المخرفاتي

فاكرين يا اخوانا الجلسة اللي هاجوا فيها موقرين المجلس الموقر علي وزير الاعلام متهمين كتاب الدراما اللي بيطلعوهم في المسلسلات والافلام بصورة وحشه.. فاكرين الوزير يومها رد عليهم قالهم ايه.. افكركم..
قالهم حسنوا أداءكم حتتحسن صورتكم.. ومتهيألي كان الوزير يقصد بالكلمة دي انه يقولهم ما انتم لكم سوابق.. مثلا كان منكم نواب المخدرات.. وبعدين ظهر نواب القروض وكمان نواب الهلس.. أي نواب سميحه.. وكان المفروض ان الموقرين يأخذوا بالهم من نفسهم ويسمعوا لنصيحة وزير الاعلام.. انما ابدا ظهر بعد كده نواب قرب الدم الفاسده.. ونواب الاستيلاء علي معبد اليهود واللي انبثق منها نواب السيديهات والكبريهات.. انما آخر حاجة ماكنتش ابدا اتصورها انهم يوصلوا لنواب القتل.. تصوروا يا أخوانا ان موقر منه يستخدم اثنين بلطجية يسحبو له واحد كان ماسك ذلة علي الموقر ده وبيهدده عشان يأخذ حق سكوته يقوم الموقر ده يخلي بلطجيته يسحبوله الراجل في عربيته وياخذوه لطريق القاهرة العلمين وقرب منطقة الحمام يوقف الموقر عربيته وينزلوا منها الراجل اللي تجرأ وطالبه بحق سكوته.. وبكل دم بارد يضربه بالنار ويقتله.. انا فجأة سمعت صرخة.. والحقيقة انا اتخضيت.. بس الصرخة دي كانت من المخرفاتي اللي قاللي ايه با أبوخليل اللي بتقوله ده.. انت اتجننت.. قتلته انا فعلا اتجننت بعد ما قريت خبر الحادثة دي في جريدة الاهرام العدد 44013 بتاع يوم الجمعة 8 يونيو 2007 ايه يا خوانا اللي بيحصل ده دي عمايل حتي ما يعملهاش الموقرون بتوع شيكاغوا.. يعني انا اعرف ان موقرين شيكاغوا لما بيحبوا يقتلوا بيبعتوا قتله مأجورين يقتلوا اللي عايزين يقتلوه.. انما الموقر بنفسه يمسك طبنجة ويفرقع رصاصها في دماغ الراجل.. دي كده بقت حياة الناس عند الموقورين رخيصة قوي.. المخافاتي قاللي والله يا ابوخليل انت لك حق تتجنن هي البلد يا ابوخليل بقت فوضي للدرجة دي.. يعني كده نائب الشعب يتحول ويبقي نائب لعزرائيل يقبض ارواح الناس بطبنجته.. وفجأة دخل علينا صاحبنا معقول افندي عبدالمتجلي.. وبصلنا باستغراب وكأنه شاف في وشنا تعبير ما كنا بنتكلم فيه أنا والمخرفاتي.. وسألنا.. ايه مالكم.. وحكيتله اللي كنا بنتكلم فيه.. وسألته السؤال المعهود.. معقول اللي بيحصل ده يا معقول افندي واردفت محذرا واوعي بأه تقوللي اللي حصل ده معقول زي عادتك.. معقول افندي بصلي كده بصته اياها وبكل البرود قاللي ومش معقول ليه قلتله معتراض لا بأه .. قاللي لا بأه ليه.. قتلته ازاي بس.. وتجلي معقول عبدالمتجلي وقاللي هوه انت مش قلت ان وزير الاعلام قالهم حسنوا من ادائكم قتلته ايوه بس الوزير كان قاصده بتحسين الاداء انهم يبطلوا يعملوا العمايل السودة اللي بيعملوها.. رد معقول افندي وقاللي يظهر همه فهموا النصيحة منه انهم يحسنوا اداءهم يعني يعملوا بلاوي اكثر من البلاوي اللي عملوها من المخدرات والقروض والهلس.. فقالوا نحسن بأه وندخل في عمليات القتل.. وبكده بأه عندنا نواب القتل.. انا بلمت وكنت بحاول استوعب اللي قاله معقول افندي اللي كمل كلامه وقال يا ابوخليل طالما احنا والمجتمع والناس والحكومة مش قادرين نردع الموقرين دول يبقوا ما يزودوهاش ليه وميحسنوش ادائهم للاوحش ليه وميحمروش عيونهم لنا ليه.. دول حيفضلوا محمرينها لنا طول ما هو مفيش قدامهم عين حمرا تخوفهم.. المخرفاتي هلل فجأة وقال انا وجدتها.. مفيش غير الريس.. تعالوا نبعت التماس للريس نقول فيه.. ماتفركش المجلس الموقر ده يا ريس.. انا كملت وقلت اي والله يا ريس باريت.. معقول افندي قال ينوبك فينا ثواب ياريس مشيهم.. المخرفاتي كمل وقال وياريت تستورد لنا مجلس موقر يكون موقرينه بيحبوا مصر.. لانه مابقاش فيه حد عندنا في مصر بيحب مصر.