آخر كلام

# بعد ما قرر وزير التموين إلغاء توزيع الأرز على بطاقة التموين "خوفا من بهدلته".. والله العظيم هو اللي قال كدا؛ ياريت يشيلوا بالمرة الزيت والسكر والشاي ومعاهم وزير التموين ووزارته كلها.. بسلطاتها وبابا غنوجها..!!
# بالمناسبة.. نفسي ومنى عيني حد ابن حلال يفهمني إيه شغلة وزير التموين بالضبط.. يعني "إنتى جاية تشتغلى إيه بصوت المرحومة ماري منيب..؟!"
إذا كانت على شغلانة المناقصات واستيراد السلع الأساسية فدى شغلانة ممكن تعملها شركة أو مكتب بتلات أربع موظفين بدون أي وزير ولا يحزنون..!
أما عن شغلانة إدارة بطاقات تموين الغلابة؛ اللى كل شوية بيشيلوا حاجة منها.. فدى شغلانة سهلة جدا ممكن يعملها أى موظف صغير مش وزير..!
والله العظيم وزارة التموين بتفكرني ب"إدارة عموم الزير" اللي كانت مش محتاجة أكتر من غفير فعملوا لها إدارة ومدير…!
# إيه الحكاية..؟!
ماسورة إعلانات وضربت في البلد كلها لشركات بتبيع مقابر أشكال وألوان..!
وأقسم بالله غير حانث عن تجربة شخصية عانيت منها منذ أيام قلائل إن النصب في حكاية بيع المقابر شغال على ودنه والمقبرة الواحدة بتباع لأكثر من شخص؛ وماحدش في البلد بيحاسب حد تحت الشعار الخايب: "القانون لا يحمي المغفلين"..!
أظرف ما في الموضوع إن كل شركة بتتباهى إن مقابرها مجهزة من مجاميعه.. مية ونور.. وتشطيبها سوبر لوكس؛ وإن المرحوم لن يعانى من أية مشاكل…!!
يعنى من الآخر كدا كل الشركات بتؤكد إن مقابرها "بترد الروح"..ومش ناقص غير إنهم يقولوا إن اللي هايشتري منهم مقبرة هايدوله صك بدخول الجنة بلا أي حساب أو سابقة عذاب..!!
#….. وإحنا مالنا هي حرة في شعرها تفرده.. تتنيه.. تعمله "بوجوديه".. أوتقص منه حتة ..أو تحلقه "زلبطة".. شعرها وهى حرة فيه.. إيه الشجاعة اللي في كدا..؟! بصراحة مش عارف..!
يخرب بيت التفاهة والتافهين والتافهات.. الأحياء منهم والأموات..!!
# أما الأب الذى ظهر"بمنتهى الجليطة" في فيديو، وهو يأكل سمك برز أبيض، ليدافع عن ابنته بكلام خايب عبيط؛ مشجعا لها على نجاحها فى ركوب "الترند".. فهو يؤكد بما لا يدع مجالا للشك إن نفس الطينة من العجينة؛ و"إن اللى ربى بتاع مربى" ..لامؤاخذة..!!