آخر كلام !!

* البابا شنودة له مكان ومكانة فى قلوب كل المسلمين، وأنا منهم، قبل الأخوة المسيحيين فهو رمز من رموز الوطنية المصرية.. عاقل.. رزين.. فاهم.. واع.. لديه روح ابن البلد الحقيقى.. وقبل كل هذا وذاك يفهم دوره الوطنى والقومى جيداً.. وهو دائماً ما يطفئ الحرائق التى يشعلها الآخرون عن جهل أو عن عمد لتمزيق نسيج وحدتنا الوطنية..!
* يا جماعة اتقوا ربنا يا مفتريين يا ظلمة.. كيلو الطماطم فى الأحياء الشعبية بتسعة جنيه.. أُمال الفقير يطبخ الخضار الأرديحى بإيه؟!.. بمية الطرشى..!!
واللى غايظنى أنه وسط كل هذا الغلا والكوا يخرج علينا جهاز حماية المستهلك ليؤكد أن الأسعار فى غاية الاستقرار.. والناس آخر انبساط وحياتهم زبادى فى الخلاط..!
هى حاجة من اتنين: إما أن جهاز حماية المستهلك نايم فى نومة بياكل رز، من أبوخمسة جنيه، مع الملايكة، أو إن احنا مش من البلد دى..!
واضح إن احنا اللى مش من البلد دى..!
* أختلف مع المستشار جلال إبراهيم رئيس نادى الزمالك الذى فتح باب التبرع للنادى لحل أزمته المالية..
فأنا أرى أن أزمة النادى مش مالية.. أزمته أزمة ثقة، وأزمة كروية؛ لذلك أقترح أن ينظم النادى حملة تبرعات تليفزيونية يقول فيها: أنا اسمى أحمد. أنا زملكاوى.. أتبرع ولو بجون.. تعاطفك وحده مش كفاية.. اكفل زملكاوى فى بيتك.. النهاردة هاترعاه وتاخده فى حضنك.. بكره هاياخد الدورى وياخدك فى حضنه..!
* بالمناسبة.. عندى حل عبقرى لتخفيف الأزمة المالية لنادى الزمالك:يقوم بتعيينى مديراً فنياً لفريق كرة القدم.. وهاأوفر له كل الآلافات اللى بيديها للمديرين الفنيين الحاليين والسابقين.. فأنا راضى بقليله وأوعد جماهير الزمالك الوفية أننى سأكون على نفس مستوى المدربين الحاليين والسابقين: هاأدرب الفريق بدُعا الوالدين.. والفريق هايتغلب من طوب الأرض.. وفوق كل ده وده.. عمر الفريق ماهاياخد الدورى..!
إيه رأيكم دام فضلكم فى العرض ده..؟!
* كلمة ورد غطاها:
* شفت عملوا إيه فى بعض دول أوروبا..؟! سمحوا ببيع الفياجرا فى محلات السوبر ماركت!
** وإيه يعنى..!! قديمة.. دا احنا عندنا عملوا من زمان اللى أكتر من كده؛ بيبيعوا الفياجرا على الأرصفة فى الموسكى وميدان العتبة مع الأمشاط والفلايات.. والسكر النبات.. اللى بيجوز البنات..!!