رسالة من مؤيد السيسي: "الناس بتموت.. وأنا مأخدتش منك حاجة"!

شكا أحد مؤيدي الرئيس عبدالفتاح السيسي من سوء الأوضاع الاقتصادية التي تشهدها مصر بسبب ارتفاع سعر الدولار الذي أدي بدوره إلى ارتفاع جنوني للاسعار.
وطالب في مداخلة هاتفية ببرنامج "العاشرة مساءً" المذاع على برنامج "دريم"، بإقالة جميع أعضاء مجلس النواب وتغيير اسم المجلس إلى "مجلس الشعب" لكي يكون معبرًا عن المواطن .
ووجه رسالة إلى النائب عاطف مخاليف، أحد ضيوف الحلقة، قائلا "الأستاذ عاطف اللي بيقولك استحمل ، أنا عندي 3 أطفال كلهم في مدارس وأنا راجل مستورد وأقسملك بعزة جلالة الله أن انا من قبل شهر رمضان ما دخل بيتي جنيه ووقفت البضاعة بتاعتي و ربنا ينجينا من البلد دي، وبقول للأستاذ عاطف أنا لسة جايب ب3 جنيه عيش فينو و 4 زبادي ونصف لتر لبن وشيبسي وحلويات للعيال ب37 جنيه ".
وأردف: "أطالب بإقالة الحكومة الفاشلة اللي خلت الدولار ضرب الجنيه غرقه، وفي كارثة تانية أن الجمارك المصرية بتحاسبك على سعر الدولار البنكي يعني لو جايبين حاوية ب100 ألف ولما الدولار في البنك يبقى ب14 جنيه يبقى الحاوية دي هتبقى ب140 ألف .. مين اللي هيدفع الزيادة في سعر الحاوية؟ الشعب".
واستكمل قوله: "أنا واحد من الناس خلاص .. كنت عايز أربي عيالي بالحلال بس للأسف الشديد بنتي اللي في تالتة إعدادي بتقولي أنا مش عايزة أعيش في مصر لأنها بتغرق الشباب والتعليم والصحة فاشلين ومفيش حاجة في الدولة عدلة .. دة شقة الطعمية ب2 جنيه ردًا على الأستاذ اللي بيقولك تقدر تعيش بجنيه في اليوم " .. مضيفًا: "أنا راجل من مؤيدي الرئيس السيسي وأيام ثورة 30 يونيو بعت الدهب بتاع مراتي وعملتله 3000 تيشيرت مكتبتش عليهم اسمي حتى عشان عايز مصر تقوم .. ودلوقت أنا بقوله يا سيادة الريس أنا مخدتش منك حاجة .. أنت كدة بتخليني أسيب عيالي وأهج من مصر .. بحملك ياريس أنت وحكومتك لو عيالي جرالهم حاجة .. وأنا كان نفسي أعلمهم تعليم كويس يطلعوا يخدموا بلدهم بس للأسف أصبحت الدولة المصرية الشمال فيها اللي ماشي".
ووجه قوله للرئيس السيسي: "أنا ريس هقولهالك على الهواء ومستعد للمساءلة ، ياريس أنا بعد 2011 لو كنت عايز أطلع بصاروخ كنت طلعت بس للأسف خفت الله في عيالي وعيالك بس للأسف فيه ناس باعوا ضميرهم ودخلوا البرشام والمخدرات .. ياريس مركب الهجرة الشرعية دي هي نفس المراكب اللي دخلت مخدرات وسلاح .. ياريس حس بينا .. أنا لما انتخبتك وبعت دهب مراتي كنت عايز أعلم عيالي .. وأنت كدة بتخليهم ينحرفوا .. ياريس الناس بتموت .. والله فيه ناس في الأرياف ما لاقية تاكل ".