تناتيش

* متهيألى أبسط واجب نعمله مع الأخ اللى عامل فيها «أسد» وبيرتكب مجازر يومية ضد الشعب السورى العظيم إننا نبعت له السفير بتاعه على أول طيارة راجعة دمشق؛ لأنه بصراحة أثبت أنه «أسد على شعبه.. وأمام إسرائيل نعامة».. لامؤاخذة!
* أتمنى إننا مانشوفش النهاردة فى محاكمة العادلى وبكرة فى محاكمة مبارك محاميى «الشو» النص كم؛ اللى ظهروا فى الجلسة الأولى واللى هايضيعوا دم الشهداء هدراً، وهايودوا أهاليهم فى طوكر..!
ياريت فطاحل المحامين، اللى بحق وحقيق يرحمونا منهم، لأن أفضل وصف لهم هو أنهم كالمنخنقة والموقوذة والمتردية والنطيحة.. وما أكل السبع..!
يعنى بالبلدى كلهم على بعضهم طايلهم البارومة وراشين دواخل لامؤاخذة..!!
* بالمناسبة أتمنى أن يعامل «المتهم» حبيب العادلى اليوم وهو فى قفص الاتهام معاملة عادية كأى متهم عادى وليس كوزير داخلية..!
فحكاية معالى الباشا الوزير دى كانت زماااااان.. وعايزنا نرجع زى زمان قول للزمان ارجع يا زمان..!
* بعد أن اعترف حارس المرمى السابق على الهواء مباشرة بتزوير الانتخابات مع سبق الإصرار والترصد.. أقترح أننا نعمل مع سيادته أحلى واجب ونرجعه يلعب حارس مرمى تانى.. لفريق «الأسد المرعب» فى ..... ليمان طرة..!
* إيه الهرتلة دى..؟! قال إيه خمسة معتقلين بأحد السجون الألمانية أضربوا عن الطعام علشان إدارة السجن مانعة الإنترنت والقنوات الفضائية عنهم..!
ناقص كمان يطلبوا من ضباط السجن يضربوا لهم تعظيم سلام فى الرايحة والجاية.. يكونش فاكرين نفسيهم فى ليمان طرة.. وللا فى ليمان طرة..؟!
* كلمة ورد غطاها:
* شفت فى النمسا بيعملوا إيه..؟! بيدللوا الأبقار وبيسمعوها موسيقى موتزارت علشان تحلب أكتر..؟!
** صحيح ناس هايصة وناس لايصة.. احنا البقر اللى عندنا يتجننوا لو سمعوا موتزارت، لأنهم متعودين يسمعوا أغنية هوبا: «وشربت حجرين ع الشيشة»..!