خلى بالك .. أوعى توقع أو تستوقع قبل ما تعرف!

فيما يلى بعض المفاهيم القانونية تقدمها شبكة الاعلام العربية "محيط " بشكل مبسط ولهجة دارجة كى يسهل استيعابها من المستفيد منها كالتالى :
"كتير" مننا ...ممكن تدفعه الظروف والأوضاع الاقتصادية إلى إنه يوقع على إيصال أمانه لضمان شيء معين أو أقساط.... وغيرها من المعاملات المالية الجارية حتى ما بين التجار وبعضهم .
وفي الحقيقة أن أغلب الايصالات دي منها على بياض، وده خطر جدا ومنها بيبقى أكثر من القيمة المستحقة ...."اللى" بموجبها بتوقع حضرتك على إيصال أمانه .
"علشان كده" .....لازم تكون عارف حضرتك خطورة وعقوبة توقيعك، أو حتى حصولك إنت على توقيع من شخص أخر على بياض.
نعرف الأول معنى خيانة الأمانة إيه؟...بالبلدي هو فيه شخص استلم من شخص أخر مبالغ مالية أو أمتعة أو بضائع أو نقود أو تذاكر أوكتابات أخرى بموجبها وقع له على ايصال امانة .
وبعد كده يقوم المستلم باختلاسها أو استعمالها أو تبديدها،.... بمعنى انه ما يسلمهاش لصاحبها يعني خان الأمانة ومسلمهاش للمرسل اليه بقصد الإضرار بأصحابها . ومن المفترض وجود توقيع لوجود أمانة، فلازم البيانات والتوقيع تكون مكتوبة من صاحب التوقيع نفسه ....ولا يجب إنه يكون فيه تاريخ على إيصال الأمانة.... وألا أصبح ورقة مدنية عادية لا تحمى جنائياً وتتحول لحق مدني فقط .
علشان كده لازم قبل ما توقع تكون استلمت بالفعل المبلغ المكتوب في الايصال....ولو الايصال لصالحك خلي بالك ما تاخدش ايصال على بياض... وخلي المستلم يملئ البيانات بنفسه ...لأنك ممكن تدخل في مشاكل كبيرة بالتوقيع على بياض....
وفي المقال اللى جاي هنتكلم عن التوقيع على بياض وخطورته على الطرفين .
وخلي بالك ان عقوبة جريمة خيانة الأمانة كما ورد بنص المادة 341 من قانون العقوبات المصري بتنص على انه " كل من اختلس أو استعمل أو بدد مبالغ أو أمتعه أو بضائع أو نقودا أو غير ذذلك إضرارا بمالكيها أو أصحابها أو واضعى اليد عليها وكانت الأشياء المذكورة لم تسلم له إلا على وجه الوديعة أو الإجارة أو على سبيل عارية الاستعمال أو الرهن أو كانت سلمت له بصفه كونه وكيلا بأجره أو مجانا بقصد عرضها للبيع أو بيعها أو استعمالها فى أمر معين لمنفعة المالك لها أو غيره..... يحكم عليه بالحبس ويجوز أن يزاد عليه غرامه لا تتجاوز 100 جنيه مصري"
علشان كده ...لازم تخلي بالك قبل ما توقع على ايصال امانه...