مساء الخير.. إبليس يستغيث

مساء الخير.. إبليس يستغيث
يقطع الشيطان وسنينه.. واليوم الأسود المنيل اللي خلاه يضحك علي أبونا آدم...!!!
من يوم ما ربنا خلق الخلق وهو شغال علي خلق الله آخر حلاوة زي السكينة في الجاتوه..!!!
فضايح ايه وبهدلة ايه وقلة أدب وجرسة وسفالة وقتل وزنا وسرقة وتزوير ونصب وعفرتة من ولاد العفاريت ملهاش حل في خلق الله.. منك لله يا ابن الأبالسة..!! والله العظيم الواحد صعبان عليه الناس واللي بيحصل فيهم..!! هو فيه ايه..؟! معقول ما فيش مكان تاني يروح فيه شوية الابالسة والشياطين بعيد عن مصر والمصريين الغلابة..!! ده حتي يا عيني اختلط الامر عند بعض الناس واعتقدوا أن الخلق كلهم أبالسة وشياطين..!! وطبعا كل واحد منا عارف نفسه كويس أوي هل هو إنسي ولا جني ولا شيطاني..!! وعارف موقفه من الله سبحانه وتعالي خاصة الصحفيين والإعلاميين والسياسيين اللي هايروحوا جهنم حدف الا من رحم ربي..علشان احنا لامؤاخذة اللي غلبنا الشيطان وخليناه يمشي علي ايده ورجليه ويكلم نفسه ويعمل عجين الفلاحة..!! واصبح الشيخ عفرتو المكلف بعفرتت احفاد الفراعنة تلميذ خايب بليد وسط شياطين الانس من المصريين..!! فأنا شخصيا علي يقين واحلف كمان ميت يمين ان عفاريت الجن اليومين دول عمالة تضرب أخماساً في اسداس وكف علي كف ومستغربة اللي بيحصل بين الناس واستعاذوا بالله رب العالمين..! من شراسة وشر المصريين..!! تتصوروا ياعالم ياهوو أن إبليس الملعون يطلب من الله الغفران والرحمة ويتراجع عن كل تعهداته مع الله سبحانه وتعالي ويطلب السماح لأن في الأرض من هم اذكي منه وافضل منه وأن وسوستة الخناسة في الارض اصبحت قديمة وهايفة ولعب عيال..!! واعترف ابليس بخبته وحاول ان يبرئ نفسه من كل آفعالنا ويتهمنا بأنه ضحيتنا والشماعة التي يعلق عليها الجميع أشرارهم! ويؤكد بأنه ليس بهذه الوضاعة والقباحة علشان يوسوس بهذه الافعال الجهنمية التي يفعلها البعض من المصريين! والتي تفوق فيها التلميذ علي أستاذة....!! أنا مش عارف ايه سر كل هذا الحقد والغل من الناس تجاه إبليس وأعوانه من الشياطين السكة اللي ملهمش لازمة النهارده..!! ما هو ذنب ابليس فيما يحدث من حقد وغل ولئم وقتل وخبث ومكر بين الناس وابداع في تركيب الشر..!! أليست كل هذه الشرور والآفات البغيضة نتاجاً إنسانياً بحتاً..!! ما هو ذنب هؤلاء الابرياء من الضعفاء والغلابة والأطفال أن تتشبع أفكارهم بأن إبليس هو المسئول عن كل الشرور التي يفعلها الإنسان..!! ما هو ذنبهم ان يسمعوا تبريرات من الآباء والجداد أن أي فساد يتحملونه الابناء ما هو اللي غلطت ابليس الملعون.. يتحدثون وبراءة الأطفال في عينيهم مؤكدين ان ابليس واعوانه من الشيطاين هم سبب كل الكوارث التي يفعلها الناس..!! وعشان انا بحب الحق مش ابن عمه وعيني في عينكم كده..! حبايبنا من المصريين اليومين دول جعلوا من ابليس واعوانه وفكرة الوسواس الخناس شماعة يعلقون عليها اخطاءهم وشرورهم والتي وصلت إلي معدلات تفوق قدرة ابليس علي الوسوسة..!! واعتقد ان ابليس إذا تحدث بنفسه ووضح امام مؤتمر صحفي وأعلن عما بداخله سوف يقر ويعترف بأنه يقف مذعورا مذهولا أمام قدرة بعض المصريين علي تطوير الشر والابداع فيه..!! سوف يعترف ابليس بكل الحقائق امام الله وامام الناس ان المصريين تفوقوا عليه في فنون الحقد والغل والحسد والضغينة..!! وسيعلن ابليس امام العالم انه لن يسكت عما يفعله البعض من المصريين الذين يحاولون ان يضعوا شرورهم في رقبته ورقبة ابنائه من الشياطين الغلابة المساكين..!! سوف يأخذ ذنوبكم وافكاركم الهدامة الشريرة ويعرضها علي الله ويقول له اني بريء من كل هذه الافعال براءة الذئب من دم ابن يعقوب..!! ويقول ابليس لرب العالمين يوم الموقف العظيم.. لقد وعدتك يا رب ان اغويهم أجمعين الا عبادك منهم الصالحين..ولكن ياربي فوجئت بمن يخرج من اصلابهم أشر منهم واقوي من وسوسة عائلتي الخناسة وان البعض من المصريين تخطوا كل الحدود بما يفعلونه من شرور وآثام واحقاد..!! الا يستحقون يارب كل هؤلاء الافاقين المزورين الحاقدين ومعهم النائمون الممصمصون لشفايفهم ولا يفعلون شيئاً تلك اللعنات التي يقذفونها علي في الصباح والمساء؟!
لك يارب الامر من قبل ومن بعد....
عبدك المطرود من رحمتك.. ابليس الغلبان