وقعد الراجل بنصف مرتب كنوع من العقاب.. ومع ذلك الغلط مستمر.. بطولة دولية يعملوها في اسماعيلية ومحدش يسمع عنها.. أعضاء مجلس ادارة اتفاجأوا بان عندهم بطولة ميعرفوش عنها شيء.. البيه المدير اختار اللاعبين ودربهم ولعبهم ومفيش مدربين حقيقيين.
اللجنة الفنية في الاتحاد حبر علي ورق.. لجنة المسابقات تقرأ البرامج في الجرايد. كادر المدربين اللي مفروض يكون ستة علي الأقل فيه واحد فقط والثاني و الثالث زهرات.. مرتبات تصل الي 52 ألف جنيه لمدرب واحد ما بيعملش حاجة والمدرب الثاني 4 آلاف والثالث مثله والفعل ولاحاجة.. النقد والتوجيه علي ودنه ولاحياة لمن تنادي.. حسناً فعلوا بأن عملوا بمبدأ: اكتب اللي يعجبك وانا حعمل اللي يعجبني.