خليك ريلاكس ! /عصام سرور

خليك ريلاكس !


* عصام سرور

حاول دايمآ تحتفظ بهدوء اعصابك لما تواجة اى مشكلة الحياة كلها مطبات فلازم تاخد المطب بهدوء علشان ميأثرش على العفشة واحيانآ الحياة بيكون فيها نوقر واحيانآ حفر لو خدتها بأنفعال ونرفزة خد عندك بقى قلب وضغط وسكر مع ان السكر غالى بس ربنا يكفينا شرة ولو حصل وخدت الامور بأنفعال مش هينفعك حد ولا اتخن ميكانيكى علشان يظبتك واملك الوحيد فى التوكيل يعنى المستشفيات الخاصة وشوف بقى الاسعار القلب بكام والفشة بكام والكبدة بكام ربنا يكفينا شرهم

- حضرتك ابوك صرف عليك دم قلبة وانت اجتهدت فى المذاكرة وطلع عينك مشفتش يوم حلوا طول دراستك غير شوية مغامرات عاطفية فاشلة ايام ثانوى وفى الكلية مع كام رحلة ترفيهية وكام قعدة خلوية وراء المدرج بس فى الاخر اجتهدت وربنا كرمك واتخرجت فاكر انك جبت الديب من ديلة اتصدمت بالواقع واكتشفت ان الديب مالوش ديل ملقتش وظيفة ولو فية المرتب يادوب يكفيك سندوتشين وعلبة سجاير كوكوالضعيف ابوك حلف عليك ميت يامين انك ملكش عندة غير لقمتك والبت اللى قعدت ترسم عليها يابنتى انا ممكن اتجوزيك فى اربعة وعشرين ساعة بس اعمل اية بابى حالف ميجوزنى الا لما اخد الشهادة علشان يمسكنى الشركة اكتشفت حقيقتك وفلسعتك .

- تزعل تتضايق لأ تتضحك زى مابتقول الاغنية القديمة ازعل لأ اتضايق لأ اعمل اية نضحك طبعآ نضحك يالانضحك ...... بس انتى المرة دى هتضحك على خيبتك وهتحس انك طلعت خوبوء مع انى مش عارف معناها بس هتقعد تفكر طيب وانا اية اللى خلانى اذاكر ويطلع عينى وابوية يصرف دم قلبة علية ياريتك يابا رمتنى فى ورشة من صغرى اتعلم صنعة كان زمانى ملك دا الواد سيد مفك بيحللة مسمارين تلاتة وياخدلة خمسين جنية دا حتى بيندولة ويقولولة يادكتور هو دة النجاح بس برضة لازم حد يبص للفشلة اللى زيى .

-هتدور فى راسك افكار غريبة وهتطاردك صورة انبوبة البوتجاز وعلبة بودرة الصراصير اللى تحت الحوض وامك هتخبى حبل الغسيل وجركن الجاز وحبل السبت والسكينة الحامية بس الشيطان شاطر ياد متروح تركب مركب من اللى بيعدوا البحر لو اتحققت نسبة التسعة وتسعين فى المية وغرقت المركب يبقى ربنا كرمنا اما لو اتحققت النسبة الاكبر وهى الواحد فى المية ياسلام سلم يبقى الحياة بقى لونها بمبى تقعد تحلم انك ركبت المركب وربنا كرمك واتحققت النسبة الكبيرة ووصلت والناس فى اوروبا رحبوا بيكم ادوكم اكل ولبس فجأة لقيت نفسك فى المطار متكلبش تصحى على كابوس وتلاقى نفسك وائع من السرير على .....

- بعد كل دة حاول متكتمش فى نفسك وخليك ريلاكس

** صدقونى لا حياة مع اليأس ولا يأس مع الحياة وعمر ماحد طلع السلم مرة واحدة غير الحرامية وتجار المخدرات واخرتهم بتبقى معروفة بيقعوا على جدور رقابيهم مش لازم احقد على حياتى او على ابوية لو مش قادر يساعدنى بل بالعكس دانا ابوس ايدة ورجلة علشان ربانى طيب جرب تربى خروف كدة هيطلع عينك ويخرب بيتك لحد متربية ايش حال ابوك اللى ربى شحط زيك .

والوظيفة اللى انتى مش شايفها هتكفى رغباتك اشتغلها وانت شغال دور على وظيفة تانية افضل منها وبأذن اللة ربنا هيرزقك لا تقنت من رحمة ربنا علشان كل واحد ربنا محددلة رزقة ومفيش حد بياخد اكتر من رزقة بس اهم حاجة الايمان باللة وتدى لربنا حقة وشوف كدة ربنا هيعمل اية معاك ومع كل دة خليك ريلاكس . وصلى اللة وسلم وبارك على سيدنا محمد وعلى الة واصحابة اجمعين .......



* كاتب من مصر
البريد : essam.sror@gmail.com