مساء الخير.. مسلم ولا مسيحي؟

والله العظيم يا جماعة أنا هاتجنن.. وجنان رسمي هايوديني السرايا الصفرة بعيد عنكم..؟! معقولة كل شوية مافيش شغل ولا مشغلة إلا حكاية الطائفية واللعب بالأديان وضرب ودغدغة مشاعرالناس واستغلال عواطفهم الدينية؟!
الناس يا اخوانا مش عارفة تروح فين وتعمل إيه! كفاية عليهم العذاب والفقر اللي ملازمهم علي طول! أنا شخصياً عاوز أعرف حاجة مدوخاني ومطيرة النوم من عيني، اشمعني احنا في مصر المتدينين قوي سواء كان مسلما أو مسيحيا بأمارة إيه..؟! طب عيني في عينكم كده..؟! طب لما إحنا متدينين قوي كده..! ليه الحقد والحسد والغل والشر اللي بلا حدود مع بعضنا..؟! وليه الانفصام في الشخصية اللي موجود عندنا..؟! كل الشعب المصري يقول ما لا يفعل إلا من رحم ربي..!! الواحد من حبايبنا يحلف ميت يمين وميت طلاق في البيعaوالشراء وفي الحياة اليومية علي الباطل والكذب..!! ولما تتكلم معه يتحدث وكأنه شيخ مشايخ الإسلام أو مثل قداسة البابا..؟! صحيح الحكومة عندها حق في غلق قنوات شلة الأرزقية بتوع الثلاث ورقات..!!
كل واحد يفسر الدين بمزاجه ويحكي حكايات وهمية ما أنزل الله بها من سلطان.. معتقدين أن المشاهدين الغلابة شوية أفف لا مؤاخذة!! المصريون دول ولاد إيه.. عارفين كويس الخبيث من الطيب..!! وعارفين كمان شوية النواطعية المتآمرين اللي بيلعبوا بالنار وعاوزين يولعوا الدنيا نار! بس علي مين..؟ أنا شخصياً مش مع المنع ولكن مع التنظيم وفرض القانون..! ده لأول مرة أشعر بسم الله ما شاء الحكومة المصرية بقي لها أظافر وأنياب..!! والله أنا خايف لأحسدها.. وعمال أفكر وأقول إيه الجراءة دي اللي ظهرت مرة واحدة عند حكومة الدكتور نظيف!! واضح أنها بلعت حبوب الشجاعة اللي كان بياخدها عمنا فؤاد المهندس!!
عموماً دي خطوة تحسب للحكومة وعقبال ما يتحرك شوية المثقفين كمان ويناقشوا دعوة الدكتور الطيب شيخ الجامع الأزهر لوأد الفتنة..!! يكفينا بصراحة المشاعر الجياشة التي أبداها قداسة البابا شنودة في لقائه الأخير علي شاشة التليفزيون الذي أكد رغبته في لم الشمل بين عنصري الأمة المسلمين والمسيحيين..!!
عيب يا اخوانا اللي بيحصل ده.. الشريعة الإسلامية وضعت أصحاب الأديان السماوية في منزلة الأشقاء والرسول محمد عليه الصلاة والسلام قال .لهم ما لنا وعليهم ما علينا وقال أيضاً إن شعب مصر بجميع طوائفه في رباط إلي يوم القيامة..! وقال السيد المسيح .مبارك شعب مصر...!!
عشان كده أنا بقول بصراحة شديدة وبوضوح لشوية الأونطجية اللي واخدين الدين سبوبة حلوة سيبكم من حكاية حدوتة الإسلام هو الحل والآخرون يقولون المسيحية هي الحل..!! وكأن البلد دي ملهاش حكومة ولا نظام.. حل إيه يا أولاد العفاريت..؟! إلهي يحل وسطلكم قادر يا كريم..!! أنا مكنتش عارف اضحك ولا أبكي وأنا أتابع بعض الحوارات الجانبية من بعض العامة الذين لا يعرفون الألف من كوز الدرة وهما عمالين يجادلوا في بعض مدعين بالافتراءات علي الاديان ويشتموا بعض جاعلين الدين هزلاً بينهم!!
المهم إن الواحد منهم بتاع ثلاث ورقات كل همه أن يقول .البقين الحامضنين. بتوعه ويفلسع والله العظيم الكلام الخايب ده، هو اللي مضيعنا ومودينا في ستين داهية!!
وتيجي تدور علي من يحاسب شوية الشكحلية الأرزقية المدعين سواء من الجانب ده أو من الجانب ده تشعر أن علي رأسهم ريشة! ايوه ريشة من فرخة عيانة بإنفلونزا الطيور!! وعندما تحاول أن تحاسبهم تقوم الدنيا وما تقعدش ازاي تحاكموا رجال الدين الافاضل المحترمين..؟! حرام عليكم يا كفرة!! وتخش بقي علي شوية الحنجورية اللي دماغهم لسعة يدعوا عليك تارة ويشتموك تارة وطبعاً حبايبنا الغلابة مش فاهمين الحكاية ويظهر التطرف وتشتعل النار علشان شوية حمير مابيفهموش حاجة في الدين ولعوا الدنيا..!! يا إخوانا حرام عليكم الغلابة.. كفاية عليهم نار الأسعار والبطالة وقلة الحيلة.. صحيح ناس هايصة وناس لايصة..!!