آخر كلام

× الناس زعلانة من اللى كتبته عن وزير التربية والتعليم..!
ناس بتقول إن خطة تطوير التعليم التى أعلنها الوزير مش بتاعته.. دى خطة الدولة وكانت معدة سلفا من قبل أن يتولى الوزارة..!
وناس بتقول: إن الخطة عبارة عن سلق بيض، سلق بيض دى من عندى، فإزاى خطة لتطويرالتعليم فى مصر.. أكبر دولة فى المنطقة، يحطها وزير
لم يتول المسئولية إلا من شهرين فقط..؟!
بالإضافة إلى تساؤلات طويلة عريضة عن المواد الدراسية التى ألغيت والمواد التى أبقيت..!
وأنا طبعًا معنديش إجابة عن كل هذه التساؤلات.. لذلك على وزيرنا الهمام أن يرد لنا على كل هذا الكلام..!!
× عيب أوى إن مصر صاحبة حضارة الخمستلاف سنة تبقى خطبة الجمعة فيها موحدة فى كل المساجد من أسوان لراس التين..!
والغريبة إن اللى بيختار موضوعات الخطبة كان شاطر أوى فى "الإنشا" فى المرحلة الابتدائية.. فكل خطبة أنقح من التانية.. وهى صالحة بامتياز للنشر فى مجلات الحائط المدرسية..!
مرة يعمل خطبة عن أهمية المياه فى حياتنا ومرة عن أهمية البركة.. مش عارف عن إيه.. موضوعات مدرسية مملة ورتيبة لا يستفيد منها أحد..!
لذلك اتصلت بصديقى الشيخ أسامة فخرى، وكيل وزارة الأوقاف والمسئول عن المساجد فى مصر؛ وطلبت منه تغيير هذا الوضع الغريب الذى لا يليق بمصر؛ واقترحت عليه بدلا من فرض خطبة جمعة واحدة على كل المساجد أن تقترح الوزارة ثلاث قضايا تتناسب مع اهتمامات الناس.. يختار من بينها كل إمام مسجد موضوع خطبته..
وقد وعدنى بعرض اقتراحى على وزير الأوقاف الشيخ أسامة الأزهرى.
يعنى من الآخر كده الكرة الآن فى ملعب الوزير..ياريت يلعبها صح..!
× إيه الحكاية..؟!
مش عارف ليه الطلاب بيتعاملوا مع حفلات التخرج فى الجامعات وكأنها زفة بلدى أو حنة بنت خالتهم "متيحة"..!
رقص ودانس ومسخرة.. وبوس وأحضان.. وصلت إلى حد إن طالب بيبوس ويحضن طالبة زميلته ويرفعها من على الأرض؛ وهى بترقص فرحانة والضحكة فى وشها فدان على أنغام أغنية مسفة من بتوع مهرجانات اليومين دول..!
إزاى الجامعات تسمح بهذه المساخر والمهازل..؟!
صحيح.. الولاد والبنات لازم يفرحوا بالتخرج.. لكن مش بالقوى كده..!
× زى ما توقعت.. فرحنا بميدالية "إبن الجندى"..ونسينا بلاوى بعثتنا لأولمبياد باريس.. ونسينا سوء الإعداد.. والإخفاقات.. وأموال الشعب التى أهدرت.. وراحت خالتى عند خالتك واتفرقوا الخالات..!
عموما ده عادى فى المعادى.. أنا بقالى نصف قرن صحافة على الحال ده.. بأنفخ فى قربة مقطوعة..!