أمى وبحبها

طبعا كل الناس شروق الشمس عندها معناه بداية يوم جديد جميل مشرق، ولكن، أنا بقى شروق الشمس عندى معناه بداية جديدة لرحلة تحتوى كل الوان العذاب، تبدأ فى تمام الساعة الخامسة ونص، اصطبحنا واصطبح الملك لله، طبعا الفطار ده من رفاهيات يومى التى لا?تظهر إلا فى العطلات والإجازات الرسمية للدولة، وبتيجى مرحلة لبس الهدوم، وديه مرحلة غير مهمة أوى لأنها بتحصل وأنا لسه تحت تأثير غيبوبة النوم،ماعلينا وصلنا لتانى أهم مراحل رحلة العذاب، وهى البحث عن أى مواصلة (بقول أى) زمان من كام سنة فاتوا كنت بهتم جدا بلون التاكسى، وشكل السواق، ونوع الميكروباص قبل ما اركبه، دلوقتى نضجت وعرفت أن الشكليات لا تؤثر فى اختيارنا للأشياء، والاهم هو الجوهر، فبالتالى سلم أتوبيس النقل العام هو التعبير الحقيقى للنضوج، الحمد لله وصلت وأنا فى قمة استعدادى لاستقبال كلمتين البستفة اليومية من مسئولة التوقيع فى مدرستى الجميلة النظيفة المتطورة وطبعا الابتسامة مش بتفارق وشى حتى وأنا باخد الكلمتين، أصلى خلاص اتعودت، مهو أنا مفتكرش إنى وقعت فى دفتر الحضور والانصراف غير مرات تتعد على صوابع اليد، استعنا على الشقا بالله وطلعت السلم لحد الدور الثالث عشان أوصل لمكتبتى الجميلة المنظمة، وابدا اشتغل حصصى اللى هما يدوبك 8 حصص فى اليوم بس مع الطلبة المؤدبين الملتزمين بالزى المدرسى، مهو احنا فى مدرسة حكومة، ما علينا، أنا طبعا بشتغل عشان احلل الكام ملطوش، أقصد مرتبى العظيم، وطبعا الابتسامة لسه مستمرة على وشى، ومحدش نهائى بيسمعنى بندب حظى،ولا بدعى على اللى كان السبب فى اختراع مايسمى بمهرجان القراءة، ولاعلى اللى كان السبب فى دخولى لهذا السلك الوظيفى، ورغم كل ده، بس الحمد لله بتيجى لحظة يتم فيها إعلان انتهاء الحرب لهذا اليوم، أقصد انتهاء اليوم الدراسى.
خلاصة الكلام، أنا حبيت اقول إنى بحب أمى جدا، رغم كل حاجة وأى حاجة بتحصلى بسببها أو?منها، ماهى مصر هى أمى، ومحدش بيختار أمه. شيماء على