مالكم ومال الستات؟

تصدقوا فى ناس عايزة تعمل عربيات للسيدات فى الميكروباصات زى عربيات المترو كدة... ليه وإزاى؟ الموقف ده أنا عشته شخصياً إمبارح وأنا مروحة البيت، قادنى حظى السيئ إنى أركب من رمسيس، ركبت ميكروباص بالعافية ومكنش فى كرسى فاضى، فوقفت جنب بنت قاعدة على الحرف، وحطيت شنطتى على الأرض وسلمت أمرى لربنا وقلت استعنا على الشقا بالله، البنت كتر ألف خيرها استحملتنى ومتكلمتش خالص، أما اللى اشتكى فكان الراجل اللى قاعد جنبها فى وسط الكنبة!! الراجل مش عاجبه إنى واقفة وعاملة زحمة! وراح دعا عليا وعلى الستات كلها ربنا ياخدهم ويريحنامنهم، وقال بالنص كدة «ما يعملولكم عربيات سيدات زى عربيات المترو ويريحونا من أشكالكم والذنوب اللى بنشيلها، وربنا ياخدكم ونستريح من الهم ووجع القلب وزحمة الشوارع»!!!! الحقيقة لم أتمالك نفسى ورديت عليه وقلتله معلش هو أنا جيت جنبك ولا حتى البنت جت جنبك علشان تدعى علينا بالشكل ده؟ أنا ولا أى ست عمالنالك إيه؟ للأسف الشديد لقيت العربية بترد عليا إنه أنا اللى عيب، وميصحش أرد، وإنه راجل كبير، فرحت ساكتة، ومرة واحدة الراجل طلع فيا وقالى «وبعدين إنت إيه إللى منزلك من بيتك أصلاً، وترجعوا تشتكوا من التحرش والمعاكسات ما أنتو السبب، «المرة دى البنت اللى قاعدة جنبه هى اللى ردت» لما أنت مضايق كدة من وقفتها مورتناش الشهامة ليه ووقفت وهى تقعد مكانك، مفيش حاجة اسمها إيه إللى نزلكم من البيت ومتشتكوش من التحرش، أو بصوا لنفسكو وأنتو السبب، الكلام ده ميقولوش غير واحد متحرش جبان وحيوان يبرر كل حاجة لنفسه ويرمى الذنب على غيره، المهم الراجل معرفش يرد، شوية والراجل نزل وإحنا بعديه نزلنا، فى رأيى المشكلة مش فى الراجل ده بس ولا فى إللى بيقول عيب متردوش، العيب فى الثقافة السائدة فى المجتمع، وبتعتبر البنت كائن درجة تانية أقل مرتبة حتى من الطفل الصغير وبتعاملها على إنها شئ مش أكتر. طيب ليه؟ وإمتى ابتدى الكلام ده؟ وامتى هنلاقيله نهاية؟ لازم الناس تعرف إن الست والبنت محدش يقولها إنت نازلة من بيتكم ليه، وبتشتغلى ليه ومتشتكيش من المعاكسات والتحرش، البنت متتعراش ونقول ما هى السبب، إيه إللى نزلها من بيتها ولبسها عباية بكباسين.. البنت مينفعش حد يبصلها على إنها مجرد جسد وخلاص من حقه يعمل فيه إللى هو عايزة، وأخيرا، الحل مش عربية سيدات، إنما فى تغيير ثقافة المجتمع ده، الحل فى إفهام الناس كلها وأولهم الستات إنهم مش كائنات ضعيفة ولا درجة تانية، بس الأهم من ده كله إن محدش يطبق فكرة عربيات ميكروباص للسيدات، أنا مش هدخل الجيتو برجلي، وأرفض تماما مبدأ الفصل العنصري، أنا ضد كل أشكال التمييز وأولهم التمييز ضد المرأة، وعربية السيدات شكل من أشكال التمييز. نهلة محمد