آخر كلام !!

* يا جماعة ماتفضوها سيرة بقى..!!
هو يعنى العالم الدكتور عادل فؤاد رمزى اللى انتخبوه منذ أيام رئيساً لكلية الجرّاحين الدولية مالقاش غير البحث العلمى فى مصر اللى يفتح عليه النار ويقول إنه تهريج وأكذوبة كبرى، ويفتقر للتنظيم وللدماغ..؟!!
يا دكتور كلنا عارفين، وقبلنا وبعدنا الحكومة كلها، إن أحوال البحث العلمى عندنا لا تسر عدواً ولا حبيباً، وأنه فى آخر قائمة اهتماماتنا، وأنه تهريج فى تهريج.. وأكذوبة كبرى.. كل ده عارفينه وأكتر.. لكن خلاص بقى.. الرحمة حلوة.. فالضرب فى الميت، اللى هو البحث العلمى،.. حرام.. حرام..!!
* متهيألى الباشمهندس بتاع جمعية «سى السيد»، أى والله سى السيد، لحماية الرجّالة من جبروت الستات بينفخ فى قِربة مقطوعة..!
قال إيه بينظم برنامج لتدريب الرجالة على استرداد كرامتهم قدام ستاتهم!
«سى السيد» ده يا جماعة مش موجود غير فى أفلام الأبيض والأسود بتاعة زمان.. أيام الطرابيش والست أمينة اللى ماتعرفش فى حياتها غير تلات كلمات وبس: «حاضر يا سى السيد»..!
كما أن الواحد ممكن يدرب الرجالة على تغيير جلدة الحنفية أو البلاتين والبوجيهات والكوندينسر، لكن يدربهم علشان يبقى عندهم كرامة فأهو ده اللى مش ممكن أبداً على قولة الست أم كلثوم..!
ياباشمهندس يا بتاع «سى السيد».. كان غيرك.. أشطر..!
* استقدام الحكام الأجانب للمباريات، خاصة اللى الأهلى طرفاً فيها، أصبحت موضة خايبة..!
فالنادى من دول بيبقى غلبان وضاربه السلك ويدفع 15 ألف دولار نقداً وعداً لحكام أجانب «نص لبده».. المهم أنهم بشعر أصفر وعيون خضرا وبيرطنوا أجنبى..!
يا جماعة عيب.. دى الكورة اللى بتتلعب عندنا ماتفرقش كتير عن عجين الفلاحة.. يعنى حرام كل الفلوس اللى بتندفع فى الحكام الأجانب.. فالجنازة حارة.. والميت لامؤاخذة.. كلب..!
* لكل العرب من المحيط للخليج: افرحوا الأمم المتحدة اختارت يوم 18 ديسمبر يوماً عالمياً للاحتفال باللغة العربية.. اللى احنا ممرمطينها وجايبين مناخيرها الأرض..!
نقول إيه..؟ كونجراليتوليشن..!! يعنى مبروك بالإنجليزى يا مرسى..!
* إذا كان بتوع «كراسة الأول» مجرد كراسة انتصروا على وزير التربية والتعليم وأوقفوا بالقضاء تنفيذ قراره بدفع مبالغ مالية كحقوق ملكية للوزارة.. أمال بتوع «سلاح التلميذ» هايعملوا إيه؟!
ربنا يستر ويجيب العواقب سليمة!
* كلمة ورد غطاها:
* شفت فى فرنسا عملوا إيه..؟! حطوا صناديق زبالة فى الشوارع بتغنى للناس..!!
** يا سيدى على الروقان.. الصناديق دى لوحطوها فى شوارعنا بدل ماتغنى.. هاترقع بالصوت الحيانى..!!