استياء بين أهالي بني سويف لارتفاع أسعار الكهرباء مع استمرار انقطاعها

تسود حالة من الاستياء والسخط بين أهالي محافظة بني سويف، بسبب الارتفاع المستمر في فواتير الكهرباء، مع تصاعد في فترات انقطاعها.
"خالد.ر"، من أبناء المحافظة، قال لمراسلنا هناك: "أنا قاعد فى بيت أنا وزوجتي بس. بيتنا كله أوضتين، واحنا ومش موجودين معظم الوقت في البيت. يعني إحنا مش بنستهلك كهرباء كتير أساسًا يبقى إزاي يجيبنا 150 جنيه في الشهر وطلبت من الشركة يراجعوا العداد وقالولي هنيجي ولا حد عبرنا".
وقال "سيد.ج": "الحكومة كل شوية يقولونا وفروا الاستهلاك، واحنا بنعمل زي ما بيقولوا عشان بنحب السيسي، وبنوفر كل حاجة، لكن يجينا في الشهر فاتورة كهرباء ب175 جنيه ليه وازاي؟"
أما أم خالد، فقالت: "عندي التلاجة بايظة، النور يقطع وييجى يقطع وييجى ومش بيكمل حاجة، هما بس بيلعبوا بينا، والأجهزة معظمها بتبوظ والنور قاطع أهو وجايلنا فاتورة كهرباء في الشهر ب130 جنيه يعني الأجهزة بايظة ومش بنستهلك ومغليين في الفواتير واحنا مش بنستهلك أساسًا".
وفي مكالمة هاتفية أجرتها "رصد" مع وكيل شركة الكهرباء في بني سويف، قال إنه "يوجد مشكلات كبيرة في الفترة الحالية في الشركة، ونحن نحاول التغلب عليها ونناشد المواطنين التحمل في الفترة الحالية حتى نستطيع التغلب عليها"، دون أن يوضح أسباب ارتفاع أسعار فواتير الكهرباء.