"محدش يخدلي على كلام"

منذ ثلاث سنوات ومن قبلها وحتى اليوم المصريين عايشين ببركة الكلام بياكلوا كلام ويشربوا كلام وبنزرع كلام ونصنع كلام ولما نيجيي ننتج برضه كلام وحتى التجار اكسب حاجة يتاجروا فيها طلعت الكلام ولما نيجي نستورد نستورد إيه؟ آلات تساعدنا على الكلام حتى لما نقوم من النوم أول حاجة نعملها الكلام .
طيب هتسألوني أيه حكاية الكلام ؟
" خد عندك قالوا لنا انزلوا في 25 يناير وفيه نظام سقط وفيه تغيير هايتم والشباب يروح يقدم علي وظايف في جميع الوزارات وبياعين الطلبات طبعوا ملايين الاوراق وكل واحد جاب له كرسي وقعد أمام كل وزارة يكتب في طلبات ويبيع للشباب.
"واللي عنده أي مشكلة يروح على مجلس الوزراء وموظفين تستقبل الشكاوي ويديك رقم واتصل بينا وإحنا في خدمتك .
"ووزارة الإسكان تعلن عن تقديم على شقق وابعت ياواد بالبريد واللي مسافر ومتغرب قالوا له أبعت بياناتك وقدم علي شقة وارفع راسك ياخي لقد ولي عهد الظلم والاستبداد .
" واللي قتل الشباب هيتحاكم والفلوس إللي اتسرقت هترجع وتتوزع علي الشباب وهنكتفي ذاتيا من القمح ونرجع نصدر ثاني القطن وهنمنع تصدير الغاز عن إسرائيل .
وللأمانة كان فيه ناس بتقول خلو بالكم عشان إللي بيحصل دا كله كلام والسلام
ورجعوا تاني وقالونا انزلوا في 30 يونيو علشان البنزين يرجع وعلشان الكهرباء متقطعش وعلشان نقضي على استبداد الإخوان والشباب هياخد حقه والحكومة كلها شباب والحريات هترجع .
واحلي كلام الأيام دي وأعجب سؤال ممكن تتسئلة أنت مع مين وهترشح مين ؟ ولو مش مع يبقى ضد ومولد الانتخابات علي الأبواب وتقريبا الغلابة تاهو في النصف وكل واحد يتاجر بيهم شوية.
وبالنسبة لي انأ قبل ماقول أي كلام لو كان لي حق أصلا في الكلام لايهمني مين مع مين ولا مين يحكم ولا حتى يتحكم
ولكن عاوز أفكر اللي بيفكر يحكم أن مصر فيها طوابير كتير منها في البطالة ومنها علي أفران الخبز وفية ناس عايشه في الزبالة وفي ارض زراعية اتزرعت خرسانة وطوب احمر .
وفيه مصريين بيرمو نفسهم في البحر واللي بيوصل منهم بيشوف المر والعزاب ألوان وفيه أطفال بلا مأوي في الشارع وبيهددوا بثورة جياع.
وده كلامي بالنسبة لمولد الرئاسة ويارب يخلص بسرعة ومش عاو زين نتكلم فيه كتير ومعلش لو حد قري الكلام وشاف أني انأ ماليش حق أصلا في الكلام يسامحني حاولت علي قد ماقدرت أزوق في الكلام
ومحدش يزعل مني ولا ياخد لي علي كلام وانتو عارفين أنه في الأول والأخر كله كلام والسلام
توقيع "كلمنجي"