آخر كلام !!

* إذا كان وزير التربية والتعليم شال المرارة بعد معركته مع بتوع الكتب الخارجية.. أمال هايشيل إيه لو دخل معركة مع بتوع الدروس الخصوصية..؟!
ربنا يستر على الوزير.. وعلينا..!
* بعد أن أصبح توزيع الطماطم هو أحدث وسيلة للدعاية الانتخابية.. ربنا يستر.. ومايوزعوش «باتنجان» على الناس.. فالناس، من اللى بيحصل حواليها، مش ناقصة باتنجان خالص..!!
* أنا آخر واحد يجامل الحكومة ورئيسها المحترم د. أحمد نظيف، هى تعلم ذلك وأنا أيضاً، لكن أمانة الكلمة تقتضى منى أن أوجه التحية للدكتور نظيف كلما اجتمع بمجلس المحافظين فى محافظة من محافظات مصر بعيداً عن القاهرة.. وهو بالمناسبة أول رئيس وزراء فى مصر يفعل ذلك..
فمصر ليست هى القاهرة وحدها.. بزحامها ومشاكلها وهمومها وأفندياتها.. فباقى محافظات مصر فيها شعب كادح.. وعامل محترم.. يستحق من الحكومة ومن كل واحد منا أن نحل له مشاكله وهمومه..
مليون تحية للدكتور نظيف الذى عقد مجلس المحافظين الأسبوع الماضى فى محافظة غالية علينا جميعاً.. دمياط.. بلد التجار والشطار..!
* بالمناسبة هذه النكتة رواها لى أحد الدمايطة بمناسبة شائعة بُخل الدمايطة..!
فقد ذهب رجل ومعه بعض أصدقائه لزيارة دمياطى فى بيته.. فأخذ ينادى على الدمياطى دون أن يرد عليه..
وفى النهاية قال الرجل للدمياطى: يا شيخ حرام عليك رد علىّ كلمنى.. دا سيدنا موسى عليه السلام كلم ربه..!
فاضطر الدمياطى للخروج من بيته وهو يقول للرجل بغيظ: سيدنا موسى عليه السلام كلم ربه لوحده.. مش جاب معاه أورطة رجاله..!!
* بصراحة أنا جاى أهدّى النفوس مش أكتر..!
عيب قوى إن لاعب الزمالك «إياه» يبقى ملطشة الفريق فياخد بالقلم على وشه من اللى يسوى واللى مايسواش..!!
وعيب قوى إنه مايبقاش «حازم» مع عضو مجلس الإدارة اللى ضربه بالقلم ولَسِّن عليه وعلى أهل بيته..!
أنصحه بأنه يعمل له أى منظر يرد به كرامته المهانة.. يلجأ للقضاء.. أو يعمل أى حاجة ومايسكتش.. فكما أن الحرة تموت ولا تأكل بثدييها.. فإن اللاعب يموت ولا ياكل.. «على قفاه»..!!
* كلمة ورد غطاها:
* شفت فى كوم أمبو عملوا إيه..؟! عملوا أول متحف للتماسيح فى الشرق الأوسط..!
** بشرة خير.. عقبال مايعملوا متحف للحيتان اللى مالية البلد اليومين دول..!