بالصور .. "كريسماس" الغلابة فريسكا .. حمص شام .. والمشى على الكورنيش

بائعة مناديل : نفسى أستر بناتى وأطلع عمرة فى السنة الجديدة .
عم "رفاعى" السنان : الكريسماس أصلا حرام .
بائعة ذرة مشوى : نفسى البلدية تسيبنا فى حالنا علشان نأكل عيش .
ماسح أحذية : أحتفلت برأس السنة فى تلميع جزم البهوات .
موظف بسيط : كل سنة وانت طيب ياريس .
على طريقة المقولة الشهيرة بأحد الافلام الكوميدية "رأس سنة إيه وزفت إيه اللى بتكلموا عليه " قضى قطاع عريض من الشعب المصرى وهم الطبقة الكادحة منه أخر ليالى عام 2014 على طريقتهم الخاصة .
بعيدا عن الحفلات الغنائية وسهرات الليل وأخره بالفنادق الكبيرة قمنا برصد أحتفالات المواطن البسيط بأستقبال العام الجديد .
وكانت البداية مع عم "حسين "سايس بجراج سيارات قال " السنين كلها شبه بعضها أحتفل على ايه يعنى انا العيد بتاعى لما أروح بيتى وأنا معايا أكل عيالى وعلى العموم أنا أحتفلت برأس السنة فى شغلى الشقى مكتوب علينا واللى زينا مالهمش حق أنهم يحتفلوا بأى حاجة فى حياتهم ".
عم "رفاعى " سنان سكاكين وألات حادة قال " رأس سنة ايه اللى بتقولوا عليها الناس مش لاقيه تأكل والعيشة بقيت صعبة أوى وانتوا لسه بتقولوا أحتفالات أنا نفسى أعيش عيشة كويسة وخلاص ومش عايز حاجة تانى أنا ضهرى أتكسر من شيل الماكنة عليه ونفسى أرتاح من الشغلانة دى وعلى فكرة اللى زينا حرام يحتفلوا برأس سنة أو غيرو علشان أحنا مش عايشين أصلا ولا محسوبين على المجتمع " .
"حمودة" بائع فريسكا قال " قضيت ليلة رأس السنة باللف فى الشوارع علشان أبيع البضاعة اللى معايا ولما ربنا يكرمنى وأخلصها .
واروح اشترى لقمة حلوة أكلها وممكن تكون فرخة مشوية مثلا أو نص كيلو كفتة اى حاجة الواحد يأكلها قبل ما ينام علشان يصحى تانى يوم فايق للشغل ويوم الكريسماس ده يعتبر موسم لينا يعنى بنفضل شغالين من بعد صلاة المغرب لبعد نص الليل .
وبصراحة أحلى حاجة السنة دى ان فيه أمن شوية والناس زحمة فى الشارع غير السنين اللى فاتت وده مخلينا نشتغل كويس الحمد لله ونفسى فى السنة الجديدة بقى ربنا يكرمنى وألاقى شقة أتجوز فيها " .
"أم حسن " بائعة مناديل قالت " كل سنة والشعب المصرى كله بخير والسنة الجدي]ة تكون أحلى إن شاء الله علينا كلنا وكل سنة والريس بتاعنا بخير ويحقق لنا كل اللى بنتمناه والامن يرجع تانى ونفسى أستر بناتى وأجوزهم والامنية الكبيرة بقى أنى أطلع أعمل عمرة ".
" عم سيد "ماسح أحذية قال " كل سنة بقضى الليلة دى فى مسح جزم البشوات والبهوات اللى خارجين يسهروا وبتبقى ليلة زى الفل بصراحة والبقشيش بيبقى كويس فيها واليوم ده بشتغل فيه لحد شروق الشمس وبعدين بروح أجيب لعبة او اى حاجة لابنى يفرح بيها وهى دى فرحتى واحتفالى الحقيقى باليوم ده غير كده الايام كلها شبه بعضها ومافيش جديد وبتمنى ان تبقى 2015 أحسن من اللى قبلها والبلد تهدى والاستقرار يرجع تانى " .
وبالسير فى منطقة وسط البلد وكورنيش كوبرى قصر النيل وجدنا مجموعة من الصبية يحتفلون بالكريسماس على طريقتهم حيث تجمعوا حول تمثال طلعت حرب ليلتقطون الصور التذكارية بجواره ومجموعة أخرى تقوم بإشعال الالعاب النارية بالقرب من ميدان التحرير .
والمشى على الكورنيش له نصيب الاسد فى جميع أحتفالات المصريين وبالاقتراب من أحد الاسر المصرية التى كانت تجلس لتناول حمص الشام .
قال الاب عن ليلة رأس السنة "ولادى عايزين يتفسحوا ويخرجوا يحتفلوا بالكريسماس ومافيش أحلى من كورنيش النيل علشان نحتفل عليه مع كوباية حمص شام تدفينا فى البرد ده وطبعا ده كله مش هيكلفنى كتير خاصة وأنى موظف بسيط على أد حالى ولكن أهم حاجة اننا ننبسط وافرح العيال فى يوم زى ده .
ونفسى فى السنة الجديدة الريس ياخد قرار بزيادة المرتبات علشان الحياة بقيت صعبة أوى وأحنا كلنا بنحبه وبنتمناله سنة سعيدة "
"سعدية " بائعة ذرة مشوية على كوبرى قصر النيل قالت " كل سنة وانتم طيبين والليلة دى قضيتها فى شوى الدرة وبيعها وانا ببيع كوز الدرة ب 2جنيه ومش بستغل الظروف ورأس السنة وكده لا ببيع بسعر كل يوم بس نفسى فى السنة الجديدة البلدية ترحمنا شوية وتسيبنا نأكل عيش بدل البهدلة بتاعة كل يوم دى ونفسى الحكومة تحسسنا ان أحنا بنى أدمين ولينا حقوق مش عالة على المجتمع ويارب السنة الجديدة تبقى فاتحة خير علينا كلنا " .