مرتضى منصور ينسحب من سباق الرئاسة مدفوعًا «بمنام فيه 2 ضباط»

أعلن مرتضى منصور، رئيس نادي الزمالك، السبت، تراجعه عن خوض سباق انتخابات الرئاسة، موضحًا أنه سيؤيد المشير عبدالفتاح السيسي، المرشح الرئاسي المحتمل، لأن «اللى إحنا فيه مش وقت هزار».
وأرجع «منصور» في مؤتمر صحفي قراره بالانسحاب إلى أنه رأى منامًا بعد صلاته الفجر، مُضيفا: «بقالي كتير ما اتشعبتش في أتوبيسات كنت أطلع أبونيه المترو، كل ده شوفته وجربته، عشان كده طالع من الشعب.. حلمت إني راكب أتوبيس وداني لمنطقة فم الخليج، وفجأة لاقيت اتنين جيش جنبي واحد عميد والتاني عقيد، قالوا لي إحنا رايحين مصر القديمة مش مصر الجديدة.. حسيت إن الاتنين بيمثلوا المشير السيسي».
وتابع: «أقول للمشير السيسي أنا أؤيدك كمرتضى، لكن البعض في حملتك ليس على المستوى المطلوب، البعض في حملتك النفاق ظاهر فيهم، مفيش حاجة اسمها السيسي هنرشحه غصب عنه، السيسي بشر يسيء ويخطئ».
وقال: «مش هدي صوتي لبني آدم بيقول أنا مرشح الثورة وجاي أقضى على فلول الحزب الوطني، وخد 4 مليون جنيه من رجل أعمال من الحزب الوطني، أنت مرشح الثورة ولا من الباطن حزب وطني، حضرتك بتقبض من ناس في الحزب الوطني».
وأضاف موجهًا حديثه إلى المرشح الرئاسي المحتمل حمدين صباحي: «لقاؤك مع اللواء مدحت عبدالحميد في مقر أمن الدولة لما استدعاك بخصوص المسدس الدهب الخالص اللى أخدته من صدام حسين ثم انقلبت عليه.. رحت لمعمر القذافي، قول للشعب خدت إيه من معمر القذافي، وقفت مع بشار الأسد طلعته السما ثم انقلبت عليه، في إقرار الذمة قولت عندك 7 آلاف جنيه، اللى ولدوا عربية مرسيدس، دول منين».
واختتم حديثه: «أيها المناضل حضرتك لما اتحبست اتحبست ليه، وأنا اللى طلعتك وقتها».