علشان «سي رمضان»

قال لك ايه الحكاية؟ والزحمة، اللي ملهاش تلاتين لازمة، وخالتي الأسعار اللي طلعت، وخدت السلم معاها، وحلفت "ميت يمين" ما هي نازلة.
وحتى المرور واقف، والناس بتجري علشان تروح بيوتها، ومش عارفة، وبتوع الكنافة، والقطايف، واقفين عليهم طوابير، ومش عارف يبيع لمين، ولا مين، مع إن الراجل فاتح طول السنة، وأنا عارفه وبعدي عليه كل يوم.
واللي عامل، وعاملة جدول عزومات، وزيارات لشهر جاي على اساس انه محدش ينفع يزور ولا يعزم،ولا يود حد إلا في توقيت وشهر معين في السنة.
واللى مكنش بيصلي، طبعا ده موسم عبادة تلاقيه جري علي الجامع وفيه جوامع بيبقى فيها تكييف، مبيبقاش عاوز يطلع، ليه؟ علشان الفرض والحسنة بعشرة.
والموائد اللي ملت الشوارع " متبروزة" بأسماء اصحابها "اللي" الغلابة مبيشوفوهاش إلا شهر في السنة.
وتلاقي "عبدة مشتاق" بتاع الانتخابات، نازل باليفط البيضة الحلوة، والناس الغلابة قاعدة عريانة، بس بصراحة اليفط عملة "ضلة وطرواة"، والقعدة تحتيها حلوة.
والقنوات" اللي هرت الناس إعلانات وبرامج المقالب البايخة "اللي "خلاص بقت مكررة، ومهروسة، وبرامج الطبيخ، والأكلات الغريبة اللي بتجوع الغلابة على الفاضي.
وطبعا متنساش المسلسلات اللي مش "وشها" بس اللي بقى مكشوف، لا ده كل حاجة فيها عريانة، ده ليه لأن النظرة بعشرة وربك بيضاعف وموسم.
والحكومة العظيمة "اللي هرتنا تصريحات عن الأسعار والحاجات والمحتاجات، والحقيقفة يعني، إن القافلة تسير والغلابة على باب الله.
ومش عاوز أنسى "الارزوجية الشحاتين" اللي "ملو الشوارع والميادين وجميع وسائل المواصلات طبعا ما هو موسم وأيام معدودة.
واللي عاوز ياخد أجازة من شغلة واللي "خايف من الحر وطول النهار، واللي متعود يشرب شاي وقهوة في الشغل "يا ولداه"، وبيقلك لازم الحكومة تتدخل، وتخفض ساعات النهار علشان يبقي الجو فرش، ولطيف.
وقال ايه علشان بكرة "رمضان" طيب إيه يعني رمضان ؟
طيب يا عم الحج ده شهر من السنة للسنة، وطبعا أن مش عالم دين، ولا فقيه ومعلوماتي علي قدي.
"بتاع الموائد فيه ناس محتاجة للأكل، ومش بتلاقيه طول أيام السنة، وبتاع الكنافة موجود طول السنة ممكن والموائد ممكن تتوزع على شهور السنة وطالما أنت راجل بتاع بر وخير بلاش تربطه برمضان.
وعبده مشتاق طبعا لما قالولك الانتخابات بعد العيد بايديك وأسنانك نازل ظهور، وتبرعات لحد ما مولد الانتخابات ينفض، وبعد كده حد يجي يقابلني لو عرفنالك لك طريق جرة.
يا عم المشتاق علشان تعشش في قلوب الناس، اعتبر أن أيامك كلها رمضان ومتتأخرش عن مساعدة أي محتاج.
واللي فجأة افتكرناه لازم يبات في الجامع اليومين دول ولازم يعزم، ويزور أهله.. يا ريت تتعامل مع الحكاية دي علي أساس إن عمرك كله رمضان لأن لذة الصيام في السعي والعمل وفعل كل خير على مدار العام كله.
"مطولش" عليكم علشان انتوا عارفين إن بكرة اول يوم رمضان والواحد لازم يستعد ؟.