تناتيش

* لو صح اتهام السفيرة الأمريكية لدى الأمم المتحدة «سوزان رايس» للعقيد القذافى بأنه يقوم بتوزيع الفياجرا على جنوده لكى يقوموا باغتصاب المعارضات والأطفال.. فمتهيألى إن العقاب الوحيد للقذافى هو أن يسجن فى زنزانة فيها 10 رجالة عتاولة عضلات ومجانص وكل واحد منهم واكل طاجن بامية بالفياجرا وشارب شوب عصير قصب بالفياجرا برضه.. علشان يوروه النجوم فى عِز الضهر.. ويطلعوا على جِتته البلا.. من دار لدار.. ومن زنجة لزنجة..!
* جرى إيه يا جماعة.. ماترحموا دماغنا شوية..؟!
فكاتب معروف من كُتّاب السلطة والنظام السابق من دعاة التوريث اسمه مسبوق ب «دال نقطة» طلع علينا بمقال يعظنا فيه بعدم صناعة الفرعون..
وهو يا حرام، أى الكاتب، تذكر فجأة أنهم خدعوه بالمادة 76 التى تخيل أنها لإصلاح الحال، فاكتشف، بعد فوات الأوان، أنها كانت تعد للتوريث بطريقة قانونية ولكن ضد إرادة الشعب..!!
جرى إيه يا جماعة..؟! غيروا جلدكم زى ما أنتم عاوزين بس بلاش تغيبوا ذاكرتنا.. وتلعبوا فى الجمجمة.. لأننا، بصراحة، شلنا العصافير من زمان..!
* بعد الراجل اللى ورا عمر سليمان.. وبعد الراجل أبوجلابية.. أصبح هناك «الراجل أبوملاية»، يعنى اللى بيخبوه بملاية السرير وهو رايح أو جاى من التحقيق..!
أتحدث عن فتحى سرور وصفوت الشريف وباقى الشلة..!
* إعلان فى الإذاعة هذه الأيام بيقول: «الشعب يريد عودة الملكية»..!!
متخافوش قوى كده.. دا طلع إعلان عن بيتزا وسعرها 69 جنيه.. بس!!
منتهى التهييس مش كده..؟!
* بالمناسبة أتفق تماماً مع كل اللى قاله عقيد شرطة فى إذاعة «راديو مصر».. صباح يوم الثلاثاء الماضى حيث أكد أننا يجب أن نشخط فى الشعب ونورى له العين الحمراء، لأنه زودها قوى، والكيل زاد وفاض..!
فالشخط والنطر والعين الحمرا والسودا، وكل الألوان، هاتخلى الناس تتلم شوية.. وأهو بالمرة يحددوا النسل.. فأول ما الواحد من دول يسمع الشخط والنطر هايقطع الخلف على طول.. جتها نيلة اللى عايزة خلف!!
* الغيرة يا أبلة..؟! بصراحة كده.. الغيرة بتاكل قلبى.. وحالتى النفسية لا هى على حامى ولا على بارد من المذيعة الجميلة، ودى مش معاكسة، والجامدة جداً، ودى مش مبالغة دينا عبدالرحمن صاحبة البرنامج الرائع صباح دريم.. فهذه المذيعة الرقيقة تستاهل تقلها دهب هى وفريق إعدادها الرائع.. فهى تقدم فى كل صباح جريدة كاملة لا حدود لحريتها.. وهى تدير الحوارات بذكاء وهدوء رائع نحسدها عليه.. كصحفيين..!
ياريت كل الصحفيين يجربوا نار الغيرة، على قولة المطربة وردة، زى ما أنا جربتها.. منك لله يا دينا..!
* كلمة ورد غطاها:
* ممكن تقول لى حضرتك:: لو عبدالحليم حافظ كان لسه عايش دلوقت.. كان هايعمل إيه فى مطربى البانجو بتوع اليومين دول..؟!
* * الشر بره وبعيد..!! دا كانت حصلت أزمة وقود؛ لأنه كان هايولع فيهم كلهم بجاز وسخ..!