مساء الخير..يوم الحسم

مساء الخير
يوم الحسم
اليوم يوم الحسم والقول الفصل فيه يكرم المرء أو يهان أو هايروح الليمان...!!! ساعات قليلة وتنطوي الصحف وتجف الاقلام وتغلق الصناديق وينفض المولد لتعلن النتائج عن تشريد 4592 مرشح حصلوا علي صابونة لوكس معتبرة ولم يصبهم الدور بعد تكريم 508 مرشحين قد فازوا بثقة الجماهير في هذه الدورة الجديدة وهذا هو عدد مقاعد مجلس الشعب للمنتخبين.!!
ربح من ربح وخسر من خسر.. ولكن تبقي حقيقة واحدة ان الجميع وطنيون بذلوا جهدا كبيرا وشاقا يشكروا عليه..!! فيكفي شرف المحاولة وتعرضهم لكلمات جارحة من اللي يسوي واللي ما يسواش....!!!!! انا شخصيا شايف ان جميع المرشحين قدموا كل ما عندهم من أموال وصبر علي البلاء وتحمل رزالة خلق الله وكأن المرشح خدام ابوهم وفرصة ليطلعوا فيه كل عقدهم وبلاويهم...!!! انا مش عارف ليه كل الزيطة والزمبليطة والهجوم الشرس علي الانتخابات واللجان الانتخابية وما يحدث داخل اللجان وان هناك نتائج مسبقة ومزورة والكل عمال ينادي من حبايبنا بتوع... .هو الحل. عاوزين جنازة ويشبعوا فيها لطم ومحدش يروح علشان حبايبهم يروحوا وبس...!! كان غيركم اشطر..! ولا هو اللي تغلب بة ألعببة.!الانتخابات دي ياخونا فعلا مختلفة تماما عن كل الانتخابات الماضية فيها رقابة اقوي من الرقابة الدولية فيها صحفون وفيها مندوبون عن المرشحين وفيها اكثر من 7 آلاف مراقب من المجلس القومي لحقوق الإنسان بالإضافة إلي الناخبين انفسهم ومايحملون من تليفونات بها كاميرات...!!! ينقطع لسان اللي يقول ان المرشحين ما دفعوش كويس للجماهير بتعتهم ويكفي ان حجم الانفاق علي الانتخابات حسب التقارير الدولية يقدر بمبلغ 10 مليارات جنيه..!! فاضل اية تاني علشان الجماهير تذهب إلي صناديق الأنتخابات حتي رئيس الجمهورية قال نحن نحرص علي انتخابات حرة ونزيهة وكذلك وزير الداخلية أعلن ان الشرطة سوف تكون علي الحياد التام في الانتخابات..!! يا جماهير مصر ما لكم بتكرهوا كل ما يحيط بالانتخابات كدة لية..؟!! اتقو الله في مصر.. واذهبوا إلي صناديق الانتخابات فوجودكم هو الضمان الحقيقي لانتخابات حقيقية حرة ونزيهة..!! عليكم ان تجربوا هذه المرة وكفاية تجلسوا علي المقاهي وتنقدوا وتشجبوا وترفضوا وعاملين زي عواجيز الفرح تمصمصوا في شفايفكم...!! كفاية فشخة بق ونأورة علي الفاضي والمليان وتغنوا وتقولوا النهاردة فرحي يا جدعان وعاوز كله يبقي تمام وأنتم جالسين علي مقاعدكم وفي بيوتكم وعاوزين الدنيا تتغير..!! ولا عاوزين "معدده" تلطم علي وشها ببرطوشة وتقول التزوير للتزوير وبس بدون فعل أو جهاد...!! عليك ايها المواطن المطحون ياابن .المعذبون في الأرض. ان تسقط افكارك ومعتقداتك عن الانتخابات الماضية وانها سوف تحسم سلفا وتأكد ان الحشد الجماهيري سوف يسقط تجار وسماسرة الانتخابات..!! فعليك ان تخرج وتدافع عن حقك وحق اولادك بأن تقف وتصوت لمن تراه اصلح للمجتمع وللوطن كفاية بقي الشعارات الدينية التي ألهبت مشاعرنا في وقت من الاوقات وعندما دخلوا اصحابها مجلس الشعب لم يفعلوا شيئاً سوي المعارك الجانبية والبحث عن مصالحهم ومصالح آتباعهم وكأنهم من طائفة سوبر تختلف عن طائفة الشعب المطحون بالغلب والعذاب...!! عيب أوي ان يجلس عواجيز الفرح وينتقدوا سياسة الحكومة وهم لم يشاركوا حتي بصوتهم ضدها أو معها..!! يا جماعة الخير دي كلها حاجات بسيطة ولكن في حقيقتها كبيرة ويترتب عليها رفعة الوطن وقوته...!!! ياريت ياخونا نكسب ثواب في الشعب الغلبان ونذهب جميعا إلي صناديق الانتخابات ونقول كلمتنا ونحسم المعركة لصالحنا ونتحمل مسئوليتنا تجاه الوطن.
mohmed.sharaf.hotmail.com