تناتيش

* بوصفى مواطناً صالحاً وشريفاً أرفض شكلاً وموضوعاً كلام البنك المركزى عن ارتفاع نصيب كل مواطن من الدين الخارجى إلى 413.6 دولار.. واحنا مالنا.. الحكومة هى اللى استلفت وهى اللى تسدد.. فاللى شبكنا يخلصنا على رأى العندليب الأسمر..!
* إذا كانت دراسة بريطانية حديثة قد أكدت أن الستات فى بريطانيا بيكذبوا 468 مرة فى السنة حول ما يأكلونه.. فإننى أعرف واحد كداب برخصة بيكدب كما يتنفس مع كل شهيق وزفير.. أول حرف من اسمه بدون ذكر أسماء «بنيامين نتن.. ياهو»..!!
* إيه الهرتلة والفوضى دى..؟! إزاى فريق المقاولون يهزم فريق الداخلية فى الكورة، وإنبى يغلب الشرطة..!
أنا لو من وزارة الداخلية أعمل للمقاولين وإنبى محضر ضبط وإحضار، وألفف كل لعّيب دخَّل جون فى الداخلية والشرطة كعب داير على السبعة والعشرين مديرية علشان يقول حقى برقبتى..!!
هى البلد بقى فيها فوضى من شوية..!!
* دى مش نكتة: فى السعودية أجروا عملية جراحية نادرة ل «فرخة»، أى والله فرخة، تعانى من فتق بطنى..!
أنا معلوماتى المتواضعة بتقول إن الفراخ مابيتعملهاش عمليات.. دى بيتعمل عليها طبق كِشك، أو طبق شوربة..!!
صحيح أخويا هايص وأنا لايص!!
وبعدين هى ليه الحكومة بتعاملنا معاملة البطة السودا اللى دايماً فى الفرح منسية.. وفى الهم مدعية..؟!!
* كلمات من زمن فات :
أستأذن قارئى العزيز فى استحضار ذاكرة ما كتبته عن الفساد والفاسدين والتى تؤكد أننى كنت واقفاً فى ميدان التحرير على مدى 18 عاماً مضت، لم يسلم فيها وزير ولا غفير من سن قلمى:
* بعد المذبحة البشعة التى تعرض لها طلبة شُعبة الرياضيات فى (السنوية العميا).. فإننى أدعو أبنائى طلاب المرحلة الأولى الذين تقل مجاميعهم عن 95% أن ياخدوها من قصيره، ويتوكلوا على الله ويحولوا أدبى..! فمسئولو التعليم عندنا رافعين شعار (الأدب فضّلوه عن العِلم)، وموتهم وسمهم أن ولادنا يتفوقوا فى الرياضيات والعلوم وأى مسئول يقول غير كده، فهو خليفة أبو لمعة الأصلى فى الملاعب..!
وقد يسألنى أى طالب: وماذا سأعمل بعد التخرج.. سأقول له على الفور: لا (تكلك).. حكومتنا الإلكترونية سترعاك.. وستوفر لك ولأمثالك من النابغين النابهين مكاناً على الرصيف يرد الروح.. فى طابور العاطلين.. وسلِّم لى على الحكومة الإلكترونية..!
«نشرت فى 6 أغسطس عام 2005»