دنيا: إيمى ابنتى.. ونزار ينسينى همومى

نفت الفنانة الشابة دنيا سمير غانم الشائعات التى ترددت حول زواجها من نجم الكوميديا أحمد مكى، بعد تألقهما فى أكثر من عمل معا، آخرها الجزء الثانى من مسلسل «الكبير قوى»، مؤكدة أن علاقتها بشقيقتها إيمى سمن على عسل، بعكس ما أشيع أيضا عن وجود خلافات بينهما.
وقالت دنيا فى صفحتها على الفيس بوك: «الحياة مليانة ورد وشوك، مش صح ولا ايه .. بس النهاردة عاوزة أكلمكم شوية عن شوك الشائعات .. بصراحة أكثر ..الفن لا يعطى خصوصية لحياة صاحبه .. ومنذ أن بدأت التمثيل أجد نفسى أسير وتسير الشائعات من خلفي.. والكلام ده ينطبق على بنات جيلى من الممثلات .. والغريب أن أى إشاعة من شأنها أن يصدقها الناس عنا حتى ولو لم يكن لها أى أساس من الصحة، لكنى بطبيعة الحال أصبحت محصنة ضد التأثر بهذه الإشاعات وأكثر صلابة تجاهها».
وعن علاقتها بإيمي..قالت: « ساعات كتير بحس إن أنا وإيمى أختى مش مجرد أختين اتولدوا من بطن واحدة ولا مجرد اسمين بيربطهم اسم أب واحد فى البطاقة.. أنا بحس إنها كل حاجة فى حياتي.. أقول لكم على سر.. أنا ساعات بخاف عليها وبحسها بنتى بالظبط.. إحنا دايماً بنتعامل أنا وهى وكأننا أصحاب يعنى مفيش أسرار بنخبيها عن بعض وإحنا متعودين على ده من صغرنا.. ماما كانت دايماً تقول لنا إنتوا مالكوش غير بعض ولازم تبقوا أصحاب مش مجرد أخوات وبس.. أنا ساعات كتير بسيب غرفتى وأروح أنام جنبها لأنى بحس إنى مش خايفة من أى حاجة وأنا فى حضنها وبسأل نفسى كتير أنا ليه بحس كده ناحية إيمى وبتكون الإجابة إن إحتمال علشان سننا متقارب أوى وتفكيرنا تقريباً واحد.. وعلى فكرة أنا أكتر حاجة بحبها فى إيمى إن دمها خفيف موووت وبتفضل تضحكنا وبتموتنا من الضحك لما بنخرج مع أصحابنا».
وعن هواياتها الأخرى غير التمثيل والغناء..قالت دنيا سمير غانم: « أنا فعلاً بحب الشعر وبحاول دايماً أختلس ولو دقايق من وقتى علشان أقرا فيهما أشعار تصفى ذهنى.. بنسى نفسى بالذات لما بقرا أشعار نزار قبانى لأنى بشوف إنه الشاعر الوحيد تقريباً اللى رفع مكانة المرأة أوى وأنا بصفة عامة بحترم الرجل اللى يحترم المرأة ويقدر فيها عقلها وذكاءها وروحها الطيبة مش بس مجرد شكلها وجسدها. هى دى أكتر لحظات بحب أقضيها مع نفسى.. لأنى زى ما قلت بميل أكتر للهدوء وبفضل أكون بعيدة عن أى دوشة وصخب. حرجع تانى وأكتب لكم بعد كام يوم كده لما يعدى الويك إند ده».